Úr höfði sveittrar húsmóður í hjáverkum.

Akrar - lítið vídeó

2010-02-05T04:48:00.001-08:00

Hæ, alle sammen. Ég er í smá letikasti þannig að ég föndraði þetta vídeó. En núna er það búið og ég hef enga afsökun til að koma mér undan því að skrá verkin mín hjá Íslenskri tónverkamiðstöð, best að ljúka þessu af. Góða helgi öll sömul!

2010-02-02T02:14:00.000-08:00

Útgáfutónleikar annað kvöld

2010-01-03T11:16:00.000-08:00

Það eru útgáfutónleikar annað kvöld! Hér er smá sjónræn kynning á því ;):

Stúdíóblogg: Búin að klippa.

2009-12-08T02:41:00.001-08:00

(Hluti af Hljómsveit Hafdísar hlustar á nýupptekin lög í ágúst 2007. Frá vinstri: Eiríkur, Grímur, Sandra, Stína og Maggi. Fleiri myndir má finna hér).

Ég sit í sófanum inni í litlu stofunni minni, hlusta á "Þjóðlag frá Egóistan" og horfi út um stóra stofugluggann. Úti eru ennþá ljósaskipti og einhver mögnuð blá birta, og rauða ljósaserían á hvíta svalahandriðinu tónar ofsalega fallega við allan blámann. Inni er ég bara með kveikt á lömpum, ég nenni ekki neinni flóðlýsingu. Mér finnst skammdegið æði og nýt þess að sjá birtuna breytast smátt og smátt!

Núna er ég búin að editera diskinn minn og er mjög sátt við útkomuna! Þó þetta séu flestar orðnar nokkurra ára gamlar tónsmíðar (yngsta lagið frá 2007, og upptökurnar líka frá 2007) þá er ég ekki með neinn bjánahroll. Svo er ég búin að skella inn smá elektróník, ekkert yfirþyrmandi, bara smá krydd hér og þar. Það er sem sagt kominn smá Hafdís-2009-bragur á þetta án þess þó að skemma Hafdísarband-2003-2007-stemminguna. Svo eru þarna nokkrar "villur" sem ég tími alls ekki að klippa út (klippi bara villur sem fara í taugarnar á mér). Sumar villurnar er ég meir að segja búin að kópera og föndra meira úr, ekkert skemmtilegra en að taka villu og gera eitthvað fallegt úr henni!

Á morgun er svo stefnan að byrja að fínmixa og mastera.

Ég finn að það er ofsalega freistandi að stinga eitthvað af út úr bænum í dag, labba kannski upp á eitt fjall eða svo, hlusta á þögn einhvers staðar úti í buska. Ég ætla samt að byrja á því að setja eitt loka-pensilstrik á eitt eða tvö lög, æfa mig á gítarinn, sinna heimilisstörfum og ganga frá nokkrum lausum endum varðandi tónleika og slíkt. Ömm...spurning hvort það verði einhver tími fyrir fjallgöngu eftir það...?

Hér er færsla sem ég gerði á ensku þann 3. des. Ég átti alltaf eftir að pósta henni á íslenska bloggið:

STÚDÍÓBLOGG 3. DES, AGAR AGAR:

Í dag var ég að vinna í laginu Agar agar. Ég er búin að rýna inn í tölvuna í allan dag, þannig að þegar ég loka augunum sé ég ekkert nema bylgjur í ýmsum litum (ProTools vinnuglugginn lítur þannig út). Ég er búin að vera að marg-klippa og færa til litla búta, hægri vinstri, aftur og aftur...

Þetta er snúið lag en ég held mér hafi tekist að draga eitthvað fram í því.

Seinna sama dag er ég að synda í Laugardalslauginni. Laugin er volg og notaleg og loftið er kalt og frískandi, enda 7 stiga frost. Það er dimmt og stjörnubjartur himinn. Gufan stígur upp úr lauginni og kallast á við tunglið sem er fullt og veður í skýjum. Þetta minnir mig á þegar við Erica vorum uppi á Esjunni í sumar með skýslæður allt í kring um okkur. Þar sem ég syndi fram og tilbaka tek ég eftir því hvernig tunglsljósið flöktir á botni laugarinnar, alveg eins og hljóðbylgjurnar sem ég er búin að vera að vinna í allan daginn. Þessar bylgjur hreyfast ekki bara frá hægri til vinstri heldur líka upp og niður og á ská. Ég velti því fyrir mér hvernig þessar bylgjur myndu hljóma ef þær væru hljóðbylgjur!

Stúdíóblogg: Jólin hennar Hafdísar

2009-12-01T14:30:00.000-08:00

(Þessi dásamlega jólamynd frá 1980 sýnir hefðbundið jólahald hjá fjölskyldu minni. Mamma í kjól sem ég vildi óska að væri ennþá til svo ég gæti nappað honum frá henni, Heimir bróðir, Dagný systir, og ég að borða súrmjólk á jólunum. Mér er strítt á því á hverjum einustu jólum að ég vildi bara borða súrmjólk á jólunum þegar allir hinir átu jólamat. (Pabbi tók myndina og er þess vegna ekki með á henni). Þessi mynd prýðir hulstur geisladisks sem ég ætla að setja í fjölföldun á morgun).

HINN DISKURINN:

Ekki get ég sagt að afköstin séu mikil í stúdíóinu. Sérstaklega ekki þegar maður fær allt í einu þá flugu í hausinn að fara að vinna í allt öðrum geisladiski. Það verður þó væntanlega mun minna mál þar sem hann er tilbúinn að öllu leiti nema hvað hann er uppseldur, enda ætla ég að láta búa til fleiri á morgun. Þessi hliðarspors-diskur er jóladiskur, leikinn á kassagítar og frekar ólíkur diskinum sem ég á að vera að vinna í. Vinna mín við jóladiskinn vekur líka upp góðar minningar:

Ég man þegar ég tók jólalögin upp í desember 2004. Ég sat á flísalögðu gólfi þáverandi heimilis okkar með eitt stykki míkrófón beint fyrir framan hljómopið á stálstrengja kassagítar. Í þessum stellingum, sem yrðu seint viðurkenndar sem heilsusamlegar, spilaði ég inn nokkra kósý og rólega jólasálma. Mér finnast nefnilega flest jólalög sem maður er bombarderaður með í nóvember og desember frekar stressuð og þreytandi, þannig að markmiðið var að búa til jóladisk sem ég sjálf gæti hugsað mér að hlusta á. Útkoman var svo sett í jólapakka til vina og ættingja. Það gladdi mig mjög að þeir vinir mínir sem fá hausverk af að hlusta á alla aðra músík sem ég geri höfðu gaman af þessum diski, og hafa jafnvel gefið sínum vinum og ættingjum diskinn líka.

Ég var ólétt og komin með nokkuð öfluga bumbu sem gerði það að verkum að ég þurfti að raða gítarnum á mig aðeins öðruvísi en venjulega. Óléttan, og óléttujógað sem ég stundaði, setti einnig mark sitt á stemmninguna sem ég var í. Á meðan ég spilaði inn lögin eitt af öðru einbeitti ég mér að því að gera ekki neitt of hetjulegt, heldur þvert á móti að ná algjörri afslöppun og leyfa einfaldleikanum að njóta sín. Ef mér svo fannst eitthvað hljóma of tens eða stressað þá spilaði ég það aftur og aftur þangað til ég var sátt.

Á morgun ætla ég að fara út í bæ með diskinn og láta búa til nýtt upplag. Þar sem þetta er ofsalega heimatilbúið allt saman þá get ég stillt verði disksins í algjört hóf og selt hann fyrir litlar 1.000 krónur stykkið, sem ætti að vera nokkuð kreppuvænt geisladiskaverð. Þeir sem hafa mögulega áhuga á ofsalega rólegum, hálftíma löngum jóladiski á kassagítar geta heyrt sýnishorn á mæspeisinu mínu og pantað svo diskinn hjá mér ef áhugi er fyrir því (skynjið þið einhverja sölumennsku í þessari bloggfærslu?!?, híhíhí...). Þeim sem ætla að gefa diskinn í jólagjöf býð ég að auki (fyrir 500 krónur) innpökkun og áritaða piparköku með hverjum diski (þ.e. að piparkakan sé merkimiði með "Til [nafns], frá [nafni]"). Ofsa umhverfisvænt, hægt að éta merkimiðana :D. Það gæti orðið líflegur piparkökubakstur hjá mér ef margir vilja svoleiðis. Og þeir sem panta 20 stykki eða fleiri fá heimabakaða pönnsu í kaupbæti :D!! Sem sagt, kósíheit og heimilisleiki í fyrirrúmi.

...pínu bömmer með mæspeisið að bæði lögin þar eru merkt "by Hafdís" en auðvitað er þetta ekki eftir mig heldur gamlir jólasálmar eftir allt annað fólk, og ég hef ekki græna hvernig ég get breytt þessum merkingum á mæspeisinu.

Sem sagt; eftir að barnið er komið á leikskólann fer ég með jóladiskinn í fjölföldun og tek svo aftur til við að mixa hinn diskinn!

P.S. Ohhh, mig langar í pönnsur....

Blogg úr stúdíóinu

2009-11-27T04:08:00.001-08:00

(Sit hér í eigin heimi að búa til músík...)

Næstu daga mun ég pósta hér hugrenningum þar sem ég sit og editera stúdíóupptökur sem eiga að fara á nýja diskinn minn. Planið er að hann verði tilbúinn 15. des, ég vona að það náist!

SZYMON:

(P.s. Smá svindl. Ég skrifaði textann í gær og þá var ekki svona veður eins og á myndinni, svona er það hins vegar í dag).

Hér sit ég aftur, í sama hergergi í Eskihlíðinni og ég sat árið 2005 að semja lag fyrir fallinn vin og samstarfsmann. Ég hafði frétt lát hans daginn áður og fann skyndilega þessa þörf til að semja lag fyrir hann. Og núna fjórum árum seinna sit ég hér aftur og er að klippa og editera lagið hans, og þar að auki að bæta við smá föndri úr gömlum upptökum með honum. Það er ótrúlegt hvað er mikill karakter í þessu spili, og magnað að það sé hægt að fanga það á upptöku! Ég kem til með að skrá hann sem meðhöfund þar sem lagið hefði aldrei orðið eins og það varð án hans, og ég hefði aldrei orðið eins og ég varð án hans.

Þegar ég lít út um gluggann blasa fjöllin norður af Reykjavík við mér, snævi þakin. Það er smátt og smátt að verða bjartara. Eftir smá stund þarf ég að fara niður í þvottahús og taka úr vélinni, og svo skrepp ég í tvo tíma að kenna á gítar áður en ég sest aftur við tölvuna að vinna í laginu. Skrýtið hvernig lífið heldur áfram og árstíðarnar breytast bara sama hvað gerist.

Þegar ég lít aftur út um gluggann og í áttina að miðbænum, þá er skrýtið til þess að hugsa að þessi vinur minn og meðspilari sé ekki lengur þar, og sama má segja um aðra sem eru fallnir frá. Maður á mjög auðvelt með að ímynda sér hann og hina gangandi um göturnar, kannski að flýta sér eitthvert til að vinna í einhverju spennandi, eða kannski að hafa það notalegt á kaffihúsi. Ég sé hann líka fyrir mér sitjandi heima hjá sér að vinna í tónlist, beint á móti STEF...

Hér má lesa meira um Szymon Kuran, en annars er þetta langt frá því að vera tæmandi:

http://www.musicweb-international.com/classrev/2008/Jan08/Kuran_apo161.htm

http://www.requiemsurvey.org/composers.php?id=454

Brjálað að gera, m.a. tónleikar 15. okt. nk.

2009-10-09T04:52:00.000-07:00

Jæja. Hér kemur stutt blogg. Það er vægast sagt búið að vera brjálað að gera, kellingin að spila á 2-3 tónleikum í næstu viku, og svo orgelfestivalið í Köben (þar sem leikið verður orgelstykki eftir mig) og París (þar sem ég mun spila á frjálsum spunatónleikum ásamt mjög spes hljóðfærum og flottum spilurum) í lok október. Svo ég tali nú ekki um öll tónverkin sem eru á "to do"-listanum mínum. Og svo er ég að vinna í plötunni góðu sem lengi hefur staðið til að gefa út. Planið er sem sagt að koma henni út um miðjan des, þannig að endilega hafið það í huga upp á jólagjafir ;). Ég mun selja diskinn fyrir jólin í pakka með tveimur miðum á útgáfutónleikana, en þeir verða í byrjun janúar. Planið er svo að verði disksins verði stillt mjög í hóf. En nánar um öll þessi plön síðar.

En já, það er ekki búið að vera mikið líf á mér í bloggheimum. Þar er fésbókinni helst um að kenna, því þar fæ ég útrás fyrir skriflegu tjáningarþörfina í stuttum lýsingum á hvað ég er að gera eða pæla. Svona er þetta. Til að vera memm þar bjó ég til smá "fan"-síðu á fésbókinni sem hægt er að skrá sig á og fá allar músíkbrasupplýsingar frá mér beint í æð. Endilega gerist aðdáendur mínir ;), smellið hér.

En byrjum á fyrstu tónleikunum í tónleikahrinunni minni, smá fréttatilkynning:

(Hallveig Rúnarsdóttir)

(Camilla Barratt-Due)

(Hljómsveit Hafdísar á Akureyri 2007, f.v. Grímur Helgason, Steinunn Gyðu- Og Guðjónsdóttir, Hafdís Bjarnadóttir, Kristín Þóra Haraldsdóttir, Magnús Trygvason Eliassen, Sandra Ósk Snæbjörnsdóttir, Ragnar Emilsson)

Fimmtudaginn 15. október mun Hljómsveit Hafdísar með rafgítarleikaranum og tónskáldinu Hafdísi Bjarnadóttur í fararbroddi leika á Múlanum, Caffé Kulturé, Hverfisgötu. Sérstakur gestur mun leika með hljómsveitinni á tónleikunum, þ.e. norski harmonikkuleikarinn Camilla Barratt-Due, beint frá Berlín í boði norska sendiráðsins á Íslandi. Einnig mun Hallveig Rúnarsdóttir sópransöngkona syngja tvö lög með hljómsveitinni, og er það í fyrsta skipti sem söngur heyrist í Hljómsveit Hafdísar.

Camilla Barratt-Due hefur leikið á harmonikku frá sjö ára aldri. Hún hefur lært harmonikkuleik hjá nokkrum af virtustu klassísku harmonikkuleikurum heims, þ.á.m. Frode Haltli, Geir Draugsvoll og James Crabb. Hún lauk BA námi í klassískum harmonikkuleik frá konunglega danska tónlistarháskólanum vorið 2009. Einnig leikur Camilla töluvert af impróviseraðri tónlist og notar oft eigin rödd í bland við harmonikkuna. Camilla hefur mjög sérstæðan stíl þar sem hún blandar saman sérstæðri rödd sinni og harmonikkunni í frjálsum spuna í bland við fyrirfram samið efni.

Hafdís Bjarnadóttir er nýkomin heim til Íslands úr tónsmíðanámi við konunglega danska tónlistarháskólann í Kaupmannahöfn, þar sem hún m.a. blandaði saman hefðbundnum og óhefðbundnum tónsmíðaaðferðum við frjálsan spuna. Í sumar var frumflutt í Kaupmannahöfn verkið "Krónan" sem var samið að öllu leiti út frá fjármálalínuritum frá Íslensku bönkunum frá júní 2007 til janúar 2009, auk þess sem Hafdís spann frjálst yfir verkið á tónleikum í Kaupmannahöfn og London.

Hljómsveit Hafdísar var stofnuð árið 2002 og hefur síðan þá haldið tónleika hérlendis og erlendis. Hljómsveitin er síbreytileg eftir hverjir eru á landinu hverju sinni, og að þessu sinni munu leika auk Hafdísar á rafgítar Grímur Helgason á klarinett og bassaklarinett, Sandra Ósk Snæbjörnsdóttir á selló, Ragnar Emilsson á gítar og bassa, Magnús Trygvason Eliassen á trommur, Camilla Barratt-Due á harmonikku og Hallveig Rúnarsdóttir sópranöngkona. Efnisskráin er blanda af nýjum og nýlegum lögum eftir Hafdísi, önnur skemmtileg lög eftir aðra og frjáls og líflegur spuni.

Frumflutningur, síðasti kafli í krónublogginu

2009-06-06T14:06:00.001-07:00

Í dag var krónustykkið mitt frumflutt og gekk bara nokkuð vel. Allir sáttir, þ.á.m. ég. Þetta virkaði alveg eins og ég vildi að þetta virkaði. Gaman gaman.

Og núna er ég grútsybbin á hægu, ömurlegu, þráðlausu neti á farfuglaheimilinu sem við Palli, Bjarni, mamma, pabbi og Dagný systir gistum á. Á morgun förum við á Kastrup og skiptumst í tvo hópa; mamma, pabbi, Dagný og Bjarni fljúga til Íslands en við Palli til London, þar sem krónustykkið verður spilað aftur á mánudaginn. Ofsa fjör! En hér kemur restin af krónudagbókinni:

laugardagur 28. feb. 2009:

Núna er liðin rúm vika síðan ég vann síðast í krónustykkinu mínu. Klukkan er 18.39 á laugardegi og ég er að pína mig til að byrja á þessu aftur. Erfitt að byrja aftur þegar maður er búinn að vera í fríi en þannig er það nú með öll störf! Nú ríður á að halda vel á spöðunum því mig langar að klára þetta fyrir 1. apríl, gangi mér vel að standa við það. Svona er það þegar maður er með nokkur deddlæn 1. maí, þá verður maður að klára eitthvað af þessu fyrr. Mitt fyrsta verk er að finna villuna sem ég gerði frá 24.6 til 8.7. 2008. Ekkert smá pillerí að finna út úr því...en áfram með smjérið.

Nú sýnist mér að best væri að vakna kl. 6 alla morgna og vinna í krónustykkinu áður en restin af heimilismönnum vaknar. Ég held það veiti ekkert af að taka smá akkorð ef ég á að ná þessu... (innsk: Glætan spætan, mér tókst ekki að vakna kl. 6 alla daga, en mér tókst samt að klára fyrir deddlæn).

Skohh! Fann villuna og lagaði hana! Ótrúlegt hvað hlutirnir ganga stundum upp bara. En úff, hvað ég á mikið verk fyrir höndum...

Jæja, nú er ég komin heim eftir að hafa unnið ágætlega í skólanum. Á leiðinni heim hjólaði ég fram á lögregluborða og það fyrsta sem mér datt í hug var enn eitt "skyderiet". Þegar heim var komið kíkti ég á fréttirnar á netinu og komst að því að grunur minn reyndist réttur, einhver hafði skotið af byssu. Þetta er í þriðja skipti í vetur sem ég hjóla fram á nýafstaðið skjóterí, síðast fyrir ca. 2 vikum síðan. Svona segir maður víst ekki frá á blogginu fyrr en rétt áður en maður flytur til Íslands svo fólkið heima fari nú ekki að springa úr áhyggjum...

mánudagur 2. mars 2009:

Jibbí, ég er að útsetja four way close, saxófón sólí stæl! Stuð! Búin að pilla inn allar upplýsingarnar úr línuritunum og núna er næsta mál á dagskrá að föndra eitthvað ofsa skemmtilegt úr þessu. Og fátt er meira hressandi en stríðsárasaxófónsánd...

miðvikudagur 4. mars 2009:

Allt að gerast! Ég er alveg að verða búin með sjálfa músíkina og þá á bara eftir að snyrta. Ég eeeeelska tubular bells! (innskot 2. júní: Þooookkalega, sándar alltaf vel!).

fimmtudagur 12. mars 2009:

Ég er fram að þessu búin að vinna eins og vitleysingur í stykkinu mínu og er núna "búin" með það. Það þýðir að ég á eftir ca. 2-3 vikna vesenis- og snyrtivinnu. Eins og það sem ég er að gera núna: Ég er að einfalda ritháttinn á hinum ofur-snúnu rytmum sem ég er með í þessu. Hvað var ég eiginlega að hugsa, það á enginn eftir að geta lesið það sem ég skrifaði. En eftir að ég er búin að fara höndum um þetta og einfalda talninguna þá á útkoman eftir að hljóma alveg eins nema hvað spilararnir verða ekki með hausverk af útreikningum. Gott mál...

Fjórði og síðasti æfingadagur

2009-06-05T03:41:00.000-07:00

Í dag var síðasti æfingadagurinn og jafnframt fyrsta skipti sem stykkinu mínu var rennt frá upphafi til enda. Líka í fyrsta skipti sem ég spila með og frumflutningurinn er á morgun! En - það gekk ofsa vel og ég fékk rosa gott fídbakk frá mörgum. Ókei, ég sé að hljómsveitin var að labba fram hjá til að fara í hádegismat, sem þýðir að ég vil líka hádegismat. Skelli inn næstsíðasta dagbókarskammti, síðasti skammtur kemur á morgun:

þriðjudagur 10. feb. 2009:

Þvílíkt endemis pillerí!! Núna veit ég nákvæmlega hvað ég ætla að gera og hvernig ég vil hafa þetta og þá væri gott að geta skrifað og pikkað jafn hratt og ég hugsa. Algjör jarðýtufílíngur, nema hvað ég vildi að ég gæti unnið á tíföldum hraða. Alla vega, þetta lítur ágætlega út sýnist mér. Og ég held það sé alveg málið að nota trommusett, stuð! Og Hans Abrahamsen kom með nokkrar góðar hugmyndir varðandi spilatækni, ekki síst í flautunni. Veit ekki hvort manneskjan getur spilað það eða hvort þetta er bara fyrir einhver skronster. Spurningin er hvort plain flauta verður of "snyrtileg" eða hvort við þurfum smá scruffyness. Kemur í ljós, fyrst þarf ég að pilla allar þessar upplýsingar inn í Síbbann, jimundur...

miðvikudagur 11. feb. 2009:

Ég ætla að pilla inn allt slagverkið í akkorði í dag og þegar það er búið ætla ég út í snjóinn og sólina með Bjarna!

fimmtudagur 12. feb. 2009:

Ég ætla að láta píanóleikarann hafa skuldatryggingaálagið í vinstri hönd og OMXI 15 í hægri :). En núna er ég að pikka gengi íslensku krónunnar gagnvart þeirri dönsku inn í pikkolóflautuna.

föstudagur 13. feb. 2009:

Skrýtið með þetta stykki...ég er að raða "tölustöfunum" úr OMXI 15 á milli þriggja hljóðfæra eftir systemi sem byggir á því að ég sé heppin, en einhvern veginn hefur þetta tilhneygingu til að reddast! Ég vona að það sama gildi um bankakreppuna á Íslandi, þ.e. að þetta reddist bara.

fimmtudagur 18. feb. 2009:

Í gær var ég að skipta skemmtilegum takttegundum eins og 14/16 og slíkt upp í minni Stravinskýlegri einingar. Og núna er ég að fara að pilla það inn í Síbelíus. Gaman.

Þriðji æfingadagur, krónublogg heldur áfram...

2009-06-04T02:13:00.000-07:00

Æfingin í gær gekk ótrúlega vel miðað við hvað þetta var kaótískt í fyrradag. Mér líst bara vel á hvert þetta stefnir, og enginn kvartaði yfir neinu núna :). Í dag átti að æfa stykkið mitt og ég átti að improvisera með á gítarinn. Sökum þess vaknaði ég kl. 6 af því ég gat ekki sofið fyrir stressi, en svo þegar á hólminn var komið var æfingum á mínu stykki frestað til morguns. Sem þýðir að ég get tekið mér frí með Bjarna og familíunni, sem hér er komin til að hlusta og passa. En áfram með krónubloggið:

þriðjudagur 3. feb. 2009:

Ég er búin að vera að finna leiðir til að nota OMXI15. Það er rosa fall þar í október (hrunið), eða hreinlega dettur þetta bara út eftir það ef ég skil það rétt. (Leiðréttið mig, greiningardeild, ef ég fer rangt með). Ég stenst auðvitað ekki freistinguna að láta þetta stjórna tónhæð, það er bara of freistandi til að sleppa því, þ.e. hæsta tala = hæsti tónn og öfugt. En núna ætla ég að nota hryn talnanna, þ.e. hryninn sem kemur þegar maður les þær upp á íslensku, sem rytmískt element. Ég heyri t.d. fyrir mér massamikið slagverk í því samhengi og eitthvað samhangandi í öðrum hljóðfærum (innskot: endaði aðallega sem fiðla og selló, en líka annað).

Jæja, og þá er bara að vinda sér í "skrifstofuvinnuna" að þýða tölur yfir í tónlistarmótíf, doldið tölvuleg vinna. Christos hinn gríski æfir sig á píanó hér bak við mig. Tónsmíðanemateketillinn er búinn að hita vatn og ég fæ mér te. Kósý.

(Stuttu síðar:) Ég hitti slagverksnemann Takis sem trommaði fyrir mig smá bút af OMXI15. Ég er sátt. Held áfram að vinna og hlusta á Caput og Þursana á meðan til að stytta mér stundirnar. Snilldardiskur!

miðvikudagurinn 4. feb. 2009:

Ókei! Í tíma hjá Bent Sørensen reiknuðum við út að það tæki 4 klst. að spila stykkið mitt ef ég held áfram með þessum hætti. Já, neinei! Núna tek ég færri "sýni" úr línuritunum til að stytta stykkið.

fimmtudagurinn 5. feb. 2009:

Hugmynd frá Palla: Nota kauphallarbjölluna í NY. Kannski ég byrji bara stykkið á því (sem ég og gerði, innsk.). Ég ætla að klára OMXI15 í dag. Þvílíkt puð!!!

(Seinna sama dag): Úff, ég er orðin alveg soðin í hausnum! Og núna er ég farin að hafa andúð á sumum tölum af því það er svo leiðinlegt að skrifa þær í nótur! En einhvern veginn grunar mig að leiðinlegustu og seinlegustu tölurnar eigi eftir að sánda best. (innsk. já! ég gleymdi alveg að taka eftir því á æfingunum. Fylgist með því á morgun...þ.e. ef ég get munað hvaða tölur voru hvað). Geir Harðar, Meredith Monk og Little Red Suitcase stytta mér stundirna í æpoddinum svo ég fari ekki yfir um.

(Enn seinna sama dag): Úffff, ég er að drepast úr leiðindum!! Bring in the big guns; The Greenhornes, Kenny Rogers, Blood Sweat and Tears, Focus, John Barry, Joni Mitchell, Neil Young í æpoddinn.

Annar æfingadagur, krónublogg heldur áfram

2009-06-03T03:49:00.000-07:00

Í dag er annar æfingadagurinn með Esbjerg ensemble. Fyrsti dagurinn var þrunginn spennu eins og oft vill verða í fyrstu tilraun, og ég er bókstaflega með í maganum, því eftir kortér verður stykkið mitt æft. Úff, stressistressistress! En hér heldur dagbókin áfram:

miðvikudagur 28. jan. 2009:

Í dag ligg ég yfir talnarunum og skrifa þær í nótur eftir ákveðnu systemi. Ef ég kynni forritun þá gæti ég sjálfsagt látið tölvu gera þetta, en ég kann ekki forritun. Æ, ég hefði átt að taka æpoddinn minn með (er uppi í skóla). Stundum þegar ég segi við fólk að stundum hlusti ég á tónlist þegar ég er að semja allt aðra tónlist, þá verður það hissa. En það er akkúrat á svona mekanískum handavinnu- og heilavinnumómentum sem væri gott að hafa eitthvað að hlusta á til að gera þetta skemmtilegra. Akkúrat það sem ég er að vinna með núna er ekki svo mikil eyrnavinna, en hún verður það síðar.

Úff, þegar ég er búin með talnarununa niður síðuna ætla ég að verðlauna mig með því að standa upp og fara á klóið!

fimmtudagur 29. jan. 2009:

Samkvæmt ráðleggingum frá greiningardeild (Nýja?) Glitnis er ég að búa til hljóma úr tölum um skuldatryggingaálab bankanna :). Lágt skuldatryggingaálag er djúúúpur tónn en hátt háááááár tónn! Palli stakk að mér þeirri pælingu að djúpi tónninn gæti verið þægilegur en hái óþægilegur, af því það er gott að skuldatryggingaálagið sé lágt ;).

mánudagur 2. feb. 2009:

Ég sit og rýni í tölur um skuldatryggingaálagið og færi það yfir í nótur. Lægst er skuldatryggingaálagið dýpsta C ið á píanóinu en hæst er það hæsta Dís-ið á píanóinu. Núna er ég stödd í byrjun apríl 2008 og er ennþá frekar neðarlega í F-lyklinum. Ég velti fyrir mér hvernig fólkinu sem tók saman þessar tölur leið. Leið þeim einhvern veginn eins og mér líður núna? Alla vega þá líður mér svipað og þegar ég horfði á Psycho. Ég veit að eitthvað rooosalegt gerist seinna og tölurnar "versna og versna" smátt og smátt. Spennan magnast, og ég veit að áður en langt um líður verða tölurnar orðnar óbærilegar og bankahrunið skellur á (með hæstu tónum píanósins)!

...en á meðan spennan magnast og ég breyti tölum í tónlist á frekar systematískan hátt þarf ég eitthvað mér til skemmtunar. Ég hlusta á ýmsa músík í æpoddinum um leið og ég reikna og skrifa, eins og Can, CSN og Y, Gentle Giant og Gerard Grisey (eins og sést er ég að fikra mig stafrófsröðina í æpoddinum). Jæja, áfram með skuldatryggingaálagið...

Tónsmíðablogg, here we go :)...

2009-06-02T10:34:00.000-07:00

Jæja, þá er komið að því! Ég lofaði bloggi um tónsmíðaferlið í stykkinu mínu sem verður flutt á laugardaginn nk. Verkið heitir "Krónan" og er samið upp úr línuritum sem hafa eitthvað með bankahrunið og það allt saman að gera. Næstu daga mun ég birta á hverjum degi brot úr dagbókinni. Síðasta dagbókarbrotið mun birtast á laugardaginn, en þá verður stykkið frumflutt í Köben.

Ég biðst velvirðingar á að það birtist ekkert í gær, ég var netlaus á eyju sem heitir Fanø. En nýjustu fréttir eru að æfingar eru hafnar og ganga bara nokkuð vel sýnist mér, en jiminn ég er ekkert að skrifa eitthvað skítlétt sé ég. Og það voru alveg líflegar umræður hérna áðan um rithátt og vesen og ég veit ekki hvað og hvað, en ég hef fulla trú á hljómsveitinni og stjórnandanum. Ofsa spennó. En - hér eru fyrstu dagbókarfærslur um gerð verksins. Geriðisvovel:

Forsagan:

Síðasta haust datt mér í hug að búa til tónverk úr fjármálalínuritum og gengi íslensku krónunnar gagnvart þeirri dönsku. Þetta hljómaði þá og hljómar enn á mig eins og ágætis hugmynd því þessi gengisdans er búinn að lita líf okkar í eitt og hálft ár, þ.e.a.s. síðan við fluttum til Köben í júlí 2007.

Ekki óraði mig þó fyrir því að þróun íslensku krónunnar (og þ.a.l. tónverksins líka ;)) ætti eftir að vera jafn dramatísk og raun bar vitni. Í október 2008 náðu línuritin (og tónverkið væntanlega með) hámarki þegar bankahrunið varð. Og það óvenjulega gerðist með gengi krónunnar að það var fryst og stóð þ.a.l. í stað sem þráðbein lárétt lína! Mjög spennandi fyrir tónverkið.

Þar sem ég var að vinna í öðrum verkum á þessum tíma þá lét ég mér nægja að safna upplýsingum og hugsa um verkið. Palli gaukaði að mér ýmsum línuritum og pésum sem hann las á netinu (enda meira inni í svona hlutum en ég). Kom þar sterkust inn greinargerðin "Fjármálakreppur eiga sér upphaf og endi" frá greiningardeild Glitnis frá október 2008. Seinna skrifaði ég greiningardeildinni bréf og bað þau um tölur, m.a. hvað varðar skuldatryggingaálag og viðskiptajöfnuð. Sá sem svaraði mér var hinn liðlegasti og jákvæðasti og kom með góðar hugmyndir varðandi notkun á t.d. skuldatryggingaálaginu í tónverkið, þ.e. að nota það í hljóma þar sem þetta væru tölur frá þremur bönkum. Góð hugmynd :)!

En það var fyrst í dag, 26. janúar, sem ég settist niður og byrjaði að vinna úr upplýsingunum, þ.e. byrjaði formlega að semja! Og þvílíkur dagur!:

mánudagur 26. jan. 2009:

Í dag prentaði ég út töflur um íslensku krónuna gagnvart dönsku krónunni frá 19.7.07 til dagsins í dag. Prentarinn söng svo skemmtilega á meðan hann prentaði út, þannig að ég skrifaði niður í nótur hljóðið sem kom úr honum. Ég ætla að nota þetta sem efnivið þegar ég fer að vinna úr töflunni :). (Innskot: Svo henti ég þessari hugmynd út síðar og notaði hana ekki).

Eftir það settist ég niður við tölvuna og pikkaði upp mótmælahljóð úr rúv-fréttum frá 21. jan sl. Ég transkriberaði hljóðum í dollum og dósum, bílflautum, lúðrum og dómaraflautum. Svo prófaði ég að fylgja "forminu" í fréttatímanum til að búa til form fyrir mig, þ.e. stundum var verið að taka viðtal við einhvern inni í Alþingishúsinu og þá heyrðust ákveðin hljóð. Svo var verið að taka viðtal við einhvern fyrir utan stjórnarráðið og þá heyrðust öðruvísi hljóð. Svo var skipt á milli þessara tveggja staða sem þýðir að ég skipti líka á milli þessara tveggja hluta (A og B kaflar :p). (Henti þessu formi út síðar líka, en notaði hljóðin).

Vinnudeginum lauk á því að ég tók ýmis línurit og súlurit og dró í gegn á nótnapappír úti í glugga. Þetta eru frekar dramatísk rit þannig að rosalegustu línuritin spanna alveg 3-4 nótnalínur. Ég er ekki alveg búin að sjá út hvað ég geri við þetta en þetta lítur skemmtilega út. Og svo var frábært súlurit yfir skuldir og eignir heimilianna frá 1998-2008 sem ég dró í gegn fyrir píanó. Eign og hrein eign lentu í hægri hendi í g-lykli en skuldir í vinstri í f-lykli. Þetta gætu verið einhvers konar clusterar, en ég á eftir að vinna nánar úr því. (Henti þessu út líka. Svona eru tónsmíðar, maður byrjar einhvers staðar en notar kannski ekki það fyrsta sem manni dettur í hug).

Í dag fór ríkisstjórnin frá og mótmælendur fögnuðu í miðbænum.

þriðjudagur 27. jan. 2009:

Ég sit og skoða tölurnar sem ég prentaði út í gær, þ.e.a.s. þessar sem sungu svo fallega í prentaranum. Þetta eru tölur um ikr. gangvart dkr. frá 19.07.07 til 26.01.09. Þarna sé ég að fyrir eina íslenska krónu gat ég keypt 0,09095 danskar krónur fyrir einu og hálfu ári en í dag (eða í gær réttara sagt) fæ ég 0,04672 danskar krónur fyrir eina íslenska. Sem þýðir gróflega að ég þarf að borga um 2 íslenskar krónur fyrir það sem ég gat keypt fyrir 1 íslenska krónu fyrir einu og hálfu ári.

Ég skoða tölurnar með tilliti til aukastafa. Aukastafirnir eru á bilinu 3-6, oftast 6. Svo tek ég eftir því að með reglulegu millibili endurtaka tölurnar sig nákvæmlega eins. Það er sem sagt mynstur í þessu; þ.e. að sama talan kemur stundum þrisvar í röð. Þá fatta ég að þetta eru auðvitað helgarnar, þ.e. föstudagur, laugardagur og sunnudagur (engar gengisbreytingar um helgar). Svo á síðustu blaðsíðunni kemur sama talan sex sinnum í röð. Þetta eru jólin.

Mér finnst eins og fortíðin rifjist upp fyrir mér þegar ég renni í gegn um þessar tölur sem mótast af einhverju leiti af virkum dögum, frídögum og stórhátíðum. Skrýtið að tölur geti haft tilfinningaleg áhrif.

Mér finnst líka eins og ég finni tónhæðina síga eftir því sem tölurnar lækka. Ég hugsa að ég reyni að nota fjölda aukastafa og eitthvað slíkt til að ákvarða hvernig ég læt tónhæðina lækka skipulega? Sjáum til, best að halda áfram...

Hvað ætli ég sé lengi að "spila" í gegn um eitt og hálft ár? Ég þarf að muna eftir að taka tímann á því þegar ég er búin að skrifa allt gengi ikr. gagnvart dkr. niður. Spurning um að hafa mismunandi hraða á því?

Ég er nú meiri nördinn! Ég nýt þess að fara í gegn um tölurnar og heyra þær fyrir mér músíklega. Vá, og stundum eru svo fallegar breytingar frá tölu til tölu, eins og t.d. frá 42591 yfir í 42251endurtekið þrisvar, eða frá 43548 til 43478 endurtekið þrisvar. Fagurt :).

(Innskot 2. júní 2009: Þessar tölur nota ég t.d. mjög mikið í pikkolóflautunni. Ofsa skemmtó).

Sinfó á mánudaginn, OPINN viðburður!

2009-05-21T12:59:00.000-07:00

Ókei, það var smá rangfærsla í síðustu færslu. Sinfódæmið með prjónastykkinu mínu er OPINN VIÐBURÐUR, allir velkomnir. Sjá fésbókartilkynningu sem hljóðar svona:

Mánudaginn 25. maí efnir Sinfóníuhljómsveit Íslands til nýbreytni í starfi sínu og býður til tónskáldastofu í Háskólabíói kl. 9:30. Um er að ræða vinnustofu þar sem leikin verða ný hljómsveitarverk eftir þrjú íslensk tónskáld og í kjölfarið fá þau athugasemdir og leiðbeiningar frá Rumon Gamba, aðalstjórnanda SÍ, og hljóðfæraleikurum sveitarinnar. Markmiðið er að þjálfa ung íslensk tónskáld í að skrifa fyrir hljómsveit, en oft reynist ungum tónskáldum erfitt að fá reynslu á þessu sviði þar sem tækifærin eru fá og samkeppnin mikil. Í kjölfarið á vinnustofunni fá öll tónskáldin færi á að endurskoða verk sín og í september mun SÍ hljóðrita verkin þrjú fyrir Ríkisútvarpið.

Verkin sem valin hafa verið að þessu sinni eru: Dreaming eftir Önnu Þorvaldsdóttur, Þórdísarhyrna eftir Hafdísi Bjarnadóttur og Norður eftir Pál Ragnar Pálsson. Öll eru tónskáldin fædd árið 1977 og stunda nám við tónlistarháskóla erlendis, Anna við Kaliforníuháskóla, Hafdís við Tónlistarháskólann í Kaupmannahöfn og Páll Ragnar við Tónlistarháskólann í Tallinn í Eistlandi. Tónskáldastofan stendur frá kl. 9:30-12:50 og er aðgangur ókeypis og öllum opinn.

Tónskáldastofan er samstarfsverkefni SÍ og RÚV - Rásar 1.

Þannig að, þeir sem vilja hitta mig þann 25. maí nk. geta bara mætt í Háskólabíó kl. 9:30 :). Eða þeir sem vilja ekki hitta mig geta bara falið sig aftast til að heyra tónlistina og læðst svo út þegar ég sé ekki til...

Allt á skrilljón!

2009-05-20T00:59:00.000-07:00

TÓNLEIKAR Í KÖBEN OG LONDON:

Jæja, nú er allt á skrilljón hjá mér og okkur. Palli vinnur eins og hestur og ég er að vinna í ýmissi músík, plús að auglýsa tónleika sem verða brátt í Köben og London. Þið sem eruð með fésbók getið flett upp "Come and hear my new financial crisis piece, "Krónan", in Copenhagen" og "Come and hear my new financial crisis piece, "Krónan", in London". Endilega sendið út og suður ef þið nennið.

En beisikklí þá stendur á fésbókinni:

I've written a piece based on graphs and charts from the Icelandic banks, starting on the 19th of July 2007 and ending on the 26th of January 2009. The piece will be performed by Esbjerg Ensemble (they represent the reality), and I will improvise over the whole thing on my electric guitar (I will be me, dealing with reality).

The piece starts where I move to Denmark and the Icelandic króna (e.g. the national currency of Iceland) is rated very high, and after that it goes downhill until it crashes in October 2008. After that the piece changes, and our lifes too, maybe...?

We will also hear pieces by Charlie Piper, Laura Bowler, Nick Martin, Li-Ying Wu and Anders Monrad. Conductor: Christopher Austin

See also here: http://www.ram.ac.uk/events/Pages/default.aspx

P.S. Frá og með 1. júní nk. verður dagbók (á íslensku) um gerð verksins birt á blogginu mínu á hverjum degi fram að tónleikum. Fylgist með: http://www.hafdisgitar.blogspot.com

Tónleikarnir í Köben eru í Det kongelige danske musikkonservatorium, nánar tiltekið í sal sem heitir Studiescenen, 6. júní kl. 16:00, kostar ekkert inn.

Tónleikarnir í London eru í The Royal Academy of Music, nánar tiltekið í sal sem heitir Duke's Hall, 8. júní kl. 19:30, kostar 6 pund inn.

Ókei, ég veit það eru allir komnir með ógeð á krepputali, neikvæðni og sögum af fólki sem er á hausnum. En ég lofa því að þetta verða ekki þunglyndistónleikar, þvert á móti. Ef umfjöllun fjölmiðla um kreppuna er yfirleitt þunglyndisleg, þá er stykkið mitt kannski aðeins meira eins og Baggalútur (vona ég). Samt ekkert slapstick..æ, erfitt að útskýra. En ég mæli sérstaklega með þessu ef fólk er með ógeð á hefðbundnu krepputali.

BRJÁLAÐ AÐ GERA:

Hihi, einhvern tímann skrifaði ég smá pistil um það þegar blogg er notað eins og sími, en núna virðist ég vera að nota bloggið mitt eins og auglýsingu.

Eeeeníveis, eftir rúma viku fer ég til Esbjerg að æfa stykkið ásamt Esbjerg Ensemble og stjórnandanum Christopher Austin. Þetta er í fyrsta skipti sem ég spila á gítar með stjórnanda, nema kannski ef frá er talið þegar ég spilaði með í stykki eftir Steina og Palla þar sem þeir stjórnuðu með skiltum og fingrum. Þegar ég segi fólk að þetta sé í fyrsta skipti sem ég spila með stjórnanda, þá fæ ég til baka rosa hissa svip og frasann: "Er Chris fyrsti stjórnandinn þinn??!?!!". Þá veit ég ekkert hvernig mér á að líða, vona að þetta sé ekki eins og í gömlum þöglum drakúlamyndum þegar þorpsbúar segja við gaurinn: "Ertu í alvörunni að fara upp í kastala Drakúla??!?!?!"

En áður en þetta allt saman gerist þarf ég að:

1) Taka til í ÓENDANLEGRI hrúgunni í íbúðinni okkar, pakka öllu í kassa og senda á skip!
2) Ganga frá öðrum lausum endum fyrir flutninginn til Íslands.
3) Koma mér í form á gítarinn svo ég sökki nú ekki með Esbjerg Ensemble.
4) Vinna ódauðlegt raftónlistarstykki.
5) Leggja lokahöndina á ódauðlegt orgelstykki.
6) Vinna í tónlist fyrir danssýningu.
7) Ala Bjarna litla upp og passa að hann, og við hin líka, fái nógan svefn og hollan mat.

og síðast en ekki síst:

8) Skreppa aðeins til Íslands og æfa með Sinfó.

SINFÓ:

Já, Sinfó er með e.k. tónskáldastofu þar sem þau munu æfa stykki eftir mig, Pál Ragnar og Önnu Þorvalds. Rooosa spennó. Fyrir þetta ætla ég að hoppa til Íslands í rúman sólarhring. Og áður en einhver fer að mæla sér mót við mig þá vil ég láta vita að þessi rúmi sólarhringur er planaður í klessu! Þannig að, þeir sem eru ekki flæktir í það plan verða að bíða til 18. júní, þá er ég endanlega komin heim!!! Hlakki hlakk.

En - stykkið sem Sinfó er að fara að æfa er stykki sem ég samdi fyrir ári síðan og er búin að endurskoða og snyrta í vetur. Ég man að ég skrifaði einhverjar færslur fyrir ári þar sem ég var voðalega dularfull með þetta stykki mitt, ég vil ekki ljóstra of miklu upp á meðan ég er að semja, en þegar stykkin eru komin á koppinn þá er það nú í góðu lagi. Þannig að hér kemur leyndóið ógurlega:

Þetta er verk sem er samið upp úr prjónauppskrift. Ég tók 12 umferðir af prjónauppskrift fyrir sjal sem heitir Þórdísarhyrna, (uppskriftina gerði Sigríður Halldórsdóttir upp úr gömlu sjali, sjá bókina Þríhyrnur og langsjöl) prjónaði þær og notaði prjónið og uppskriftina til að gera fimm og hálfrar mínútu stykki fyrir sinfóníuhljómsveit.

Beisikklí þá "þýddi" ég þetta hér...:

...og þetta hér...:

...yfir í sinfóníutónlist.

Eftir því sem ég best veit er tónskáldastofan lokaður viðburður.

Jæja, nóg komið af prómói. Ég hef mikið hugsað um það undanfarið hvað fésbók og mæspeis og internetið allt er mikill hafsjór af viðburðum og "auglýsingum" og slíku, og stundum fær maður nett nóg barasta. Ég reyni að láta bloggið mitt standa utan við allt slíkt og vera bara skemmtilesningu, en...sorrý, elskurnar, morguninn í morgun er auglýsingamorgunn hjá kellingunni.

En eins og ég sagði hér að ofan þá verður dagbók um kreppustykkið mitt birt frá og með 1. júní. Fram að því hef ég á tilfinningunni að ég verði bara á haus að reyna að klára allt sem ég þarf að klára, þannig að ég efast um að ég bloggi mikið fyrir 1. júní nk.

Jæja, best að gíra sig upp í að semja raftónlist. Kannski þetta vídeó geti komið mér í rétta stemmningu:

Kreppuföndurhorn Hafdísar

2009-04-21T11:35:00.000-07:00

Þessa dagana er ég að vinna í mastersritgerðinni minni, sem þýðir auðvitað það að ég er skapandi á öllum öðrum sviðum en akkúrat því!

FÖNDURHORN HAFDÍSAR:

Hér má sjá mynd af mér í gulum kjól að semja verkið sem mastersritgerðin snýst um:

Þessi guli kjóll var orðin doldið vel slitinn og ég gat eiginlega ekki látið sjá mig í honum lengur. En þar sem þessi kjóll var mér smá kær þá langaði mig til að endurvinna hann og búa til eitthvað nýtt handa mér úr honum. Þannig að ég heklaði körfu. Blómið er heklað úr Bónus-plastpoka:

Og svo datt mér í hug að búa til spöng með blómi. Ég heklaði palíettuband samhliða "bandinu" (ég klippti kjólinn niður í eina samfellda ræmu):

Sem sagt: Kreppu- og endurvinnsluföndur sem kostar varla neitt. Þess má geta að allt sem þurfti að festa festi ég með límbyssulími.

BÚIN AÐ KJÓSA:

Ég kaus í dag í sendiráði Íslands í Köben. Gaman að því að á sama tíma var gamall nágranni úr Eskihlíðinni að kjósa líka, en ég hafði ekki græna að hann byggi í Köben. Þegar við vorum spurð um síðasta lögheimili á Íslandi þá skrifuðum við sama húsið!

Það borgar sig að kjósa því ég komst að því að það er hægt að kaupa alls konar gott nammi og malt í menningarhúsinu sem er í sama húsi! Ekkert smá æðislegt! Og svo komst ég að því að það er hægt að kaupa íslenskan fisk og alls konar þjóðlegt gamms í búð á Amager. Flott að komast að þessu svona rétt áður en ég flyt heim ;).

RITGERÐ:

Ritgerðin mín er á panikk-stiginu. Það gengur örugglega vel, en ég á erfitt með að komast almennilega á flug og í dag náði ég rétt að finna út úr hvað ég vildi finna í bókum og svo finna á netinu hvaða bækur gætu mögulega gagnast (eða ekki gagnast, enginn veit). Ég blokkeraðist þegar ég ætlaði að fara að gramsa í gagnasafni svarta demantsins (þjóðarbókhlöðunnar) og át heilan poka af fylltum appolólakkrís (namm)! Gott að ég var með almennilegt nammi við höndina ;). Eftir nammiátið endaði ég á gamla góða Gegni og gramsaði aðeins þar, og núna er ég aðeins nær því að vita kannski hverju ég er að leita að. Ofsa gaman eða þannig...

...en þetta mjakast og ég ætla rétt að vona að ég nái að klára fyrir 1. maí!!!

P.S. Ég editera stutta bloggfærslu 100 sinnum áður en ég er semi-ánægð! Hvernig á ég að geta skrifað almennilega ritgerð um efni sem ég samdi á íslensku, fór yfir með kennarandum á dönsku og skrifa svo um á ensku!!! Ég er endalaust lengi að skrifa hverja setningu og er samt ekki ánægð! PANIKKKKK!!!

Gleðilega páska!

2009-04-12T05:07:00.000-07:00

Gleðilega páska öll sömul!

Ég sit uppi í skóla og reyni að einbeita mér að mastersritgerðinni minni en það gengur ekkert allt of vel. Og þó - þetta er nú kannski aðeins að mjakast í gang.

FAMILÍUFRÉTTIR:

Í morgun átum við vísitölufjölskyldan páskaegg, namminamm! Bjarni var nú bara mjög sívílíseraður í egginu sínu, át passlega mikið súkkulaði og nammi en gerði mun meira af því að leika með ungann. Móðirin aftur á móti át næstum því heilt nóaegg númer fjögur á einum klukkutíma, ekki alveg jafn sívílíserað! Guðni bjargaði sínu eggi frá bráðnun í sólinni úti í glugga en Palli var sniðugur og sneri sínu eggi þannig að það leit út eins og hann væri ekki búin að borða neitt (át þeim meigin eggsins sem sneri frá mér og að honum) þannig að ég get ekki bloggað um það hversu mikið hann át. Jimundur, og svo eigum við annað eins magn eftir þegar þetta verður uppétið (sjá fyrri færslu).

Annars erum við búin að hafa það gott, familían. Reynar erum við foreldrarnir bæði doldið bundin yfir vinnu og skiptumst doldið mikið á að bralla með bræðrunum, en mér sýnist allir fá eitthvað við sitt hæfi þó það sé kannski erfitt að hafa stuð fyrir einn þriggja ára, annan fimmtán ára og tvo vinnualka 24/7. En þannig er nú líka bara lífið í hnotskurn ekki satt, pásur á milli þess sem maður brallar eitthvað brilljant stuð.

Meðal þess sem við erum búin að brilljant stuðast þá fór ég með grísina á Bakkann í gær, það var nokkuð kósý. Þarna kom reyndar aðeins inn að það getur verið smá mál að samræma aktivitet fyrir þriggja ára, fimmtán ára og þrjátíuogeins árs því sömu tækin henta ekki alveg Bjarna og Guðna. Og sum tækin eru líka þess eðlis að mann langar kannski ekki einn í þau, þannig að stóru rússíbanarnir fengu að vera í friði að þessu sinni en verða tæklaðir seinna (pant ekki ég samt!!!).

Allir hafa þó gaman af að fá ís:

Á Bakkanum keyptum við gasblöðru handa litla grís, ekki síst til að halda honum nógu uppteknum við eitthvað svo hann hlypi ekki í burtu. Fyrir valinu varð þessi fína Leiftur-blaðra (Leiftur er kappakstursbíll með augu og munn, hann er í algjöru uppáhaldi hjá Bjarna að Spædermanni ólöstuðum). Þegar við vorum næstum því komin heim af Bakkanum slitnaði bandið í Leiftri sem sveif í burtu hátt upp í bláan himininn og sást ekki meir. Bannsett danska rokið! Ég held ég hafi sjaldan séð Bjarna litla jafn sorgmæddan yfir óréttlæti heimsins (enda er hann mjög heppinn með sína stöðu í lífinu almennt held ég að óhætt sé að fullyrða og í þeim skilningi bara gott að þurfa ekki að díla við stærri sorgir en horfnar gasblöðrur. 7-9-13, þori ekki að segja annað).

Bjarni og Leiftur á meðan allt lék í lyndi. Myndin er tekin á bar á Bakkanum sem er breyttur tveggja hæða Lundúnastrætó:

Eftir að sorgin yfir Leiftri hafði dvínað skemmtum við okkur við trúðakúnstir. Ég bjó til blóm...:

...og Guðni bjó til svan:

Erum við ekki ágætis trúðsefni, við Guðni? Kannski get ég fengið vinnu við að skemmta í afmælum ef ég fæ enga aðra vinnu í haust. Og þetta gæti verið ágætis valkostur fyrir Guðna eftir grunnskólann, þ.e. að fara í "clown college" ;).

Talandi um trúðafílíng: Ég keypti mér pokalegar buxur um daginn. Þegar ég mátaði þær heima og sýndi Palla þá sagði hann að ég liti út eins og fíll í þeim. Næsta dag fór ég og keypti aðrar fílabuxur í viðbót. Fílar eru jú doldil krútt, ekki satt?!

LISTAMENN ERU ALLTAF AÐ TJÁ TILFINNINGAR SÍNAR MEÐ LISTSKÖPUN SINNI...:

...eða það er mýtan. Ég verð samt að játa það að eftir að hafa orðið öskuill við Bjarna í morgun eftir að hann var að henda sandi í bláókunnugan kall úti í garði, þá var það síðasta sem mig langaði að tjá mig um af hverju ég samdi eitthvað tónverk svona eða hinsegin. Og rosa mikil tjáning í því að senda eyðublöð út og suður eða reyna að púsla saman formi á ritgerð eða slást við ljósritunarvélar og prentara eða reyna að útskýra fyrir fólki að ég geti eiginlega ekki tekið að mér fleiri verkefni sem ég fæ ekki greitt fyrir af því ég þurfi að fara að fá mér "alvöru" vinnu til að sjá fyrir mér og mínum (helst að reyna að koma þessu frá sér á þann hátt að fólk móðgist ekki heldur taki upp veskið með bros á vör án þess að hætta við það sem það var að biðja um, híhíhí).

Plús að þegar ég settist niður og fór að hugsa um hvað á að standa í þessari ritgerð þá var mér mun ofarlegar í huga að fara á netið og finna skýringar á því af hverju sonur minn hendir sandi í fólk á annað borð (sem ég botna lítið í), og hvernig ég get hjálpað honum að hætta því, og svo endalausar pælingar um hvort ég sé of stressuð að barnið mitt sé ekki 100% fullkomið, eða ekki nógu stressuð á því (miðað við ásökunaraugnaráðið sem maður fær gjarnan frá fólki sem veit greinilega betur en ég hvernig á að ala upp), og pælingar um hvort það sé hluti af því að vera grislingur að maður er doldill villimaður en það þýði ekki að hann verði það þegar hann giftir sig, eða verður hann alltaf villimaður, en hann er ekki villimannslegur þegar hann segir "takk fyrir hafragrautinn" og heldur á diskinum sínum fallega inn í eldhús, en kallinn sem fékk sand í sig sér það ekki og heldur að barnið mitt sé villingur og ég sé ömurleg mamma, og hvort ég hafi skemmt allt fína uppeldið með því að hafa orðið öskuill því samkvæmt bókinni er það ekki málið heldur á maður að vera ákveðin sem ég er eiginlega alltafoghvenærermaðuraðgeraoflítiðeðakannskiofmikið?þannigaðbarniðmannsmyndiónæmigegnuppeldisaðferðunum occcch! svooo! framvegis! og framvegis! og framvegis...

ENÍVEIS!!! Þegar maður er listamaður (eða bara hvaðsemermaður ef út í það er farið) þá þarf maður að bæla niður tilfinningar sínar til að geta sinnt listsköpun sinni, eða það er alla vega niðurstaða mín í dag þar sem ég píni mig til að halda áfram með mastersritgerðina. En ókei allt í lagi, stundum er listsköpun voða mikil tjáning og útrás...en, eins og Bjarni segir stundum: "Ekki í dag".

Sem sagt, áfram með smjörið í korter, og svo heim að kósýast með villimanninum, helgargeltinum og vinnualkanum jafnvel með viðkomu á páskaskæpi með ættingjunum. Þegar öllu er á botninn hvolft þá er gaman að vera til og fást við verkefnin sem fylgja því!

Gleðilegt páskafrí!

2009-04-04T13:03:00.001-07:00

Hér má sjá allt gúmmelaðið sem kom upp úr ferðatöskunni hans Guðna en hann flaug til okkar í dag. Jammsið og mogginn er í boði ömmu á Stokkseyri, ömmu á Garðsstöðum og fjölskyldunni á Vesturbraut:

Við erum að tala um 13 páskaegg, þar af 12 súkkulaðiegg. Af þessum eggjum öllum munum við familían "aðeins" éta níu stykki, en hin fara til páskaeggjaþyrstra Íslendinga í innsta hring okkar.

Í FRÉTTUM ER ÞETTA HELST:

Guðni er mættur á svæðið til tveggja vikna dvalar. Það er stuð.

Tónsmíðarnar eru aaaalveg að klárast í bili. Alltaf tekst þó Hans, aðalkennaranum mínum, að finna eitthvað sem hann vill merkja með rauðu, en þetta er á lokasprettinum.

Um leið og tónsmíðarnar eru búnar ætla ég að skrifa mastersritgerðina mína milli þess sem ég páskafríast, familíast og sinni öðrum verkefnum. Þetta þarf að gerast á mettíma þannig að það verður örugglega eitthvað skrautlegt. Það sem kannski vinnur með mér er að enginn í skólanum virðist hafa neina skoðun eða áhuga á þessari ritgerð, þannig að mér sýnist ég geta stjórnað þessu doldið sjálf. En - ég ætla nú samt að reyna að gera þetta almennilega.

Raftónlistartímarnir mínir eru byrjaðir aftur. Ég er búin að kvíða mikið prófinu í sumar en mér til mikillar gleði má ég fókusera á pro tools, þannig að ég losna við að gera mig að fífli í forritum sem ég kann ekkert á! Og ég fæ að búa til verk úr íslenskum náttúruhljóðum og mixa í 8 rása surround! Jess!!

Talandi um það: Ég mætti í tímann með upptökur sem ég gerði sl. sumar þegar við pabbi og Bjarni fórum saman í bíltúr út úr bænum. Þá tókum við m.a. upp hljóð í sjóðandi hver á golfvellinum í Hveragerði. Í þessum hver hoppuðu og skoppuðu tvær golfkúlur sem minnti helst á tvö sjóðandi egg í potti. Kennarinn minn er hreinlega ástfanginn af þessu hljóði, enda ofsa flottur bassi sem kemur örugglega djúpt úr iðrum jarðar. Ekkert smá flott!

Við María fórum í dekur fyrir viku síðan, allt um það má lesa á Maríubloggi.

Ég snoðaði Bjarna áðan. Fyrir stuttu fjárfestum við í ekta kreppugræju; græju til að klippa hár (veit ekki hvað svona heitir). Ég klippti Palla fyrir nokkrum vikum og það kom nokkuð vel út, og í kvöld tók ég mig til og hreinlega rúði Bjarna á meðan hann sat límdur fyrir framan Dalmatíuhundana í sjónvarpinu. Dalmatíuhundarnir og Hefðarkettirnir komu upp úr töskunni hans Guðna, en þetta var sending frá Höllu frænku og fjölskyldu. Ég ætla samt ekki að birta hér mynd af Bjarna því hann lítur hálf rosalega út; snoðaður með glóðarauga, kúlu á hausnum og rispað nef, því hann datt frekar leiðinlega fyrir viku síðan. Ég hef mestar áhyggjur af að barnaverndareftirlitið verði sent á okkur þegar Bjarni mætir í leikskólann á mánudaginn vegna þess að hann lítur út eins og lítil fótboltabulla með slagsmálaáverka!

Og vorið er komið í Kaupmannahöfn! Í dag sátum við úti á pizzustað, vísitölufjölskyldan, á peysunum, og átum pizzur. Og eftir ís í eftirmat fór Guðni í teiknimyndasögubúðir á meðan við Bjarni púsluðum og lékum okkur á tröppum Kaupmannahafnarháskóla, umkringd léttklæddu ubertrendí ungu fólki í vortískufötum. Allt í einu eru ekki allir svartklæddir í þykkum vetrarflíkum heldur í öllum mögulegum litum (eða nánar tiltekið tískulitum vorsins, enda passa Kaupmannahafnarbúar upp á að láta ekki nappa sér lúðalega til fara og þeir taka ráðleggingar tískublaðanna ALVARLEGA. Ef blaðið segir að slaufur séu nýjasti "tendensinn" þá sést varla slaufulaus kelling úti á götu! Ég get svo svarið það að sumir virðast meir að segja stílisera saman ljósin á hjólunum sínum og risastóru slæðurnar sem fólk notar jafnvel þó það séu hitabylgjur!)

Ég segi þetta gott héðan í bili. Gleðilegt páska"frí", as in "Gleðilegt páskavinna-þegar-ég-get-og-éta-yfir-sig-af-nammi-þess-á-milli"...

Bollywood, 3. kafli

2009-03-16T13:53:00.000-07:00

Jæja, hér eru nýjustu Bollywood-fréttir.

Í tímanum í kvöld lærði ég ellefu sekúndur af þessum dansi:

Þeir sem hafa áhuga á að vita nákvæmlega hvaða ellefu sekúndur ég lærði geta spólað á 0.55 og horft þangað til talninging sýnir 1.06. Þess má taka fram að þetta virkar kannski létt (eða eiginlega virkar þetta bara brjálað erfitt) en við lærðum þetta sem sagt a.m.k. helmingi hægar, ef ekki bara þrisvar sinnum hægar og með öllum smáatriðunum voða flottum.

Svo lærðum við fullt af fallegum indverskum handahreyfingum! Ótrúlegt hvað maður getur verið kvenlegur og sexí með höndunum einum saman (eða kennarinn a.m.k., veitiggi alveg hvort ég er að massa kvenleikann og kynþokkann, en...maður reynir).

Það versta er að ég er búin að gleyma öllu saman núna! Það er sem ég segi; menntun er sóað á mig því ég er með gullfiskaheila. Sem betur fer vinnur heilinn minn úr músík á þann hátt að ég bara fatta hana sem þýðir að ég man hana af því að heilanum finnst það sem ég heyri meika sens. En ef ég þarf að muna eitthvað bara af því bara þá er það farið um leið! En þá er nú gott að geta spólað á 0.55 og rifjað upp dansinn. Spurning hvort youtube er með svona hægja á-fídus?

Alla vega, ég fór þreytt og mygluð í danstímann og kom kát og glöð til baka. Þá er þetta að virka!

Íslendingar í verslunarferð í útlöndum

2009-03-16T03:50:00.000-07:00

Ég sé á Esjumyndunum úr vefmyndavél veðurstofunnar að það er ansi hresst vetrarveður í Reykjavík. En hér er sama gamla grámyglan en þó eins og smá vor í lofti. Þó líkamlega sé nú líklega þægilegra að vera hér í danska veðrinu þá fæ ég samt smá heimþrá að sjá skítaveðursmyndir frá Fróni. Jámm...alltaf má finna heimþrá yfir einhverju.

VERSL:

Í gær fórum við Bjarni í verslunarferð til Svíþjóðar því mikið af fötunum hans Bjarna er orðið of lítið eða götótt. Sænska krónan er næstum jafn hrunin og sú íslenska þannig að það er hagstætt að taka kastið í sænskum kringlum núna.

Fyrsta verk okkar Bjarna þegar við komum út úr lestinni í Lundi var að fara í hraðbanka og svo í sjoppu að kaupa sænskt "KEX". Kex þetta er pínu svipað og Prins Póló, eða alla vega það sem kemst næst því að vera það hér í þessum radíus okkar. Þetta fæst ekki í Danmörku þannig að ég var komin með smá uppsafnaða löngun í þetta. Svo hittum við Maríu sem fór með okkur í strætó í átt að Nova Lund sem er aðal kringlan í Lundi. Bjarni var hinn aktífasti (og var það alla helgina reyndar), þannig að hann stökk beint út í drulluna á leiðinni út að kringlu. Sem betur fer var hann gallaður frá toppi til táar, þannig að það kom ekki svo mikið að sök þegar hann lagðist flatur í drullupoll, hæstánægður.

Þegar í Nova Lund var komið var Bjarni tekinn úr drullugallanum og götóttum stígvélunum. Fyrr um daginn hafði ég sett hjólabætur á stígvélin en þær duttu aftur af, þannig að Bjarni skildi eftir vinstrifótardrullumallsullarsokkaspor hvar sem hann fór í kringlunni. Eftir að okkur Maríu tókst að koma Bjarna inn í H&M hófst svo maraþon við að finna hæfilega stór föt á Bjarna. Bjarni fékk að velja sér bol og hann valdi sér að sjálfsögðu bol með mynd af bílum úr bílateiknimyndinni sívinsælu. Þá hófst mikil barátta því Bjarni vildi helst klæða sig í bolinn og rjúka út án þess að borga en það var ekki alveg í boði. María fékk þá það hlutverk að vakta Bjarna á meðan hann mótmælti hástöfum úti um alla búð á meðan ég mokaði upp bunkum af joggingbuxum í stærð 116, sokkum og nærfötum. Þegar við vorum búin að borga fékk svo Bjarni að klæða sig í bolinn góða á staðnum.

Næst héldum við í Din Sko og keyptum bæði strigaskó í stærð 32 (bara 4 skónúmerum minna en amma á Garðstöðum) og Spidermanstígvél í staðinn fyrir götóttu bílastígvélin. Í skóbúðinni sýndi Bjarni allar sínar bestu mannasiðahliðar og mátaði skó þægur og prúður. Að launum fyrir prúðmennskuna fékk hann að velja sér lítinn bíl í dótabúð.

Eftir smá matarpásu skelltum við stubbnum aftur í drullugallann og röltum á leikvöll. Þar fundum við gröfur sem við urðum auðvitað að prófa:

Svo heimsóttum við Bjarni, María og ég manninn Rickard og hundinn Alfred. Bjarni og Alfred vissu ekki alveg hvernig þeir ættu að tækla hvorn annan en ég held að báðir hafi verið nokkuð sáttir þegar við Bjarni héldum af stað aftur til Danmerkur eftir kósý spjall, te, safa og kruðerí.

Í lestinni prófaði Bjarni að fara á lestarklósettið. Til að opna og loka klósettdyrunum þarf að ýta á takka. Bjarni pissaði fyrst, og svo á meðan ég pissaði hugsaði ég með mér að Bjarni myndi líklega ekki fatta að ýta á takkann. En viti menn, Bjarni fattaði einmitt að ýta á takkann þannig að í sama bili og ég hysjaði upp um mig buxurnar opnuðust dyrnar og ég horfðist í augu við brosandi par sem þótti þetta hið skondnasta. Á meðan því fór fram skaust Bjarni eins og elding inn í lestarvagninn. Já, hann getur verið snöggur, drengurinn.

Rétt áður en lestin fór yfir Eyrarsundsbrúna stoppaði hún í Malmö Syd og þar kom inn heilt íshokkílið með allt sitt hafurtask. Lestin bókstaflega troðfylltist af risastórum töskum sem Bjarni hefði hæglega getað sofið í. Ég fékk íshokkíkylfu í hausinn a.m.k. einu sinni, en sem betur fer ekki mjög harkalega. Íshokkíungmennin, sem flest voru með gullpening um hálsinn, talaði þessa líka skemmtilega spes dönsku (jóska held ég að þetta hafi verið). Hokkíliði stökk út á Kastrup en við Bjarni fórum út á Nørreport og hjóluðum heim með hjólakörfuna fulla af nýjum fötum á ört stækkandi strák.

En það er víst ekki til setunnar boðið! Ég ætla að klára stykkið sem ég er að vinna í fyrir 27. mars því þann dag ætlum við María í dekur, og þá er nú gott að vera búin aðissu bara! Og svo er Bollívúdd í kvöld og ég er búin að stilla símann minn þannig að hann minni mig á það. Og lappirnar eru snyrtilegri en í síðasta bollívúddtíma, en úff, ætli allur hópurinn mínus ég sé orðinn sprenglærður í dansatriðinu og ég verði eins og lúði að reyna að hanga aftan í þeim? Farið ekki langt! Það og fleira mun koma í ljós í næsta þætti af... HAFDÍS GOES TO BOLLYWOOD!!!

Hafdís og Bjarni í lestinni:

Búrkubandið

2009-03-11T02:09:00.000-07:00

Þetta vídeó fann ég á fésbókinni hjá tengdó! Algjör snilld!!! Ótrúlega grípandi lag og frábær húmor:

Barbí fimmtug

2009-03-09T01:59:00.001-07:00

Barbí er fimmtug í dag. Til hamingju með það, "president Barbie":

Ég prófaði að gúgla "Barbie the composer" á netinu og fann þessa mynd af Barbí. Spurning hvort ég á að reyna að taka Barbí mér til fyrirmyndar og púlla þetta lúkk í kvöld þegar Risaeðlan verður flutt í hinum ofurchique tónleikasal skólans míns. Held samt að ég taki aðeins annan pól í hæðina, en ég ætla samt að taka pínulítið blíng. En hér er "Barbie the composer":

Við þessa mynd stóð eftirfarandi texti, fenginn af þessari vefsíðu:

"Barbie just adores music and of course, is herself an accomplished songwriter, musician and composer. Being of a somewhat diminutive stature, she understands the needs of todays modern short attention spanned youngsters for punchy short songs. "Short is the message here guys" says "Muso Barbie" . So lets hear one of her latest releases "Pink and Pretty"
Pink and Pretty
Get up on your feet!
Pink and Pretty
Moving to the beat!"

Sem sagt, nú má velta fyrir sér hvort ég sé tónskáld og gítareigandi í dag af því ég lék mér með Barbí þegar ég var lítil...

Barkasöngur frá Tuvu

2009-03-06T04:29:00.000-08:00

Ég fór í gær á tónleika þar sem konur frá fyrrum Sovétríkinu Tuvu (nf. Tuva) sungu og spiluðu á þarlend hljóðfæri. Tuva er norður af Mongólíu og þar búa 305.000 manns, pínulítið færri en á Íslandi! Gaman að því. Tónleikarnir voru vægast sagt magnaðir! Ég á bara engin orð til að lýsa þessu, en í staðinn skelli ég hér link á vídeó með Tuvönskum manni að syngja og spila. Finnst ykkur þetta ekki bara mögnuð tónlist?!?!! Nú veit ég hvert mig langar að ferðast...Daníel Brandur, ef þú lest þetta: Fórst þú til Tuvu þegar þú ferðaðist um þennan heimshluta á sínum tíma???

Hér er vídeóið af manninum, en ég fann því miður ekkert vídeó með kvennahópnum sem ég fór að hlusta á. Þess má geta að sá hópur heitir Tyva Kyzy, og þær munu koma fram á yfirtónafestivali sem stendur yfir núna í Lundi. En skæææl, ég kemst ekki á festivalið því ég er á kafi í PULSAR-festivalinu í Köben, bæði að hlusta og mæta á æfingar á Risaeðlunni.

Ekki hægt að vera á tveimur stöðum í einu...

P.S. Getur verið að þessir gaurar hafi verið að syngja á Íslandi fyrir tæpum 4 árum? (Ég komst ekki, var nýbúin að fæða Bjarna). Mamma og pabbi og Dagný, þið fóruð að hlusta á þá ef ég man rétt, ef þetta eru sömu kallarnir. Skv. þessu virðast þeir vera frá Tuvu. Þetta er svo geggjuð tónlist, en konurnar sem ég hlustaði á í gær voru alveg einni áttund ofar eða svo :).

Að spila á orgel er góð skemmtun

2009-03-05T01:42:00.000-08:00

Í gær var samnemandi minn í tónsmíðadeildinni, Christian Winther Christensen, með massagóðan fyrirlestur um orgel. Málið er að við erum nokkur (eða allflest held ég bara) að fara að semja orgelstykki sem verður flutt í haust á orgelhátíð mikilli hér í Köben. Christian er organisti og píanóleikari auk þess að vera rosa klár tónsmíðanemi og var því settur í að kenna okkur allt um orgel.

Eitt skemmtilegasta mómentið í þessum massaflotta fyrirlestri hans var þegar hann sýndi okkur eftirfarandi myndband á tjaldi í tónsmíðastofunni. Á meðan við horfðum og hlustuðum á myndbandið fylgdumst við með í nótunum og Christian lýsti því sem fyrir augu og eyru bar eins og hann væri að lýsa fótboltaleik:

"Þarna má sjá hvernig hann spilar á "hovedværket"....og nú færir hann sig yfir á "svældeværket"....sjáið hér í nótunum, hérna eru þeir alveg að fara að skipta yfir í annað register...og nú skipta þeir yfir! ....OG ÞARNA KEMUR REGISTRERAÐ DIMINUENDO...(innsk. sem hljómar eins og það ætti að vera afslappað en greyið gaurarnir á tökkunum hamast eins og þeir eigi lífið að leysa)...og NÚ geta þeir slappað af í smá stund..."

Og svo framvegis! Rosa gaman. En endilega kíkið á vídeóið. Það fyndna er að þetta sem sýnt er í vídeóinu er ekki það sem áhorfandinn sér því hann er niðri í kirkju. Organistinn og takkagaurarnir eru hins vegar uppi á kórlofti þannig að þeir eru í svaka aksjón og að tala og hlæja saman en áhorfendurnir verða ekkert varir við það, heyra bara músíkina niðri í kirkjunni og ekkert vesen. Gaman aðissu. Hér er vídeóið:

Þess má geta að verkið er eftir Eben og heitir Sonntagsmusik skv. kokkabókum Christians, en mér sýnist það líka vera kallað ýmislegt annað á ýmsum öðrum málum. Því miður kemur ekki fram hvað organistinn og takkagaurarnir heita. Aldrei hef ég ímyndað mér að það að spila á orgel væri svona mikið puð, ekki síst fyrir takkagaurana sem þurfa greinilega að vera mjög nákvæmir með hvenær þeir breyta tökkunum!

The Thoughtful Dresser

2009-03-04T11:38:00.001-08:00

...og sem smá framhald af síðustu færslu þá má geta þess að bókin heitir The Thoughtful Dresser, sjá leiðréttingar Palla í kommentum sömu færslu. Og hér er linkur á samnefnt blogg.

Þessi færsla var í boði Palla tískulöggu.

Smá pása frá tónsmíðum til að blogga...

2009-03-04T02:42:00.000-08:00

Nú sést loks til sólar í borg grámyglunnar, Kaupmannahöfn. Sorrí neikvæðnina en það er bara grátt hérna mest allan veturinn og ofan á það kemur að maður sér sjaldan lengra en út í næsta hús, engin fjöll og ekki þessi magnaða birta sem er á Íslandi, þ.e. þegar það er ekki grámygla þar ;).

Eins og sést er ég eiginlega flutt heim í huganum þó við eigum eftir ca. 4 mánuði hér enn. Og áðan sótti ég um leikskólapláss fyrir Bjarna í Hlíðunum fyrir næsta sumar/haust, því planið er að flytja aftur í gömlu góðu íbúðina í Eskihlíð.

MÚSÍK:

Í dag er fyrsta æfing á Risaeðlunni minni fyrir tónleika sem verða á mánudagskvöldið nk. Miðað við símtölin sem ég hef fengið frá gaurnum sem sér um nótur og dótarí fyrir spilarana þá virðist mér sem allir séu að panikkera á síðustu stundu yfir pörtunum sínum. Ég skilaði inn öllu nótnadótinu snemma í desember eins og allir hinir tónsmíðanemarnir þannig að það er ekkert þarna sem ætti að koma neinum á óvart. En svona er þetta nú oftast, ekki satt ;), og mjög skiljanlegt ef allir eru búnir að vera uppteknir í einhverju öðru fram að þessu, plús að stundum líta stykkin mín út fyrir að vera auðveldari en þau raunverulega eru. En mér líst vel á stjórnandann, ég heyrði hann æfa annað stykki í gær og mér heyrist hann vera mjög meðvitaður um hversu mikilvægur rytmi er í tónlist, enda er hann fyrrum slagverksleikari sjálfur. Algjör snilld fyrir mína músík! Og salurinn er æææði, hann er svo fallegur og hljómurinn góður.

Semjið gengur blússandi vel! Ég er búin að pikka inn allt sem systemið mitt gaf af sér og núna er ég á skrilljón að útsetja útkomuna. Mér sýnist þetta ætla að verða bara nokkuð skemmtilegt, a.m.k. fyrir minn smekk ;). Ég vil ekkert vera að segja of mikið frá þessu núna því mér líður hálf kindarlega að segja frá öllu áður en stykkið er tilbúið. En að þessu sinni held ég dagbók yfir allt sem mér dettur í hug og aðferðirnar sem ég nota sem ég ætla svo að birta hér á blogginu mínu viku fyrir tónleikana í sumar. Tónleikarnir verða í Köben 6. júní og í London 8. júní. Gaman að því.

Annars er ég búin að vera svo niðursokkin í semjið að ég hef verið frekar utan við mig á öðrum sviðum. Þess til stuðnings má deila með ykkur eftirfarandi samskiptum milli okkar Palla í gærkvöld:

Hafdís skoðar tískublað og Palli les og hlustar á tónlist.

Hafdís: "Ohh, það er svo erfitt að meta hvort þessi föt myndu fara mér vel. Þetta lítur ofsalega flott út á þessum hávöxnu módelum en það er ekki víst að þetta virki á svona litlum kellum eins og mér. Þessi módel myndu líta út eins og guðynjur þó þær væru klæddar í ruslapoka"

Hafdís, eftir smá umhugsun: "Guðynjur...? (hugsar) "Guðynjur...hvað var ég að reyna að segja"?

Palli: "Guðynjur"???

Hafdís: "Hvað heitir þetta....(langt hugs)...GYÐJUR"!

Hafdís og Palli kíma og Hafdís fær bjánahroll yfir sjálfri sér. Þau halda áfram að lesa um stund.

Palli: "Ég var að hlusta á poddkast með Andrew Marr þar sem hann er að ræða við konu sem skrifaði tískubók. Þessi bók fjallar mikið til um hvernig maður getur valið sér föt við hæfi, hún heitir "The Thinking Dresser". Þetta er orðið viðurkenndara núna í seinni tíð að alls konar fólk hugsi betur um útlit sitt (...)"

Hafdís: "Já, sniðugt..."The Dressing Thinker"?

Bollywood, 2. kafli

2009-03-02T13:14:00.000-08:00

Ég fór í fyrsta Bollywood-danstímann minn fyrir viku síðan. Þar komst ég að því að ég er jafn mikill lúði og ég var þegar ég var 11 ára í djassballett, bara stærri, feitari og frekari. Það fer sko ekkert fram hjá manni í sal fullum af speglum, og ég er ekki alveg vön að sjá mig svona mikið dags daglega. Ekki það að ég sé feit, en vá hvað ég hlýt að hafa verið mjó 11 ára fyrst ég lít svona út núna í stóru speglunum. Ef það er eitthvað sem ég hef meira af núna en þegar ég var ellefu ára þá eru það mjaðmir, og það er nú ekki verra í svona ofur kvenlegum dansi, mjög flott þegar og ef mér tekst að ná sporunum mjúkum og eðlilegum.

Fyrsti lúðaskapurinn var sá að gleyma að raka lappirnar í aaaaalveg doldið marga daga (vikur, jafnvel mánuð(i)???) og mæta svo á svæðið með berar lappir í hnjábuxum. Sem sagt; loðin eins og api, búin að missa af tveimur eða þremur tímum sem hinir voru búnir að mæta í og ekkert að drepast úr kvenleika mætt í þann alkvenlegasta dans sem ég hef nokkurn tímann reynt að dansa. En það var rosa fjör engu að síður. Við erum m.a. að æfa dans úr alvöru Bollywood mynd. Reyndar aðlagar kennarinn dansinn að því að við erum mis flínkar kellur af öllum stærðum og gerðum á aldrinum ca. 20-50 að dansa en ekki prófessjónal dansarar í indverska kvikmyndabransanum. Plús það að dansararnir í myndinni fengu að dansa hægar en svo er upptakan spiluð hraðar þannig að þau virka enn flínkari en þau eða nokkur annar gæti mögulega verið.

Svo í kvöld var tími númer tvö (tími númer 4 eða 5 hjá hinum), en vitið þið hvað!! Ég steingleymdi að mæta!!! Ég er ekkert smá fúl út í sjálfa mig. Þetta er greinilega ekki komið inn í rútínuna hjá mér, það er einhvern veginn allt á átópælot hjá mér í gamla systeminu.

Þegar maður er með barn á brjósti þá er talað um að maður sé með mjólkurheila, eða í brjóstaþoku. Ég held að ég hafi kannski bara aldrei komist almennilega út úr þessu ástandi því ég hef síðustu árin verið hrikaleg með að gleyma að mæta í hluti sem eru ekki fastir liðir í rútínunni minni. Þetta er extra slæmt þegar ég er í því ástandi sem ég er í núna, þ.e. með hausinn á kafi í stykkinu sem ég er að semja. Þannig hefur mér tekist að missa af fjöldanum öllum af fyrirlestrum og tónleikum sem mig hefur virkilega langað að koma á, og jafnvel látið fólk vita að ég ætlaði á. JARG!

Sem minnir mig á það, best að setja barkasöngstónleikana á fimmtudaginn inn á rímænder. Það verða sem sagt tónleikar með kvennakvintett frá ég veit ekki hvaða landi, en þær sem sagt syngja yfirtónasöng eða barkasöng eða hvað þetta er kallað. Hrikalega spennó!

Alla vega, ég kemst ekki heldur í Bollywood næsta mánudag því þá eru tónleikar með Risaeðlunni minni í salnum í skólanum mínum, þ.e. fyrrverandi risa-sal Danmarks Radio. Það er rosa flottur hljómburður í þessum sal þannig að ég hlakka til.

Þannig að fram að 16. mars mun ég æfa mig í kvenleika og dansi fyrir framan spegil heima hjá mér og reyni að muna að raka lappirnar fyrir næsta tíma. Spurning um að setja það á rímænder...

Hafdís goes to Bollywood!

2009-02-19T01:32:00.000-08:00

BOLLYWOOD:

(Bollywood með smá flamenco tvisti. Þetta ku vera einhver Helen, kannski ekki mjög indverskt nafn. En myndin er góð, og meira má lesa hér.)

Ég er að byrja í Bollywood-dansi á mánudaginn. Fyrir þá sem ekki vita þá er Bollywood dans til dæmis svona. Haldiðégeigekkeftiraðmassaðetta ;)?! Áður en einhver fer að skamma mig fyrir að gera út af við mig með því að lofa mér í of mikið, þá vil ég taka fram að þetta er bara einu sinni í viku, 2 tímar í senn, og mig grunar að þetta eigi eftir að vera kærkomin afslöppun frá öllu öðru sem ég er að fást við.

Já...kannski er þetta afleiðing af því að búa hér á Nørrebro þar sem plaköt með Bollywoodmyndum sjást víða og músík í þessum stíl berst úr bílum sem aka hjá. Og í gær fékk ég einmitt lánaða Bollywoodmynd á bókasafninu til að kynna mér málið nánar.

HIJAB:

Talandi um Nørrebro...mér finnst alveg ofsalega gaman að búa hér. Hér er önnur hver kona með hijab, og önnur hver af þeim er með ofsalega flottan hijab, þannig að ég er haldin heilmikilli hijab-öfund. Verst að það er kannski ekki alveg málið að fara að ganga með hijab án þess að gerast múslimi, þannig að ég held bara áfram að dást að lúkkinu úr fjarlægð. Um daginn var einmitt afgreiðslustelpan í matvörubúðinni með ótrúlega gellulegan og flottan hijab og ég stóð mig að því að glápa í tómri aðdáun. Hún virkaði líka pínu kímin á svipin þegar hún leit upp og sá á mér aðdáunarsvipinn :).

Ég á líka eftir að sakna "ávaxtabúðarinnar" sem er hér í götunni. Hér má alltaf fá ótrúlega girnilega ávexti og úr nógu að velja, plús sesamnammi sem ég er alveg vitlaus í. Ætli maður geti fengið svona sesamnammi einhvers staðar á Íslandi? Ætli það sé fáránlega dýrt? Ætli ég geti kannski búið svona til?

FUZZY:

En að öðru. Í gær fór ég á útskriftartónleika slagverksleikara að nafni Mathías Seibæk sem voru haldnir í salnum í skólanum mínum. Það reyndar byrjaði ekki vel því þegar ég kom að skólanum mínum þá var akkúrat verið að strengja lögregluborða, m.a. utan um hluta skólans míns. Málið var að einhver brjálæðingur hafði skotið úr byssu, sjá þessa frétt. Ég er alveg nett fegin að það er enginn tími hjá mér í dag ef einhver byssukall gengur laus. Kannski samt ólíklegt að hann skjóti aftur á sama stað? Plús að það eru mjög litlar líkur á að maður lendi í einhverju svona, meiri líkur á ýmsum öðrum óhöppum, þannig að ekkert vera að hafa áhyggjur af mér. Eníveis, ég ætla að tala um tónleikana...

Þessir tónleikar voru alveg frábærir og mjög hressandi að heyra nútíma slagverksmúsík, eða eins og Pernille kollega mín sagði "góða nútímatónlist" :). Það stykki sem ég held að maður geti nú alveg sagt að hafi toppað hvað kóreógrafíu varðar var verkið "Fire Play" eftir danska avant garde tónskáldið Fuzzy. Á þessari vefsíðu má heyra þriðja hluta verksins.

En alla vega. Áður en Mathías kom á sviðið hóf reykvél að pumpa reyk eins og hún ætti lífið að leysa. Það leið drykklöng stund og áfram pumpaðist reykur ásamt viðeigandi eightís ljósasjóvi. Eftir langa mæðu birtust tvær verur í reykkafarabúningum! Þær syntu í gegn um reykinn að stórri bassatrommu sem stóð með skinnið upp á við. Svo hellti önnur veran vatni á trommuna og gaurarnir tveir tóku að tromma trommuna svo vatnið svettist upp, baðaðir í appelsínugulu ljósi og reyk. Míkrófónn pikkaði þetta upp og bjó til rafræn eightís hljóð í og með. Ýmislegt annað dótarí trommuðu þeir á, svo sem málmplötur og annað draslerí.

Fleira sem reykkafararnir gerðu var t.d. að sprauta úr handslökkvitæki upp í loftið (gaf mjög skemmtilegt hljóð), kveikja eld (og á kertum) með miklum tilþrifum, slá í ýmislegt dótarí og setja í vatn til að fá ákveðinn effekt, hringja brunaliðsbjöllu af miklum móð og margt fleira umkringdir bláum blikkandi ljósum. Ekki skemmdi að músíkin var líka skemmtileg :). Þegar verkinu var lokið kom í ljós að önnur veran var Mathías en hin var Gert Morthensen, prófessorinn hans, og þeir voru skemmtilega sótugir í framan. Já, það getur verið puð að vera slagverksleikari.

Jæja, best að segja þetta gott og fara að vinna í stykkinu mínu.

Herraklipping

2009-02-11T09:49:00.000-08:00

Ég ætla að snyrta hárið á Bjarna. Ég legg ekki í Palla. Þetta skemmtilega kennslumyndband fann ég á youtube. Verst að ég á ekki svona rakigræju. Jæja, einn tveir og BYRJA!

Hvítur morgunn í Köben

2009-02-11T00:54:00.001-08:00

Þegar Bjarni skreið upp í í morgun sagði hann að það væri snjór á alvöru bílunum úti (þ.e. ekki þykjustubílum eins og okkur). Og viti menn, það var rétt hjá honum. Ég hef aldrei séð svona mikinn snjó áður hér í Köben, en á íslenskan mælikvarða er þetta auðvitað ekki mikið. Og mér fannst hálf spaugilegt að sjá lítinn sóparabíl vera að sópa snjóinn af gangstéttinni áðan, snjó sem kemur að öllum líkindum til með að bráðna á næstu klukkutímum.

Eftir að ég hafði skilið við Bjarna á leikskólanum skrapp ég í matvörubúðir. Það eru tvær búðir hlið við hlið, önnur er svona týpísk Krónus-búð og heitir Fakta en hin heitir Asian market og selur alls konar skemmtilegar vörur. Þar keypti ég gómsæta ávexti sem ég japla á núna og sesam snakk sem ég er vitlaus í. Rosa gott start á morgnana; ávextir, sesamsnakk og te!

En nóg um það. Mig langaði að skrifa lauslega um síðasta laugardagskvöld. Þá fór ég ásamt fríðu föruneyti hljóðfærakvenna á tískusýningu í hinum ofur-trendí kjötbæ í Vesterbro hér í bæ.

COPENHAGEN UNFAIR: TÍSKUSÝNING FYRIR VENJULEGA FÓLKIÐ:

Það var hellirigning og við námskellur mættum á hjólunum okkar, þannig að þetta var ekki alveg eins og í Sex and the City, aðeins minni glamúr. Í staðinn fyrir rándýra glitrandi merkjakjóla, rauðan dregil, leigubíl og ljósmyndara var þetta meira svona blautar kellur í iðnaðarhverfi sem minnir helst á Smiðjuveginn í Kópavogi (og þetta er víst eitt mest trendí svæði borgarinnar!), og undirrituð í kápu sem hefur aldrei verið hreinsuð og lyktaði þ.a.l. eins og blautur hundur. Það góða við þetta er að það voru engir jakar við innganginn sem hentu ó-trendí fólki út (praktískt fyrir mig), en þess í stað voru vinalegar miðasölustúlkur sem stimpluðu handarbakið á okkur þegar við höfðum borgað okkur inn.

Þegar inn var komið mættu okkur fleiri kellur, og þegar við vorum allar saman komnar þá vorum við eftirfarandi: íslenskur tónsmíðanemi, frönsk söngkona, þýsk flautuleikkona, norsk slagverkskona, finnsk píanóleikkona og sænsk söngkona. Skemmtilega alþjóðlegt.

Eftir smá spjall settumst við niður í sæti sem voru frátekin fyrir fjölmiðla (ég er að skrifa blogg um þetta, ekki satt). Svo hófst tískusýningin. Á heildina litið var þetta bara ofsa flott (og núna er ég með sterka löngun til að eignast jogging-samfesting eða harem-buxur með palíettum!). Myndir af fötunum má sjá hér.

Þegar sýningunni var lokið rákumst við á fleiri norskar hljóðfærakellur sem drógu okkur á ofur-trendí kaffihús sem heitir Karrierebar (kíkið bara á vefsíðuna þeirra, þau eru greinilega að deyja úr trendískap). Við erum að tala um að þessi bar er svo hipp og kúl (eða bara tilgerðarlegur?) að þjónarnir þarna ganga afturábak! Ég er ekki að grínast, þeir ganga afturábak þegar þeir þjóna til borðs. Staðurinn er greinilega að gera út á mötuneytisfílinginn sem tilheyrir stílnum í hverfinu, sem er nú bara skondið. Ég pantaði camembert og fékk fáránlega lítið stykki af osti á krumpuðu hrökkbrauði, borið fram á hlussustórri gólfflís. Gaman. En við skemmtum okkur vel við kellur, og sparsömustu námsmeyjarnar stukku yfir götuna á Jolene (sem er kaffihús rekið af Dóru Takefusa) til að kaupa drykki á betra verði.

Því næst fórum við aftur í gömlu kjötvinnsluna þar sem tískusýningin var og dönsuðum við músík sem ég bara veit ekki alveg hvað heitir (jimundur, er ég orðin svona út úr). Hún var ofsa spes og með doldið flóknum takti þannig að ég fann upp allt fullt af nýjum danssporum. Eftir góða stund á gólfinu kom kvenmaður einn aðvífandi og hóf að herma öll sporin mín. Mér fannst þetta hið skondnasta og breytti sporunum mínum jafnóðum svo hún hefði úr einhverju að moða. Áfram hermdi hún og gaf í skyn að hún væri meira hipp og kúl en ég en ég hélt áfram að leika danskeppnileikinn og dró fram úr pússi mínu gömul djassballettspor frá árinu 1987 frá því ég var hálft ár í djassballett. Eftir að ég tók flashdanshoppið þvert yfir dansgólfið gafst kvenmaðurinn upp og ég fór með sigur af hólmi í hverermesthippogkúlogæðislegastagelgjaníkaupmannahöfn-keppninni. Já...stundum verð ég vör við meiri gelgjumenningu hérna í Köben en í Reykjavík, jafnvel hjá fullorðnu fólki. Ofsa spes.

Jæja, best að segja þetta gott í bili. Þessi langa færsla hlýtur að bæta upp fyrir margar vikur af bloggleysi. Núna ætla ég að vinda mér aftur í semjið, þar gengur allt hratt og vel um þessar mundir (7-9-13).

Knús og bless í bili frá tískuborginni Köben!

Stutt

2009-01-26T04:33:00.000-08:00

TRAUST OG TRÚVERÐUG FORYSTA EÐA HVAÐ:

Ef maður fer inn á mbl.is, skrollar alveg niður og smellir á frétt sem heitir "Traust og trúverðug forysta" þá kemur meldingin "Villa". :)

INNSPÍRASJÓN ÚR ÓVÆNTRI ÁTT:

Ég er búin að vera alveg blankó og hugmyndasnauð í morgun að reyna að semja eitthvað sniðugt. Mér hefur bara ekki dottið einn einasti tónn eða taktur í hug! En þá barst mér allt í einu aðstoð úr óvæntri átt, þ.e.a.s. frá prentara heimilisins. Ég var að prenta út einhverjar töflur og þá bara komu svo skemmtileg hljóð úr prentaranum sem blésu mér andann í brjóst. Gaman að því.

Spurning hvort ég þarf að geta þess að LEXMARK X4580 sé meðhöfundur af verkinu...

Fylgst með úr fjarlægð...

2009-01-22T01:19:00.000-08:00

Ég get nú ekki sagt að ég hafi neitt merkilegt í fréttum hérna megin (er með hálsbólgu, að laga nótur, byrja að semja, lesa um uppeldi). Það er mun meira að gerast hjá ykkur á Íslandi sýnist mér.

REYKJAVÍK:

Í gær hringdi Dagný systir í mig og leyfði mér að heyra mótmælatónlistina í gegn um símann. Stórmerkilegt! Ég settist niður og skrifaði það sem ég heyrði gróflega í nótur.

Aumingja Oslóartréð! Leiðinlegt að það þurfi að koma til svona dramatískra hluta áður en ríkisstjórnin tekur sönsum og segir af sér. Brenna bekki og jólatré...hálf dapurlegt eiginlega finnst mér.

Hér rakst ég á mjög svo forvitnilegar lýsingar, myndir og umræður um mótmælin. Ýmislegt sem maður gramsar upp á feisbúkkinu.

Það er skrýtið að vera hér hinum megin við hafið og fylgjast með þessu í gegn um fjölmiðla og netið, og hljóðdæmi í gegn um síma. Aldrei hef ég séð neitt þessu líkt gerast á Íslandi, og mér finnst ég eiginlega ekki sjá þetta almennilega því maður fær kannski bara afmarkaða mynd í gegn um fjölmiðla, og hins vegar í gegn um netmiðla.

En...hvort sem maður er sammála aðferðunum sem er beitt eða ekki, þá er ég í meginatriðum sammála um að það væri gott að kjósa sem fyrst. Mér finnst að það eigi ekki að koma til þess að fólk þurfi að rústa öllu og beita ofbeldi til að á það sé hlustað, og það gefur eiginlega ekki gott fordæmi að láta undan skrílslátum. Þannig að mig langar líka til að benda á þennan link í því samhengi. Og - áfram með friðsamleg og skynsamleg mótmæli, blaðaskrif, umræður o.s.frv.

En plííís bara ef það verða kosningar, þá vona ég að fólk aulist nú til að kjósa rétt og passa sig á öllum úlfunum í sauðagærunum.

Aaaaaalla vega...ég veit svo sem ekki hvað ég get sagt meira um þetta allt saman. Ég held áfram að fylgjast með þessu héðan frá Köben.

KÖBEN:

Hér er allt í rólegheitum og sólin skín. Í verslunarmiðstöð sá ég að maður getur maður fengið lán á nokkrum mínútum til að spreða í lífsstílsvörur ef mann langar skyndilega til þess (ég er ekkert að fara að gera það, bara að láta vita). Allir eru löngu hættir að mótmæla ungdómshúsinu. Þegar ég hitti fólk þá spjallar það um hversdagslega hluti eða daginn og veginn. Og það er alltaf verið að spyrja mig hvað sé að frétta af kreppunni á Íslandi og ég segi að það hafi eiginlega bara ekkert breyst, alla vega ekki á æðstu stöðum, nema hvað að margir séu að missa vinnuna og svoleiðis (en ekki akkúrat þeir sem kannski ættu að hætta??).

P.S. Ég var að horfa á aukafréttatímann frá því í gær á netinu. Alveg ótrúlegt allt saman. Hverjum dettur í hug að kasta brauði í fréttamann, hvaða tilgangi þjónar það!?!?!! En tónlistin var flott ;) (og miklu fókuseraðri og flottari en tónlistin kvöldið áður, veit ekki hvort það segir eitthvað um muninn á þessum tveimur atburðum??). Ég vona að þingmennirnir fái næði til að ræða málin í dag, hvort sem það verður kosið eða ekki þá held ég að í dag sé mikilvægt að fundurinn fái að fara fram til að menn geti þá a.m.k. rætt þetta.

P.P.S. Hér koma smá plokkfiskhugmyndir: Gott er að sjóða gulrætur, lauk og svona hvítt díngs sem lítur út eins og gulrót en er rjómahvít, veitiggi hvað þetta heitir, og stappa þetta allt saman við plokkfiskinn sinn. Nammnamm, gefur gott bragð!

Stutt

2009-01-17T02:57:00.001-08:00

FEISBÚKK, 3. KAFLI:

Nú þurfum við Palli ekki að gifta okkur. Við erum búin að staðfesta samvist okkar á feisbúkk! Nema hvað feisbúkk orðar það þannig að "þau segjast vera í sambandi". Gaman að því.

BJARNI BÍLL:

Til að stytta Bjarna stundirnar í flensupestinni leigði ég teiknimyndina "Bílar" á bókasafninu:

Í fyrsta skipti horfði hann alveg límdur á myndina án þess að blikka augunum. Um leið og hún var búin horfði hann aftur á alla myndina án þess að blikka. Eftir það breyttist hann í kappakstursbíl og hefur eiginlega bara ekkert verið Bjarni eftir það.

Fyrst var ég "mömmubíll" eða "Leiftur", en svo breytti ég sjálfri mér í gamlan ryðgaðan bíl til að hafa afsökun til að hægja á mér.

Á hverjum morgni brunar kappakstursbíllinn Bjarni upp í rúm til gömlu, þreyttu, ryðguðu bílanna og spænir út um allt rúm. Svo sem alveg hægt að vakna við það eins og hvað annað...

KVEF:

Og nú er komið að mér að hafa kvefpest (vonandi ekki meira en það, 7-9-13). Ég dæli í mig vítamíni, lýsi, ávöxtum, hvítlauk, fjallagrasatei með hunangi, sólhatti... Mig langar nefnilega að fara að VINNA Í MÚSÍK eftir helgi, takk fyrir!

P.S. Sem betur fer gat ég stillt á íslenskt tal á bílateiknimyndinni, annars væri Bjarni ekki bara bíll heldur líka DÖNSKUMÆLANDI bíll sem krefðist þess að allir aðrir töluðu dönsku líka!

Góða helgi!

2009-01-16T05:37:00.001-08:00

Hann Albert hjá Listaháskólanum sendir oft eitthvað skemmtilegt á föstudögum. Ég mátti bara til með að skella þessu hér á bloggið. Smellið eeeendilega á myndirnar til að sjá þær almennilega. Góða helgi, alle sammen!:

Hvað hugsarðu um þegar þú ert á leið út á lífið?/What do you think of when you're invited out for a drink?:

Feisbúkk, 2. kafli

2009-01-16T04:52:00.000-08:00

Ég var að opna tölvupóstinn minn. 57 skilaboð takk fyrir! Hvað er ég búin að koma mér í...

Ég er ekki alveg viss enn hvað mér finnst um allt þetta feisbúkk dæmi. Kannski er þetta bara alls ekki fyrir mig. En...ég ætla að prófa þetta og ef þetta er ekki að virka fyrir mig þá bara dílíta ég prófílnum mínum.

Jæja...kannski ég kíki á þessa 57 meila...

Síðasta vígið fallið! Djísöss...

2009-01-15T07:25:00.001-08:00

Jæja. Þá er síðasta risaeðlan komin á feisbúkk! Ég er loksins hætt að streitast á móti því allir hinir sem ég þekki sem eru lengi búnir að streitast á móti eru hættir að streitast á móti.

Þannig að; addið mér ef þið viljið. Prófíllinn minn er enn á algjöru frumstigi, er ekki búin að græja þetta eða stilla.

Eníveis, ég er farin á skauta með skrilljón harmonikkuleikurum.

Veriði blessuð í bili...

JIBBÍÍÍÍ...

2009-01-10T11:55:00.001-08:00

Ég fer á UNM í sumar!!! Gautaborg 4.-10. ágúst, here I come...

P.S. Enda síðasti séns fyrir mig, að klára nám og að verða of gömul...

Opinn borgarafundur - auglýsing

2009-01-07T09:57:00.000-08:00

Þar sem ég er hinum megin við hafið þá vil ég koma þessu á framfæri til ykkar sem hafið kannski áhuga á að mæta. Gaman að sjá að verið er að ræða málin á málefnanlegan hátt og fólki sem kemur að þessu frá ýmsum hliðum boðið að vera með. Mér líst vel á það:

OPINN BORGARAFUNDUR #7

Í Iðnó, fimmtudaginn 8. janúar kl 20-22.

Fundarefni: Mótmæli (ólík viðhorf, ólíkar aðferðir, sömu markmið?), aðferðafræði mótmæla og borgaraleg óhlýðni.

Frummælendur

· Hörður Torfason – Raddir fólksins

· Eva Hauksdóttir – Aðgerðasinni

· NN anarkisti

· Stefán Eiríksson – Lögreglustjóri höfuðborgarsvæðisins

Auk þeirra munu Katrín Oddsdóttir, laganemi og talsmaður Neyðarstjórnar Kvenna, Sigurlaug Ragnarsdóttir fyrir hönd Nýrra tíma og Þórhallur Heimisson, prestur, taka þátt í pallborðsumræðum ásamt fleirum og svara spurningum viðstaddra.

Þá hefur Birni Bjarnasyni dómsmálaráðherra sérstaklega verið boðin þátttaka í pallborðsumræðunum.

Hvetjum ríkisstjórn Íslands og alla alþingismenn til að mæta á svæðið, hlusta á sína kjósendur og vera með í umræðunni. Hvetjum ennfremur alla fjölmiðlamenn og konur til að mæta og taka þátt.

Fyrirkomulag

Fundarform verður með sama sniði og áður, þegar frummælendur hafa lokið máli sínu er orðið gefið laust og fundargestir úr sal fá að tjá sig eða spyrja þátttakendur í pallborði spurninga. Hver aðili hefur tvær mínútur til að tjá sig svo gott er að vera vel undirbúinn.

Við hvetjum fundargesti til þess að mæta tímanlega vegna takmarkaðs húsrýmis.

Sýnum borgaralega virkni og fjölmennum á fundinn. Spyrjum, hlustum og fræðumst.
Vinsamlegast áframsendið póstinn.

f.h. undirbúningsnefndar
Guðný Þorsteinsdóttir

Annars finnst mér mjög leiðinlegt að sjá í fréttum og í bloggi fólks hvað sumir eru orðnir allt að ofbeldisfullir í orðum og gjörðum í umræðunni um kreppuna. Ég held að fólk þurfi að passa sig að láta ekki reiðina í garð þeirra sem eru (að einhverju leiti) ábyrgir á bankakreppunni verða þess valdandi að fólk kalli yfir sig eitthvað ennþá verra. T.d. væri ekki sniðugt að kjósa einhverja rasistaflokka bara af því fólk vill ekki hafa ríkisstjórnina sem nú er við völd. En það þarf nú væntanlega ekki að taka svona lagað fram, eða ég trúi því ekki ;). En það sem mér finnst meira áberandi núna en áður er að alls konar róttækir furðufuglar, ýmist slaaatta langt til hægri eða slaaaatta langt til vinstri, virðast vaða uppi í fjölmiðlum og á bloggum. Eða hefur það kannski alltaf verið svona?

En plís, ekki túlka þetta þannig sem að ég sé að segja að ég vilji ekki að eitthvað breytist, og ég er sko alveg til í að sjá nýja ríkisstjórn og ekki síst nýja seðlabankastjórn. Ég er bara að minna fólk á að vera málefnalegt, skynsamlegt og kynna sér málin vel.

Eins og til dæmis með því að mæta á svona fundi eins og er auglýstur hér fyrir ofan.

P.S. Eitt lítið atriði sem ég er að velta fyrir mér...hvort ætli ráðamönnum finnist betra að hafa ungt fólk á atvinnuleysisbótum eða námslánum? Ég hefði haldið að það væri að öllu leiti betra að hafa fólk á námslánum...

P.P.S. Annars er allt gott að frétt af okkur :).

Nýr bloggari

2009-01-05T01:14:00.000-08:00

Það er kominn nýr bloggari á svæðið:

Hildur sellófrænka í Finnlandi

Hildur frænka er að fara sem skiptimiði í sellóleik til Turku eftir nokkra daga, það verður spennó að fylgjast með ævintýrum hennar þar. Vantarðignokkuð hjálp við leiiijjjátið, Hildur frænka ;)? Hihihihi...

nýtt útlit

2009-01-04T15:02:00.001-08:00

Þá er búið að breyta útlitinu fyrir árið. Þetta er árviss viðburður að útlit síðunnar breytist rétt eftir áramót. Að þessu sinni fékk ég rosalegan valkvíða því það voru hreinlega of margir möguleikar á vefsíðunni þar sem ég fékk mynstrið. Hér má sjá þrjá möguleika sem ég mátaði, og ég held að ég hafi barasta valið rétt. En núna er klukkan orðin allt of margt (ég er sko búin að liggja yfir þessu skal ég segja ykkur) og ég ætla að fara að lúlla. Ef þetta er ljótt þá verður það bara lagað næst.

Njótið vel.

p.s. lúkkinu verður breytt ef ég verð geðveik á þessu...sjáum til

Gleðilegt ár!

2009-01-04T11:28:00.000-08:00

SÍÐUSTU KLUKKUSTUNDIR JÓLAFRÍSINS:

Jæja, gleðilegt ár, öll sömul. Við liggjum hér öll fjölskyldan (mínus Guðni reyndar) uppi í sófunum tveimur á Haraldsgötunni í Kaupmannahöfn. "Þetta er nótt úti!", bendir Bjarni réttilega á, enda er farið að líða að háttatíma hans. Við hlustum á ofsa kósý barokkmúsík og drekkum te á náttfötunum. Ég rembist við að halda eitt áramótaheitið (sem felst í að venja sig af leiðum ávana, eru ekki allir með eins og eitt svoleiðis heit?) á meðan ég drekk te og japla á gulrótaköku. Eníveis. Eftir stutta stund förum við að lúlla og vöknum aftur á vinnudegi ógurlegum!

Við tjáum Bjarna að í dag sé síðasti jólafrídagurinn og á morgun fari hann í leikskólann. Í stað hins hefðbundna gargs þegar talað er um að fara í leikskólann færist bros yfir andlitið og hann tekur að hoppa og skoppa í sófanum. Greinilega í sama pakka og foreldrarnir sem eru farnir að hlakka til að takast á við verkefnin sín og komast í rútínu á ný. Það verður líka ágætt fyrir mig að verða leyst af af alvöru krökkum, þannig að ég geti farið að vera ég sjálf aftur en ekki Doddi/Babar/gíraffi/hestur/Bamse*

NÝJA ÁRIÐ:

Það á nú aldeilis að taka á því á nýja árinu. Á morgun eða sem fyrst eftir morgundaginn** ætla ég að byrja á stykki sem verður spilað í sumar í Köben og London, voða fjör, og ég kem til með að spila með í því að ósk kennaranna minna :). Þess utan er ýmislegt smálegt í gangi líka, en þetta er aðalverkefni vorsins. Ég hugsa að ég verði beisikklí á fullu í þessu þangað til skiladagurinn rennur upp (sem ég hef ekki huuuugmynd um hvenær er, kannski ekki svo galið að tékka á því).

HELGIN Í STUTTU MÁLI:

En já, við erum öll búin að liggja í leti eins og okkur væri borgað fyrir það, og bralla margt skemmtilegt. Í fyrradag fórum við Bjarni t.d. í Dyrehaven á meðan Palli vann (ókei, hann hefur reyndar sýnt smá dugnað, en ekki ég :p). Þar sáum við fullt af dýrum, hvað þau nú heita (krónhirtir segja m&p, það er örugglega málið). Alla vega, þetta er æðislegur staður, Dyrehaven, og þá er ég að tala um að hjóla doldið vel inn á svæðið og njóta víðáttu, fallegs skógar og skoða sæta bæi og höll sem þarna leynist.

Í gær fékk Bjarni leikfélaga úr leikskólanum í heimsókn og við Palli skiptumst á að hafa umsjón með því milli þess sem við lásum bækur á kaffihúsum.

Og í dag fórum við familían út að leika í Kongens have (Rósenborgargarðinn) og svo á ríkislistasafnið á eftir. Ekkert okkar hefur komið á listasafnið áður, en við skemmtum okkur konunglega þar! Ég held að hápunkturinn fyrir Bjarna hafi verið að hlaupa þarna um í risastórum sölum (já, ég veit, við höfum kannski ekki verið vinsælustu gestirnir) og ekki fannst honum leiðinlegt að fá að mála málverk í barnadeildinni. Þessi barnadeild er algjör snilld, maður borgar pínulitla upphæð rétt fyrir efniskostnaði og þá tekur starfsfólk á móti manni og leiðbeinir manni í skemmtilegri listsköpun með börnunum sínum. Bjarni fékk stórar málaratrönur, málaragalla, pensil, málningu, vatn og stórt blað og svo setti hann sig í stellingar og málaði þessa líka fínu mynd!

LIST EÐA EKKI LIST? OG - SKIPTIR ÞAÐ MÁLI?

Fyrir utan listasafnið er verkið "The Flying Steamroller" sem tilheyrir sýningunni "Reality Check" (Hér má sjá youtube-vídeó af þessu verki, það vantar nú samt eitthvað upp á það á þessu vídeói finnst mér miðað við að sjá þetta bara live í aksjón, fyrir mér finnst mér þetta bara hálft verkið því það vantar "endann"). Við höfum hjólað fram hjá þessu verki í marga mánuði en við höfum aldrei séð þetta í aksjón fyrr. Í stuttu máli þá rákum við upp stór augu, ekki síst Bjarni sem var alveg heillaður. Ég vil ekki segja of mikið, þið verðið bara að kíkja á vídeóið.

Þetta verk skapaði milli okkar Palla mjög fjörugar og skemmtilegar umræður, m.a. um hvað er list og hvað snertir mann o.s.frv. Heilinn minn bara snarvaknaði og skemmti sér við að hugsa og pæla og meta og fílósófera. Stuð! Hafið þið lesendur eitthvað um málið að segja?

Kannski, kannski ekki. En það má alla vega lesa hérna á milli línanna að maður er orðinn doldið þyrstur í að nördast í músík og listabralli eftir allt þetta át, hangs, heimilisstörf og fjölskyldulíf 24/7. Sem er reyndar ofsa gaman líka, enda er þetta frí búið að vera ótrúlega endurnærandi og notalegt.

Vá, er þessi færsla orðin svona löng!?! Ég gleymdi mér í blogginu og Palli gleymdi sér í bókarlestri þannig að Bjarni er ekki enn kominn í háttinn. Best að ganga í það mál.

Bestu kveðjur héðan frá Köben.

* Hér má sjá einn þátt með Bamse og Kylling á youtube.

** Ef veðrið verður gott þá ætla ég að fara í Dyrehaven í hjólatúr (og vonandi draga Palla með, ef hann hefur tíma). Það er svo sjaldgæft að það sjáist til sólar hér í Köben á þessum árstíma að maður bara VERÐUR að nýta það ef það gerist!

2008-12-23T02:21:00.001-08:00

Elsku vinir, ættingjar, kunningjar og samstarfsfólk! Við óskum ykkur gleðilegra jóla og farsæls komandi árs með þökk fyrir það gamla. Við hlökkum til að sjá ykkur í sumar þegar við flytjum aftur á skerið.

Knús og kossar,

Hafdís, Palli og Bjarni.

Jólaföndurhorn Hafdísar - live frá Lundi!

2008-12-22T09:54:00.000-08:00

Við erum stödd í Lundi, nánar tiltekið í íbúðinni hennar Maríu á stúdentagörðunum. Þar sem það er enginn hérna nema við (og Josefin, en hún fer á morgun) þá erum við eiginlega búin að leggja allt undir okkur hérna :p. Á morgun megum við víst eiga von á meindýraeyðum til að eyða einhverjum skorkvikindum úr eldhúsinu, en ég vona að ég geti eldað "julskinka" á sænskan hátt þrátt fyrir heimsókn þeirra. Kemur í ljós.

Og ef það er ekki hægt að elda "julskinka" á aðfangadag, þá keyptum við þessa frábæru ABBA-síld (eins og hljómsveitin), það má þá éta hana:

Íbúðin í Köben er samt ekki tóm, því Asta vinkona okkar ætlar að nota hana.

Hér má svo sjá svipmyndir frá umhverfisvænu endurvinnslujólaföndurhorni Hafdísar. Fyrsta myndin er myndband, ýtið á þríhyrninginn til að horfa á það:

Mér sýnist ég ekki ætla að ná því að senda jólakort núna í ár, þannig að ef við gefum okkur að það sé klúðrað þá vil ég bara óska ykkur öllum gleðilegra jóla!
.

Dekurdagar

2008-11-23T07:20:00.001-08:00

Bjarni horfir á Barbapapa á youtube. Palli eru úti að skokka. Ég er búin að sitja og prjóna í rólegheitunum. Úti er snjór og hálfdimmt, eiginlega bara alveg eins og á Íslandi.

Guðni helgargrís er floginn aftur til Íslands ásamt mömmu sinni og litlu systur. Þær mæðgur gistu hjá Ásdísi systur Bergdísar mömmu Guðna, en Guðni gisti hjá okkur. Við brölluðum margt ótrúlega skemmtilegt og kósý á meðan hann og þau voru í Köben, en núna er aftur hálftómlegt í íbúðinni (þó lítil sé). Annars sér Bjarni til þess að það er ekki beint lognmolla, en við söknum Guðna strax.

Eitt af því sem við brölluðum var að fara öll saman í Tívolíið. Það er æðislega flott núna rétt fyrir jólin enda mikið lagt í ljós, skreytingar og stemmningu almennt:

Guðni og fjölskylda flugu til Íslands á föstudaginn. Þann sama dag fórum við Palli í partý með drottningunni. Eða réttara sagt á tónleika með drottningunni því við sáum hana ekki í partýinu. Þetta var mjög spes stemmning. Allir þurftu að mæta hálftíma of snemma af því drottningin á að mæta síðust allra. Þegar hún kom þá stóðu allir upp og svo var einhver ægilegur mars spilaður sem er víst alltaf spilaður þegar hún er. Mér skilst þetta sé gamli þjóðsöngur Dana, og samnemendur mínir segja mér að textinn sé víst frekar brútal. Eníveis. Þegar marsinn var búinn settist drottningin og allir hinir líka. Og svo hófust tónleikarnir. Í stuttu máli: Rosa flott en kannski doldið gamaldags en það er örugglega bara vel við hæfi.

Eftir það var voða flott partý með mat og drykk og lounge-hljómsveit. Við Palli urðum samt frekar fljótt lúin að reyna að tala útlensku í háværum klið (fyrir utan að við þurftum að standa upp á endann til að borða) þannig að við vorum komin heim vel fyrir miðnætti.

Besti parturinn af þessu öllu saman var nú samt drottningarpartýið heima hjá okkur fyrir tónleikana. Þá hittumst við nokkrar kellur í hárgreiðslu og förðun um leið og við drukkum bleikt freyðivín og átum kökur og pönnsur með rjóma. Mette tónsmíðanemi sá um förðun en ég um hár. Þarna er Mette að farða mig, en á myndina vantar nokkrar harmonikkudrottningar:

Á meðan við Palli míngluðum við kalla með fálkaorður og konur í stórum kjólum passaði María Bjarna. Daginn eftir kom svo rjóminn á ísnum; dekurdagurinn okkar Maríu. Við tókum lest til Holbæk og löbbuðum í nístandi kulda niður að sjó. Þar fundum við ekta litla smábæjarsjoppu þar sem hægt var m.a. að kaupa hamborgara, samlokur, pulsur og...smørrebrød! Namm namm. Að sjálfsögðu fengum við okkur svoleiðis og heitt kakó með. Eftir það röltum við yfir í tyrkneska baðið og þá tók nú aldeilis trítment við! Fyrst vorum við skrúbbaðar í "hamami" (sem er e.k. sameiginlegt rými þar sem konur (og kallar í þessu tilfelli) geta fengið nudd og skrúbb og ýmislegt svoleiðis). Svo vorum við leiddar í annað hús þar sem við böðuðum okkur upp úr sitt hvoru viðarbaðkarinu með hunangi og kamillu út í. Nuddkonan setti píanósónötur eftir Mozart á fóninn og við lágum og slökuðum algjörlega á (þarna verð ég nú að viðurkenna að Mozart var alveg að vinna vinnuna sína píanósónötulega séð og kom sterkur inn). Eftir það vorum við látnar liggja á dúnmjúkum gæruskinnum á meðan hausinn og andlitið var nuddað. Algjört æði, enda steinsofnaði ég!

Eftir hárþvott og gufuböð dýfðum við okkur ofaní ískalt vatn. Ég held að þessar myndir tali algjörlega sínu máli um það:

Svo fengum við okkur tyrkneskt eplate og ávexti á meðan við horfðum á sólarlagið í notalegu hvíldarherbergi. Ljúft og endurnærandi. Eftir að hafa villst og misst af lest komumst við loksins aftur til Köben og María þaðan til Lundar.

Ókei! Á meðan á þessari bloggfærslu stóð er ég búin að hnoðast og ærslast með ærslabelgnum Bjarna. Hann er vooooðalega mikill orkubolti þessa dagana. Palli er kominn inn eftir skokkið og er í baði. Bráðum eldum við plokkfisk úr pangaseus-fiski. Og frá og með morgundeginum hefst á ný dugnaður og sparnaður eftir alla letina og dekrið!

Partý með drottningunni

2008-11-17T01:12:00.000-08:00

Hér sit ég á mánudagsmorgni. Bjarni er kominn í leikskólann, Guðni helgargrís les bók og Palli þýðir. Ég er að reyna að koma mér í gang með eitthvað (líklega væri best að halda áfram að semja það sem ég er nýbyrjuð á fyrir harmonikku og slagverk) en athyglin er eitthvað út og suður. Kannist þið við þetta;

"Ég þarf að muna að setja í þvottavél. Hmm, ég kemst ekki í vél fyrr en upp úr kl. 11:00. Jámm. Hér sé ég að ég þarf að fara að skila nótum á bókasafnið. Ætti ég að setjast niður og hlusta og lesa á þær í síðasta sinn áður en ég geri það? Best að fá sér te. Ahh, ég þarf að muna að laga kjólinn minn fyrir partýið með drottningunni. Er ég búin að borða nógu marga ávexti í dag? Ahh, þarf að fara í búð og kaupa í matinn. Hvar var ég nú aftur, hvað er ég aftur að fara að gera núna...?"

Alla vega, ég valdi að byrja á að drekka te og blogga. En á hverju á ég að byrja að segja frá...?

LEYNDÓVERKEFNI:

Það varð ekkert úr því að ég ynni þetta verkefni sem ég var að vonast eftir þannig að þá er ég ekkert að segja meira frá því. Stundum veit ég ekki hversu mikið ég á að ljóstra upp um það sem ég er að vinna í/er að spá í að vinna í, þannig að akkúrat núna er ég fegin að ég var ekki búin að blaðra endalaust um þetta sem ekkert varð úr hvort eð er.

STYKKI FYRIR SLAGVERK OG HARMONIKKU...:

...er hins vegar í vinnslu. Ég er svo heppin að þessir tveir æðislegu spilarar (samnemendur mínir) báðu mig um að skrifa eitthvað fyrir sig. Stuð! Og þar sem þetta eru æðislegir spilarar þá flippa ég endanlega út og er að búa til doldið spes stykki fyrir þau. Þ.e. spes á "klassískan" mælikvarða en kannski bara doldið hversdagslegt á rytmískan mælikvarða. Ég vil ekkert vera að ljóstra of miklu upp fyrr en það er tilbúið en beisikklí þá ætla ég að prófa hvernig kemur út að láta þau impróvisera smá innan ákveðins ramma. Þ.e. ég skrifa nokkra frasa sem þau geta valið frjálst úr og sett yfir ákveðinn grunn. Beisikklí, þá er ég að skrifa fyrir þau likk sem þau geta skellt inn þar sem þau vilja og þegar þau vilja. Þetta er bara tilraun í bili og kannski enda ég með að skrifa þetta alveg út, veit ekki, en gaman að gera smá tilraun fyrst ég er með þessa rooosa góðu og opnu og jákvæðu spilara.

Sannleikurinn er sá að akkúrat þessa dagana er ég pínu leið á "klassísku leiðinni", þ.e. ég sakna þess að vinna með rytmískum spilurum, eða a.m.k. að vinna á þann hátt sem ég vinn með rytmískum spilurum. Mér finnst nefnilega oft að það sé algjör óþarfi að tónskáldið eigi að ráða öllu og að eitthvað stykki þurfi að hljóma nákvæmlega eins í hvert skipti sem það er spilað. Aaaalla vega, ég finn að ég þarf að fá smá útrást fyrir hitt dæmið akkúrat núna.

PARTÝ MEÐ DROTTNINGUNNI OG BAÐAÐ SIG UPP ÚR HUNANGI Á EFTIR:

En annars erum við Palli að fara á vígsluhátíð nýja skólahúsnæðisins á föstudaginn. Þetta verður hið forvitnilegasta því drottningin kemur og það eru alls konar reglur og hefðir í kring um það. Ég er ekki alveg klár á því hvernig þetta allt saman verður, en það litla sem ég hef frétt er að allir verða að mæta hálftíma áður en hátíðin byrjar því reglurnar segja að drottningin á að mæta síðust. Svo verður spilað eitthvað voða royal lag sem er alltaf spilað við svona tækifæri, og svo skilst mér að það eigi að dansa hefðbundinn danskan dans! Hljómar ofsa spennó! Og það besta er að ég get dustað rykið af dýra flotta prinsessukjólnum mínum því þetta er sko eins mikið gala og gala getur orðið. Þarna koma 500 króna silfurskórnir úr Kolaportinu sterkir inn...

Daginn eftir munum við María fara í langþráð og löngu pantað tyrkneskt bað í Holbæk þar sem okkur verður skellt á marmaraborð og við baðaðar með hunangi. Mjög vel við hæfi allt saman. Ef einhver er að hneykslast yfir flottræfilshættinum þá má geta þess að ég er búin að spara sérstaklega fyrir þessu.

Jæja...best að ég fari að...ööö...lesa smá nótur? Jájá, er það ekki bara. Spurning um að velja eitthvað til að byrja á. Svo bröllum við eitthvað skemmtilegt saman á eftir með Guðna helgargrís og Bjarna hversdagsgrís. Það verður nú stuð.

Knús í bili frá ófókuseraða tónsmíðanemanum.

P.S. Ennþá ekki farin að gera neitt af viti. Hér er skemmtilega skrýtið myndband af youtube:

Smá pása

2008-11-07T00:53:00.000-08:00

Ahh. Nú get ég slappað af (í hálftíma fram að útsetningatíma þ.e.a.s. :p).

Ég er búin að vinna eins og vitleysingur fram að þessu en með því móti hefur mér tekist að klára kvikmyndamúsíkina við stuttmyndina, og ég er búin að sjá hana í bíósal kvikmyndaskólans. Gaman. Reyndar hefði verið gaman að fá hana mixaða í alvöru bíó-surround mixi en það var því miður ekki hægt því stúdíó okkar tónsmíðanema er að mestu leyti í pappakössum enn eftir flutningana.

Þess utan er af nógu af taka í öðrum verkefnum...ég veit ekki alveg hversu mikið ég á að ljóstra upp um það. Ég kannski segi bara meira frá því þegar ég fer að vinna í þeim, er það ekki bara. En já, í stuttu máli þá er langur (bið-)listi, og næst á dagskrá er að hnoða saman stykki fyrir harmonikku og slagverk. Svo þarf ég bráðum að fara að vinna í stykki sem á að spila í London í sumar (og líka hér í Köben). Það verður doldið spennó því ég á að semja fyrir Esbjerg ensemble sem er prófessjónal hljómsveit í Esbjerg. Kennararnir mínir hvöttu mig til að skrifa sjálfa mig inn í stykkið, þannig að það verður sem sagt þannig að ég spila með á rafmagnsgítarinn :). Gaman. Hlakka til.

Ég var í kvikmyndaskólanum í fyrradag til að sjá stuttmyndina mína, og líka hvað hinir voru að gera. Við vorum fjögur með sömu myndina og það var mjög gaman að sjá hvernig við höfðum skilið myndina (án tónlistar nb.) á mismunandi hátt. Einn gerði frekar alvarlega tónlist á meðan annar gerði rosalega húmoríska tónlist sem undirstrikaði húmorísku hlið myndarinnar. Ég og annar gaur gerðum ótrúlega svipaða tónlist (þ.e. svipuð stemmning í tónlistinni en allt öðruvísi stíll þó) og settum hana á mjög svipaða staði í myndinni! Þetta var rosa gaman.

Næsta stig í þessu ferli er að vinna með leikstjórnarnemum úr kvikmyndaskólanum. Þar sem við erum átta tónsmíðanemar og sex leikstjórar þá þurfa tveir að bíða þangað til næst. Ég bauðst til að bíða af því að ég hef nóg að gera akkúrat núna (þetta kemur líka inn á þetta sem ég vil ekki ljóstra upp strax. Nei, ég er ekki ólétt).

Þannig að - núna á ég alveg skilið að slappa af.

HESTUR:

Í morgun teiknaði Bjarni þennan flotta hest:

Hann vildi endilega að ég setti hestinn í stígvél. Fyrir utan augað teiknaði Bjarni hestinn alveg sjálfur. Til vinstri má sjá hesthús og ég teiknaði folald inn í það. Hægra megin er sumarbústaðurinn hjá ömmu og afa og Dagnýju sem Bjarni teiknaði, en ég teiknaði hurð og glugga. Uppi í loftinu flýgur flugvél.

Og á morgun verður sko BARA slappað af takk fyrir!

Illa sofinn og úrillur tónsmíðanemi strandaður á kaffihúsi...

2008-11-01T01:28:00.000-07:00

Ég sit á kaffihúsi við Vesterport station og sötra smúþí. Planið var að mæta kl.8:30 upp í skóla og klára að mixa og bánsa kvikmyndatónlistinni með aðstoð upptökunema (fá sem best sánd sko), en...komst að því að...:

...ég man ekki lykilorðið til að komast inn í skólann minn,

lykilorðið er skrifað á gulan post it sem er í gítartöskunni minni sem er læst inni í skóla og

það virkar hvort eð er ekki fyrr en kl. 10, því þá fyrst getum við komist inn.

Jarg!

Þannig að; ég neyðist til að slappa smá af.

Annars hef ég ekkert sérstakt að segja, er bara með hausinn á kafi í músík og afgangsorkan fer í fjölskyldulíf.

Eitt verð ég þó að segja og það er að ég er kominn með ótrúlega of stóran skammt af ákveðinni tegund nútímatónlistar, sem mér finnst hafa tendens til að hljóma óóóótrúlega mikið eins. Ég er ekki að segja að öll nútímatónlist hljómi eins, langt í frá! En það er roooooosalegur tendens hjá mörgum tónskáldum og tónsmíðanemum sem ég hef heyrt verk eftir síðustu 3 daga (og marga fleiri daga....) að skrifa EINS! Úff!

Í gær var ég t.d. á tónleikum þar sem flutt voru fjögur ný verk eftir annars vegar nema úr mínum skóla og hins vegar nema úr skóla í París, og ég er ekki að djóka að þrjú af þessum fjórum stykkjum byrjuðu EINS! Eins í merkingunni:

BOMMMMMMMMMM! (þögn..........) blíngiblíngiblíngiblínk! (snörp þögn) (löng þögn.......) PLÍNK!!!!! (þögn....með efterklang (æ, man ekki orðið). BlíngiblíngiblíngiBLÍNK!!!!

Kannist þið við þetta?

Og annað við sum þessi stykki er að þegar þau virðast ætla að setjast í góðan fílíng þá kemur alltaf eitthvað BOMM eða plíngiplíngiplíngiplíng sem skemmir allan fílíng! Þetta er eins og að það væri alltaf eitthvað að detta í gólfið heima hjá manni og glös og diskar síbrotnandi og maður gæti bara aldrei sest niður með teið sitt og slakað á!

En fjórða stykkið var eftir Christos vin minn hinn gríska, og það var algjört ÆÐI! Pjúra músík og fegurð og hljómaði bara alls ekkert eins og neitt annað. Bara æðislegt! Fullt af karakter (hans karakter en ekki lærðum akademískum karakter (eða -leysi)), ljóðrænt, fallegt, snjallt...o.s.frv.! Og allur salurinn bara sat og naut án þess nokkurn tímann að hugurinn færi að reika eitthvað alllllt annað eins og minn hugur vill stundum gera þegar ég hlusta á eitt af þessum BOMM-plíngiplíngi-stykkjum.

En...fyrst ég er að röfla um tónlist þá langar mig að linka á þessa skemmtilegu bloggfærslu sem útskýrir af hverju Mozart og Yngwie Malmsteen er eiginlega bara sama tóbakið :). Hihihihi...

Annars hef ég það gott :). Er bara að "brokka mig" eins og hinir Danirnir ;)...

P.S. Er kommentakerfið mitt bilað...?

stutt -

2008-10-31T02:56:00.001-07:00

Það er brjálað að gera hjá mér. Blogga almennilega síðar. En aftur á móti langar mig að vekja athygli á þessu:

Fimmtudaginn 6. nóvember næstkomandi verður kynning á verkum Szymon Kuran í verslun 12 Tóna á Skólavörðustíg 15.

Markmiðið með kynningunni er að gefa yfirlit yfir verk Szymon þau tuttugu ár sem hann starfaði hér á landi og kynna þær útgáfur sem til eru á verkum hans.

Kynningin verður eins og áður segir í verslunni á Skólavörðustíg 15. Þar eru verk hans til sölu, kynningarbæklingur liggur frammi allan daginn og nokkrir samherjar hans í tónlist, ljóðlist og sviðslistum verða með kynningu milli kl. fimm (17) og sex (18)

Verk Szymon spanna vítt svið eins og geisladiskarnir sýna: Allt frá tregafullu harmljóði til alvörugefinnar sálumessu, allt frá björtum ævintýrum til eldfjörugrar jazzsveiflu og furðulegustu framúrstefnuverka.

Dagskrá milli 17 og 18 verður á þessum nótum:

*Gerð grein fyrir verkum Szymon sem til eru á geisladislum
*Kvikmyndatónlist - Hilmar Örn Hilmarsson
*Ljóð - Vilborg Dagbjartsdóttir / Karolina Boguslawska
*Jazz og jaðartónlist - Ólafur Þórðarson
Fleiri listamenn koma fram áður en formleg dagskrá hefst.

Fyrir þá sem ekki vita þá get ég ekki verið með af því ég er í Köben ;).

Jæja, vinni vinni!!!!!!!!

Músíkvídeó með Dagrúnu frænku í, mjög skemmtilegt

2008-10-16T04:05:00.000-07:00

Mér datt allt í einu í hug að linka hér á músíkvídeó með dúettnum Ghostigital. Þetta er ofsa skemmtilegt, sniðugt lag og vídeó, og svo skemmir ekki að Dagrún frænka mín leikur í þessu með gjörningahópnum Weird Girls (hún er þessi sem dansar ein).

Ég er ofsa stolt af Dagrúnu frænku, listakonunni ógurlegu. Hún ældi oft yfir mig í gamla daga líka. Og svo er ég líka stolt af hinum "litlu" frænkum mínum, Hildi sellófrænku og Höllu klarinett- og fagottfrænku.

Jæja, ég ætla út að labba í góða veðrinu.

Tónsmíðar og gubb

2008-10-16T02:17:00.000-07:00

Núna er ég loksins búin að klára hörpupartinn fyrir kvikmyndatónlistina mína. Restin af hljóðfærunum eru með mun einfaldari parta og slatta af improvisasjón (ahh, kósý) þannig að ég get unnið restina "ðe Hafdís way". Mjög þægilegt. En tónlistin við síðustu senuna kom til á smá spes hátt:

LÍTIL TÓNSMÍÐASAGA:

Síðastliðinn þriðjudag fór ég snemma á fætur og hjólaði upp í skóla. Þegar í skólann var komið steig ég sveitt og móð af hjólinu, læsti því vandlega og dreif mig inn í skóla til að vinna í fangaklefanum góða. Þegar ég hafði kastað mæðinni og rifið mig úr sveittustu peysunum gerði ég mig líklega til að opna tölvuna og fara að semja. Þá var hún batteríslaus, og þegar ég gramsaði upp rafmagnssnúruna tók ég eftir því að mig vantaði klóna á snúruna. Þetta er kló sem hægt er að færa á milli, ég sem sagt nota sömu kló fyrir gömlu og nýju tölvuna. Og núna var klóin greinilega heima í gömlu tölvunni.

Þannig að ég fór aftur í sveittu peysurnar og út á hjólið. Hjólaði á móti vindi heim að sækja klóna. Hjólaði svo aftur upp í skóla, með vindi að þessu sinni, og inn í fangaklefann.

Í stuttu máli hamaðist ég fram að hádegi við að semja tónlist fyrir þetta viðkvæma atriði, sem er eiginlega aðalatriði myndarinnar. Í hádegishléinu hugsaði ég vel og vandlega um málið og komst að því að músíkin væri algjörlega ónothæf fyrir þetta atriði. Eftir matinn prófaði ég að byrja aftur frá grunni og samdi nýja músík. Um klukkan þrjú komst ég að þeirri niðurstöðu að þessi músík væri ööööömurleg og tók við að reyna að laga gömlu músíkina.

Þegar klukkan var orðin 17:30 gafst ég upp og fór heim. Ég hafði lofað hörpuleikaranum að koma með restina af nótunum daginn eftir, og ég bara varð að láta þetta duga.

Um kvöldið var partý í næstu íbúð og bæði reykingalykt og hávaði barst í gegn um vegginn fram á nótt, þannig að ég náði ekki að sofa nógu mikið. Um klukkan fimm um morguninn vaknaði Bjarni, kveikti ljósið og lýsti því yfir að það væri kominn dagur. Mér tókst að draga hann upp í og fá hann til að kúra hjá mér.

Um hálftíma seinna fann ég eitthvað gumsast yfir andlitið og hárið á mér. Bjarni var búinn að æla framan í mig. Ég stökk á fætur og fram á bað að þrífa mig í framan. Á meðan á því stóð ældi hann framan í sjálfan sig, og svo yfir rúmið og allt sem nálægt var. Ég reif Palla á fætur og við þrifum það allra versta og skiptum um föt á Bjarna og knúsuðum hann.

Um klukkan átta voru Palli og Bjarni í fasta svefni, ég búin að þvo allan æluþvottinn og hengja hann upp, búin að fá mér morgunmat og farin að semja. Klukkan tíu var ný tónlist við viðkvæma atriðið tilbúin og ég sátt. Palli hlustaði á playbakkið með mér og var sammála um að þessi tónlist væri bara fín og virkaði alveg fyrir atriðið. Og svo vaknaði Bjarni, eitt sólskinsbros eftir að vera búinn að jafna sig og sofa vel.

Seinna um daginn, eftir að hafa dúllast með Bjarna heima, hitti ég hörpustelpuna til að prófa nýjustu músíkina, og hún virkaði bara fínt.

Og nú spyr ég mig hvort það að fá ælu í andlitið hafi hjálpað mér að semja!

SMÁ AFSLÖPPUN:

En núna er ég búin að vinna upp tapaðan svefn með því að sofa vel og lengi síðustu nótt. Í dag ætla ég að dúlla mér í rólegheitunum að gera klárt fyrir æfingar og upptökur, og taka til í gömlu tölvunni minni sem er með upptökuforritinu. Og þá er eins gott að muna eftir að skipta um klóna aftur!

ÍSLENDINGAR REKNIR ÚT ÚR BÚÐ Í KÖBEN:

Smá kreppufrétt af mbl.is. Kannski fannst þessum kaupmanni að Íslendingar ættu bara ekkert að vera að splæsa sér í töskur á þessum síðustu og verstu tímum :)...

Kósý og ótrúlega ódýr helgi - símafærsla

2008-10-12T10:41:00.000-07:00

Nú er kreppulaus helgi í anda Sandkastalans brátt á enda en heilbrigður sparnaður og jákvæður hugsunarháttur mun halda áfram hér á bloggsíðu sveittu húsmóðurinnar. Mér datt í hug að skrifa litla símafærslu (=þegar maður notar bloggið sitt eins og síma, að segja fréttir af fjölskyldunni og slíkt) um hvað við erum búin að bralla um helgina.

FÖSTUDAGUR:

Við Bjarni fórum í barnaafmæli. Það var þvílíkt stuð og fjör og íslensk börn hlupu um hlæjandi útötuð í súkkulaðiköku. Ljúft.

Eftir að strumpurinn var sofnaður, "ánægður með afmælið" að eigin sögn (orðrétt) horfðum við fullorðna fólkið á Simpsons, átum nammi og höfðum það huggulegt.

LAUGARDAGUR:

Ég bakaði muffins. Namm jamm!

Palli og Bjarni fóru í hjólatúr út í náttúru með fallegu vatni, og svo á leikvöll. Tóku með sér muffins í nesti.

Á meðan hafði ég það notalegt heima, prjónaði, át muffins og horfði á einn þátt af Matador sem ég fékk á bókasafninu. Munið þið eftir þeim þáttum? Skemmtilega gamaldags og einstaklega kelluvænt. Að sjálfsögðu drakk ég te með þessu.

Við átum góðan mat við kertaljós.

Eftir matinn hoppuðum við Bjarni og skoppuðum og tuskuðumst með blöðrur á meðan Palli þeytti skífum. Stuð!

Um kvöldið skemmtum við Palli okkur á youtube og átum muffins. Rosa skemmtilegur leikur að skiptast á að velja eitthvað til að sýna hinum (báðum). Fjölbreytnin var gífurleg; Bollívúdd, tyrknesk þjóðlagatónlist, Susie Quatro, þýsk slagaratónlist sem snýst um hvað mönnum í lederhosen þykir vænt um fjöll (spurning hvort þetta var þýskt, kannski var þetta austurrískt). Jú neim itt, það er til á youtube.

Hvað eru mörg muffins í því?

SUNNUDAGUR:

Við lituðum í litabók, poppuðum gamaldags poppmaís-popp í potti, horfðum á kósý sunnudagsdagskrá á BBC World og BBC prime, og Bamse og Kylling úr okkar eigin safni.

Svo fórum við Bjarni í dýragarðinn á meðan Palli vann smá helgarvinnu. (Ódýrt, þökk sé reiðhjóli, árskorti og nesti).

Palli og Bjarni léku sér úti í sandkassa á meðan ég bjó til pizzu með ítalska miðalda- og endurreisnartónlist í eyrunum. Ótrúlega kósý.

Og rétt áðan vorum við Bjarni að hafa notalegt og skoða myndir frá dýragarðsferðinni, og líka myndir frá Íslandi síðan í sumar.

Þess má geta að nokkrar myndir frá helginni má finna hér, aðallega hugsað fyrir vini og ættingja. Leiðbeiningar til notkunar fyrir þá sem þurfa: Þegar inn á tengilinn er komið, smellið þá á myndina af slidesmyndatjaldinu (þar sem stendur "slide show", ofarlega til hægri) til að skoða sem slædsmyndir.

OG Á MORGUN:

Á morgun og út vikuna er vetrafrí í skólanum hjá mér. Ég ætla að nota þetta frí í að klára að semja kvikmyndatónlistina, og vonandi byrja smá að taka upp líka. En í fyrramálið ætla ég að taka þetta vetrarfrí út með smá leti og dekri því þá ætla ég að gerast tilraunadýr hárgreiðslunema. Það verður fróðlegt að sjá hvað kemur út úr því, því mér skilst að hún ætli bæði að klippa og lita hárið mitt. Það eru nokkrar "fyrir-myndir" á myndatenglinum, hvur veit nema ég skelli inn "eftir-myndum" á morgun (á sama tengil, getið prófað að skoða hann aftur eftir einn sólarhring).

Ókeypis grams í hárinu á mér sem endar í spennandi óvissuklippingu (og -lit); skemmtó! Og ef þetta verður agalegt þá vex hárið aftur hvort eð er eins og hefur sannreynst áður.

Knús og kveðjur úr fallegu haustveðri og sjarma í Köben.

Tökum bara jákvæðnina á þetta

2008-10-10T06:04:00.000-07:00

SPÚGÍ FRÉTT:

Gríðarlegur vandi námsmanna (af mbl)

Annars fór ég í hraðbanka í dag og gat tekið út á debetkortið, og það meir að segja á "íslenska" genginu (sem er gefið upp í íslensku netbönkunum), "aðeins" 21 íslensk króna fyrir eina danska (sem er actually bara gott miðað við aldur og fyrri störf).

NOKKRIR JÁKVÆÐIR PUNKTAR Í LÍFI MÍNU:

Danska krónan féll smá í dag. Jibbí!

Ég á von á feitum dönskum peningi fyrir gömlu íbúðina mína.

Ísskápurinn minn, frystirinn og allir skápar eru troðfullir af mat (hagsýna húsmóðirin keypti m.a. á tilboði 2 kíló af hakki og 2 kíló af kjúklingi. Ætti að duga aaansi lengi).

Við Bjarni erum að fara í barnaafmæli á eftir. Við ætlum að gefa afmælisbarninu heimaprjónaða vetlinga úr íslenskri ull.

Kvikmyndatónlistin gengur vel.

NÍSKUPÚKINN MÆLIR MEÐ:

Að skemmta sér á ódýran og ókeypis hátt. Ef ég væri á Íslandi þá myndi ég sko þoookkkalega fara í sund (sakna þess rosalega). Hér í Kaupmannahöfn er aftur á móti menningarnótt í dag/nótt og nóg af ókeypis skemmtun í boði (og líka keypis skemmtun ef maður vill það). Mæli með því fyrir (þunglynda?) íslenska námsmenn í Kaupmannahöfn.

Engar fréttir eftir kvöldmat. Þá er hvort eð er búið að loka öllum skrifstofum og stofnunum og enginn getur gert neitt í neinu. Í staðinn fyrir að tékka á genginu á korters fresti er gott að slaka á, kveikja á kertum og hlusta á góða tónlist, heimsækja vini, fara í fallegar gönguferðir, prjóna, horfa á skemmtilegu DVD-diskana sem maður fékk á bókasafninu, lesa bók, skoða myndir, o.s.frv. o.s.frv....

Sem sagt: Við erum bara í góðum gír á þessu heimili og ætlum að taka jákvæðnipakkann um helgina.

Góða helgi öll sömul!

Extra bladet safnar fyrir Íslendinga...

2008-10-08T05:42:00.000-07:00

Jimundur!

Gi’ en skærv til Island

Og hér er "fréttin".

...en ég held þeir geti ekki sagt að báðar þessar lopapeysur séu íslenskar...kannski bara önnur þeirra...

(annars er þetta víst á mbl.is var ég að frétta...jæja...ég ætla að REYNA að einbeita mér).

Smá viðvörun til þeirra sem eru á leið til útlanda...

2008-10-08T02:23:00.001-07:00

Ég opnaði netbankann í dag og var að spá í að millifæra, af því mig fer að vanta danskar krónur. Ég sá að danska krónan var á genginu ca. 20 á íslensku netbönkunum. Bara til öryggis kíkti ég í netbankann hjá Danske bank, bara til að tékka hvort þeir væru sammála þessu gengi. Og vitiði hvað! Þar vilja þeir meina að ein dönsk króna kosti 35,6 íslenskar!

Þetta óttaðist ég. Þó að það sé búið að frysta gengið á íslandi þá er sko ekki búið að frysta það í útlöndum.

Þannig að: Ferðamenn góðir! Þegar þið haldið að þið séuð að kaupa peninga á einhverju gengi skv. íslensku bönkunum, þá er það ekki þannig í praxís gagnvart erlendu bönkunum.

En ekkert vera að hafa áhyggjur af okkur hér. Ég fæ brátt trygginguna mína til baka fyrir gömlu íbúðina, og ég er í sambandi við konu þar sem ætlar að flýta því fyrir mig. Þetta reddast með mig ;).

...en ég hef aðeins meiri áhyggjur af öðrum námsmönnum erlendis...

Aaaallla vega...harpan bíður...og þvottahrúgan reyndar líka. Blöh!

P.S. Á jákvæðu nótunum má segja það að sólin skín, ísskápurinn er fullur af mat og við bröllum margt skemmtilegt og ókeypis :).

Hörpur, rottur og krónur

2008-10-07T12:41:00.001-07:00

KRÓNUR:

Jess! Það er búið að redda þessu.

(Þetta er nú held ég bara besta moggabloggsíða sem ég hef séð. Endilega skrollið niður og lesið meira).

HÖRPUR:

Annars sem ég eins og ég eigi lífið að leysa þessa dagana, kvikmyndatónlistina góðu (eða ég vona að hún verði góð). Í dag hitti ég kínverska hörpustelpu sem ætlar að spila smá part í kvikmyndamúsíkinni minni, og þar sem við ætlum að hittast aftur á fimmtudaginn þá keppist ég við að hnoða saman efni til að láta hana hafa. Veit ekki hvort ég er of bjartsýn að ætla að klára allan hörpupakkann fyrir fimmtudag...en ég reyni.

ROTTUR (ég og hinar):

Ég er búin að taka ástfóstri við hljóðeinangrað, pínulítið, gluggalaust stúdíóherbergi í skólanum mínum. Herbergi þetta hefur verið nefnt "fangaklefinn" af sumum. Mér líður ofsalega vel í þessum fangaklefa og afkasta rosalega miklu þarna inni þar sem það er nákvæmlega ekkert sem truflar, ekki einu sinni kakófónían frá hinum (sem heyrist bara alls ekki þarna). Ég hugsa að það komi ekki einu sinni rottur þarna inn, en mér skilst að þær vaði uppi í skólanum mínum þessa dagana. Og þetta er ekki eini tónlistarháskólinn sem ég hef verið í þar sem sást til rottna...

...eníveis, rottur hafa sinn sjarma, og ég er ofsalega ánægð með báða þessa skóla.

En nú ætla ég að hætta að hugsa um hörpur, rottur og krónur og fara að lúlla.

Við erum búin að kaupa evrur og erum í góðum málum!

2008-10-03T10:16:00.000-07:00

Palli keypti evrur. Svona evrur:

Í stuttu máli þá er þetta marglitt hlaup með áprentuðum evrum.

.

SPARNAÐUR ER STUÐ:

Það þarf alls ekkert að vera leiðinlegt að spara. Í júlí 2006 skrifaði ég færslu um skemmtilega hluti sem hægt er að gera ókeypis í Reykjavík. Í júní sl. skrifaði ég færslu um ókeypis skemmtun og afþreyingu í Kaupmannahöfn. Lífið er ekki búið þó maður þurfi að spara smá, það er svo margt skemmtilegt hægt að gera fyrir lítinn sem engan pening. Svo er bara hollt og gott að staldra við, horfa í kring um sig og slaka á, og það kostar ekki baun.

KREPPULAUS HELGI:

Sandkastalinn hvetur til kreppulausrar helgi. Við tökum þátt í því hér á bæ með því að njóta lífsins um helgina og vera jákvæð. Á morgun er planið að fara í hjólatúr með nesti (ókeypis) og svo á þjóðminjasafnið (ókeypis) og minnast ekki einu orði á efnahagsástandið.

Gleðilega jákvæðnihelgi!

...afrakstur dagsins

2008-10-01T13:12:00.000-07:00

Jæja, ég er búin að sitja í dag og í kvöld og læra á vídeófídusinn í Síbelíusi með ágætis árangri. Ég lærði hvernig maður getur tímasett hlutina frekar nákvæmlega þannig að það sé hægt að spila tóna um leið og eitthvað gerist. Svo exportaði ég midi fælnum úr nótnaskriftarforritinu (þannig að út kom að lokum mp3 fæll) og prófaði að setja tónlistina og myndefnið inn í iMovie-forritið sem fylgdi með tölvunni. Þá datt ég auðvitað í að fara að skoða það líka, rosa fjör. Reyndar sinkar tónlistin og myndin ekki alveg jafn vel í iMovie og þær gerðu í Síbelíus í dag, ég þarf að skoða það eitthvað nánar. Greinilegt að eitthvað breytist þegar maður færir hlutina á milli forrita. En...ég mun að sjálfsögðu ekki spila niðursuðudósasíbelíusarfæl við myndina sem ég er að vinna í (sem er n.b. ekki þetta litla fílavídeó, það er bara til að æfa sig), þannig að þá ætti ég ekki að lenda í þessu. Kannski lendi ég bara í einhverju öðru.

Eeeeníveis, mig langaði bara að sýna ykkur þessa litlu æfingu sem ég bjó mér til í dag. Ég er alla vega búin að læra það sem ég ætlaði mér að læra :), þ.e. að tímasetja nóturnar í nótnaskriftarforritinu nákvæmlega við bíómynd:

P.S. Jarg! Það er pínu ergilegt að sjá að þetta er ekki jafn snilldarlega samtaka og það var í hinu forritinu fyrr í dag! En...ég og þið fáið alla vega einhverja hugmynd um hvernig þetta virkar...

Síbelíus-ofvirkni og Glitnir.

2008-10-01T01:20:00.000-07:00

GLITNISDRAMA:

Ég ætla nú ekkert að segja mikið um þetta því þið eruð búin að heyra allt sjálf hvort eð er. Það eina sem mig langar að segja er að við fylgjumst grannt með þessu og það er ekki laust við smá meðvirkni hér á bæ. Þá er ég ekki bara að meina af því að danska krónan er komin upp í 20 íslenskar (!!!) sem hefur auðvitað bein áhrif á okkur heldur líka bara almenn meðvirkni með hvort þetta var gott dæmi eða slæmt. Vissulega er Ríkið (=við skattborgarar) búið að græða en það er bara af því að einhver annar (=hluthafar, m.a. Baugur) er búinn að tapa. Eins dauði er annars brauð og allt það. En við fylgjumst grannt með þessu öllu saman...

KVIKMYNDATÓNLIST:

Mér gengur bara nokkuð vel að semja kvikmyndatónlistina. Í gær langaði mig til að prófa frábæran fídus í Síbelíus 5 sem ég fékk í fyrra, sem er að setja bíómynd og nóturnar saman. Algjör snilld! Þetta virkar þá þannig að ég get tímasett nóturnar nákvæmlega við myndina, og horft á myndina um leið og ég spila playbakkið (ef maður vill spila playbakkið, það eru jú skiptar skoðanir meðal tónskálda um það. Ég ætla að nota það núna, alla vega sem e.k. beinagrind).

EN - vídeófællinn sem ég fékk með bíómyndunum er mjög óhentugur, það er ekkert hægt að gera við þetta nema horfa á myndirnar í DVD-spilara. Eina lausnin sem ég sé er að senda tölvupóst á kennarann og biðja um myndina sem ég er að vinna með í öðruvísi formatti. Á meðan ætla ég að nota tímann og læra almennilega á þennan fídus með því að leika mér með smá fílavídeó frá því við fórum í dýragarðinn með Bjarna.

Jæja. Best að fara að lesa manúalinn...

P.S. Þessir tveir frasar eru mér ofarlega í huga á meðan ég sem kvikmyndatónlist: "Síbeíus vídeófídus" og "Blúsí múzak með búsúkí". Nördalegt en skemmtilegt...

...bara rétt smá áður en ég kem mér að verki...

2008-09-29T00:38:00.000-07:00

SMÁ HVERSDAGSLEIKI:

Mig langaði allt í einu til að deila þessu með ykkur:

Þetta er ís sem er hægt að kaupa hér í Danmörku (og kannski víðar). Einhverra hluta vegna finnst mér þetta pínu spaugilegt því ég hef hingað til ekki tengt saman norræna goðafræði og dísætan ís. Hvað á vanilla og bleikur jarðarberjaís sameiginlegt með Þór og Óðni?

Eins og sjá má þá er mynd framan á ísboxinu af vígalegum(-ish) víkingi (doldið airbrushaður, en allt í lagi, kannski yrði maður hræddur ef maður mætti honum í dimmu húsasundi) með ís sem skjöld. ÍS SEM SKJÖLD!

Fyrir framan mig hef ég boxið af súkkulaði- og marsipanís sem kenndur er við Óðin (þ.e. þessi bragðtegund heitir "Odin"). Á myndinni er Óðinn með bæði augun, en reyndar er alltaf sama myndin framaná. Kannski er þetta bara einhver ónafngreindur víkingur sem elskar ís.

Bjarni hefur tekið þessi ísbox upp á sína arma þegar við höfum étið allan ísinn, og notar þau sem báta í baði. Þess vegna var það þannig að þegar ég sat í baði í gærkvöldi og var djúpt sokkin í pælingar um hvernig ég á að hafa kvikmyndatónlistina við myndina sem ég valdi mér, að ég las annars hugar á ísboxið. Það sem ég sá var þetta:

"Odin. Konge over liv og død, men også guden for visdom og pølser".

Pølser.

Hið rétta er að þarna stendur "poesi" en ekki "pølser" en ég var bara doldið utan við mig vegna tónsmíðapælinga.

Með þetta í huga ætla ég nú að skella mér í að vinna í kvikmyndatónlist við sniðuga stuttmynd frá kvikmyndaskólanum. Spýti í lófana...

Kind?

2008-09-24T00:52:00.001-07:00

Ég er komin með te í bollan, búin að tengja M-boxið (upptökudótarí) og er aaaaallllvvveg að fara að byrja að vinna í músík. En eins og margir kannast við þá getur verið smá puð að koma sér af stað (...og svo er ég líka með fulla þvottakörfu af skítugum þvotti sem þarf að þvo...). Þannig að hér kemur smá blogg.

VILTU KAUPA KIND:

Dagný systir sendi mér þetta. Fyrst hélt ég að þetta væri grín, en mér sýnist þetta bara vera fúlasta alvara. Eða ekki fúlasta í versta skilningi þess orðs...meira svona...dauðans alvara :D? Neinei, bara djók...alla vega, þetta er alls ekki svo galin hugmynd!

Verst að ég er svo hrikalega mikið borgarbarn og hef aldrei verið í sveit, ég held ég myndi tengjast kindinni minni svo tilfinningalegum böndum að ég gæti bara ekki hugsað mér að borða hana! En ég gæti sko meir en lítið hugsað mér að fá ull af minni eigin kind!!! (...prjónanördinn sko, og (endur-)vinnslunördinn).

Jæja, ég ætla ekki að hafa þetta lengra í dag! Ætla að slá í bykkjuna og klára afmælisgjafir Höllu frænku (varð ellefu ára 5. sept.) og Hildar frænku (varð tvítug í gær, til haaamingju gamla kella sem er nú komin á þrítugsaldur. Híhíhí...). (Sko, upptökudótaríið tengist þessu, það er nefnilega ein upptaka sem á að fljóta með pakkanum...).

...Og svo ætla ég að fara að skoða kvikmyndaverkefnið! Spennó!

Hér er mynd af Bjarna að spjalla við kind á Árbæjarsafni í sumar:

Góðir skór!

2008-09-19T07:25:00.000-07:00

Þetta er snilld:

Oooo...ég sakna íslenskra sundlauga og heitra potta...

Löng dagbókarfærsla að hætti Hafdísar

2008-09-17T01:21:00.000-07:00

Ég sit með einn bát af greipávexti og te og prjóna marmelaði. Bjarni er í aðlögun í nýja leikskólanum sínum, og í gær var hann í fyrsta skipti einn þar í klukkutíma. Þá var ég í fyrsta skipti í tónsmíðatíma hjá Bent Sørensen, og í nýjum kúrsi sem ég er líka í um óhefðbundna nótnaskrift.

En núna er ég ekki í tímum, þannig að ég sit eins og fífl og veit ekkert hvað ég á að gera, eða réttara sagt í hvaða röð ég á að gera það sem ég þarf að gera. Það er ekki vandamálið að ég hafi ekkert að gera, en spurningin er hvað á að gera fyrst!

Þannig að ég byrja á að borða greip, drekka te og blogga smá.

Í FRÉTTUM ER ÞETTA HELST:

Einu sinni las ég í einhverju blaði að maður ætti ekki að nota bloggið sitt eins og fólk notar síma, en mér finnst það svo ofsalega þægilegt af því ég nenni frekar sjaldan að tala í síma. (Ekki það að mér finnst alveg gaman að tala við familíuna á Íslandi í síma og nána vini). Þannig að, hér koma nokkrir símaspjalls-punktar:

Kvikmyndanámskeiðið var algjört æði! Ég hélt reyndar að ég yrði ekki eldri fyrri helming námskeiðsins þegar við sáum aðallega þungar og ofbeldisfullar myndir og horfðum á hrikalegustu atriðin aftur og aftur af því tónlistin í þeim var svo flott! Sem betur fer var seinni helmingur námskeiðsins friðsamlegri ofbeldislega séð, en ekki síður fróðlegur hvað tónlist varðar. Næstu daga á ég að fá þrjár stuttmyndir í hendurnar og af þeim á ég að velja eina til að búa til tónlist við. Ef það gengur vel þá er séns á samstarfi við leikstjórnarnemana í kvikmyndaskólanum í vetur. Hljómar mjööög spennó, og ég vona að það verði eitthvað úr því. Ekki það að ég hef svo sem alveg nóg að gera...en þið vitið, það er varla hægt að segja nei við sumu. (Ég veit hvað þið eruð að hugsa, mamma og pabbi, ég passa að ofhlaða mig ekki).

Daginn sem við horfðum á Psycho týndi ég húslyklunum mínum að nýju íbúðinni. Auðvitað horfðum við nokkrum sinnum á hrikalegustu atriðin úr myndinni, þannig að ég var ekki algjörlega í rónni fyrr en nokkrum dögum síðar þegar húsvörðurinn færði okkur lyklana aftur. Sturtuatriðið, sko...

Á meðan á kvikmyndanámskeiðinu stóð passaði Chrysa hin gríska (kærasta Christosar hins gríska) Bjarna. Þau skemmtu sér konunglega saman, enda er Chrysa ótrúlega góð við Bjarna. Ég held bara svei mér þá að hún komist hvað næst því að koma í staðinn fyrir íslensku ættingjana hvað Bjarna varðar, þó auðvitað komi ekkert alveg í staðinn fyrir þá. Þá meina ég að hún spjallar við hann og knúsar hann og sýnir honum athygli (Christos gerir það reyndar líka), en margir aðrir sem við þekkjum hér eru meira að hitta okkur heldur en hann, og spjalla ekkert endilega við Bjarna ef hann er með. Ég er ekkert að segja að fólk sé leiðinlegt við Bjarna en Chrysa er alveg extra hlýleg og góð við hann og knúsar í bak og fyrir. Og svo höfum við auðvitað Maríu í Svíþjóð í Selfoss-fjarlægð frá okkur, og hún er næstum eins og fjölskylda hérna í næsta landi.

Mér heyrist einmitt Bjarna vera farið að langa til að fara í heimsókn til Maríu, því hann talar stundum um það. Um daginn bjuggum við saman til sögu um fíla sem komu í heimsókn úr dýragarðinum í Kaupmannahöfn til Maríu í Svíþjóð. Bjarni hafði þann fyrirvara á að María þyrfti stærra hús til að fílarnir kæmust inn. Þannig að við létum Maríu stækka við sig í sögunni svo fílarnir gætu komið inn í Maríuhús. Svo fóru María og fílarnir á róló en rólurnar voru of litlar þannig að fílarnir gátu ekki rólað. En þá fóru María og fílarnir upp í sveit ("af því sveitin er stór", sagði Bjarni) og fóru í feluleik og eltingaleik og grilluðu pulsur. Hver fíll át 10 pulsur.

Við erum búin að skila af okkur gömlu íbúðinni! Það er ekkert smá gott að vera loksins búin að því. Við þrifum svo vel að það mætti halda að enginn hefði búið þarna (eða svona næstum því), og svo máluðum við allt hátt og lágt. Það voru engar athugasemdir gerðar við fráganginn, þannig að ég vona að við fáum sem mest af tryggingunni okkar til baka. Gaman að því að við fáum hana í dönskum krónum, gott á meðan gengið er svona eins og það er.

En já, Bjarni er ofsalega spenntur fyrir nýja leikskólanum sínum. Hann fékk ekki pláss á þessum spes leikskóla þarna sem við vorum að spá í, en í staðinn fékk hann pláss á rosalega notalegum litlum leikskóla í göngufæri við okkur. Það er nú eiginlega miklu betra, alla vega fyrir okkur Palla, og á meðan Bjarni er svona kátur með þetta þá er það örugglega best fyrir hann líka! Þessi leikskóli er pínulítill, bara ein deild í íbúð sem hefur verið breytt í leikskóla. Allir krakkarnir þarna eru tvítyngdir og það er sérstök áhersla á tungumálaþjálfun þannig að það gæti ekki verið betra. Bjarni er svo sáttur við þetta að hann suðaði í gær að fara á nýja leikskólann, og svo suðaði hann aftur í morgun. Bara snilld!

Á nýja leikskólanum er pláss fyrir 20 börn, en eins og er eru aðeins 14 börn skráð þarna. Ég var að forvitnast aðeins af hverju það gæti verið, og mér var sagt að ein af ástæðunum er að margir danskir foreldrar vilja ekki setja börnin sín á leikskóla þar sem stór hluti barnanna eru tvítyngd. Ástæðuna segja þeir vera að þeir telja að börnin sín læri verri dönsku en ella. Í staðinn (og nú kemur það skrýtnasta) keyra sumir foreldrar börnin sín til Svíþjóðar í leikskóla. Ekki held ég að þau læri mikla dönsku á því, með fullri virðingu fyrir sænskum leikskólum sem eru örugglega æðislega góðir. Spes...eitthvað skrýtinn fílíngur á þessu (múslímafóbía?). Við Palli og Bjarni erum alla vega mjööög sátt við leikskólann og stemmningin þarna er góð og heimilisleg.

Best að enda þessa færslu með ljósmynd af spjaldi sem er notuð í klósettþjálfun á þessu heimili. Þegar Bjarni pissar í klósettið þá fær hann að líma límmiða á myndina. Hvort sem þetta virkar eða ekki uppeldislega séð þá er þetta gaman fyrir alla hlutaðeigandi.

Eins og sjá má þá er þarna búið að vígja spjaldið með rauðum pallbíl sem Bjarni setti vandvirknislega í grasið. Myndin af Bjarna var tekin í sumar þegar hann var að hjóla rétt hjá ömmu- og afahúsi en myndina af fílnum fengum við á netinu.

Og nú ætla ég að fara að...útbúa tónsmíðaaðstöðu? Taka til? Brasa í skriffinsku? Mixa upptökur? Hverju á maður nú að byrja á...

P.S. Þessu nappaði ég af blogginu hennar Elínar: "Fjármálaráðherra, sem er dýralæknir með jafnlangt nám og ljósmæður á bakinu metur það hærra í krónum talið að draga kálf úr belju en að taka á móti mannfólki". Snilldartilvitnun! Mér finnst að ljósmæður eigi að fá þyngd sína í gulli í laun! Og ef það er ekki hægt, þá eins góð laun og hægt er! Ef það er einhver starfstétt sem á það skilið þá er það þessi, bílíf mí!!!

Afmæli og stuttar fréttir

2008-09-04T14:31:00.001-07:00

AFMÆLI:

Hæ. Lati gaurinn hérna. Sko, ég er smá löt...ég er að útbúa mér svona "birthday reminder", og ég nenni ekki að senda her manns e-mail um að fylla út hvenær þeir eiga afmæli, þannig að í staðinn geri ég þetta:

Þeir sem lesa þessa færslu og ég þekki persónulega mega taka eftirfarandi til sín;

Hello

I am creating a birthday calendar for myself. Can you please click on the link below and enter your birthday for me?

http://www.birthdayalarm.com/dob/63903460a336361708b363

Hafdis

FRÉTTIR:

Við erum öll komin aftur til Danmerkur síðan síðasta færsla fór í loftið.

Við búum núna í lítilli en ofsalega notalegri íbúð nyrst í Nørrebro. Tveimur húsnúmerum frá okkur breytist hverfið í Østerbro, þannig að við erum alveg á grensunni.

Bjarni fékk óvænt sinn fyrsta gítartíma áðan :). Hann var að gramsa í gítar og ég tók eftir að það sem hann spilaði líktist "Gling gló, klukkan sló", þannig að ég settist niður með hann og gerði tilraun til að kenna honum það (þ.e. bara þennan frasa). Það gekk bara fínt og Bjarni sýndi þessu áhuga, þannig að hver veit nema maður gauki að honum einhverju svona þegar og ef stemmningin leyfir. Bara að passa sig að þetta sé bara gaman og nákvæmlega engin pressa (meira svona hvatning en pressa ;)). Það hlaut að koma að þessu, ekki satt...?

Skólinn er byrjaður. Þessa fyrstu viku hefur Bjarni komið með mér í skólann með misjöfnum árangri. Sem betur fer hefur prógrammið verið guided tour um skólann og eitthvað slíkt. Í dag þurfti ég (og allir hinir) að hlusta á kennara útskýra bókunarkerfi og innranetið, þannig að við entumst 15 mínútur í þeim tíma áður en ég fór fram með Bjarna svo við trufluðum ekki kennsluna.

Ég vona að leikskólinn sem við vorum að sverma fyrir (þessi leikskóli er með deild sem myndi henta Bjarna mjög vel) hafi samband sem fyrst. Það átti að vera fundur í gær um inntöku nýrra barna og við bíðum bara eftir niðurstöðum. Ef við fáum nei þar þá munum við sækja um leikskóla sem er mjög nálægt okkur hér. Þangað til við fáum svar þá er Bjarni viðhengi mitt á skrifstofu- og skólatíma.

En í næstu viku fer ég á massíft "hands-on" kvikmyndatónlistarnámskeið sem ég má ekki missa af, og þá ætlum við að greiða barngóðri vinkonu okkar til að passa Bjarna á meðan. Ég bara má ekki missa af þessu námskeiði, ooofsa spennó og gagnlegt.

Og á morgun er ekkert að gerast hjá okkur Bjarna í músíkskólanum þannig að við ætlum að hitta Dídíu frænku í brönsj og skemmtilegheitum, ásamt Palla sem var að skila af sér verkefni (en tekur svo til við þrif í gömlu íbúðinni í fyrramálið)...

...en þessa dagana skiptumst við á að skreppa þangað og þrífa á meðan hitt okkar sér um Bjarna og bú.

Sem sagt...bara svona smá fréttabréf. Og já, bæ ðe vei, Ísland var æði. Líka gott að vera hér. Hlakka til að koma aftur heim um jólin, en hlakka líka til að takast á við lífið hér í Köben.

Hér má sjá gamla mynd af tónleikasal skólans míns. Skólinn minn er fluttur í gamla útvarpshús Danmarks Radio í Fredriksberg. Þetta er ekkert smá geggjað hús í rosa flottum stíl. Bygging hússins hófst 1936 og fyrsta útsending var árið 1940. Eeeníveis, húsið er sem sagt í ótrúlega gellulegum næntís-þörtís-stíl sem ég er alveg að missa mig yfir, og það er hrein unun að vera þarna! Til dæmis kemur matsalurinn einstaklega sterkur inn; maturinn er æði og ódýr, þakgarðurinn út frá matsalnum er fáránlega kósý og svo er skemmtilegt málverk í matsalnum eftir Folmer Bendtsen (sem er víst einhver gaur sem ég gúglaði). Ekkert smá flott orgel maður!

Menningarnótt - síðustu forvöð!

2008-08-20T15:56:00.000-07:00

Eins og oft áður þá er ég að brenna á tíma að hitta alla sem mig langaði að hitta áður en ég færi aftur út til Köben. Þar sem skipulagið er algjörlega pakkað og stútfullt þá langar mig að benda öllum sem langar að heilsa upp á mig að kíkja í bæinn á menningarnótt, þá er góður séns að rekast á mig einhvers staðar, sjá mæspeisið mitt.

Hér er smá forsmekkur af því hvað við Sandra, og við Dagný, og við Moskvitsj, erum að bralla á menningarnótt, sem er núna á laugardaginn:

Kannski smá falli, ég verð ekki með kassagítar á laugardaginn, vá hvað ég fæ alltaf mikinn bjánahroll að sjá sjálfa mig í sjónkanum!

("...þetta verður svona tónlistargjörningur með landslagi!" JARG! ÖFUGT! Ég ætlaði að segja landslagsgjörningur með tónlist!!!)

Aaaalla vega, það hefur ekki gefist mikill tími til bloggs en verður kannski meiri tími og orka í það þegar ég er komin aftur út. Sjaaaaáááááuuuum til. Ég fer aðfaranótt sunnudags. Ég er strax farin að sakna alls...

Breytingar, breytingar...

2008-07-22T05:41:00.000-07:00

Það er smá bloggleti í gangi hérna þessa dagana. En hér kemur smá fréttabréf með þeim fréttum sem ég man eftir núna þessa stundina.

HEIMFERÐ:

Eftir akkúrat viku förum við Bjarni litli í frí til Íslands og verðum í næstum mánuð. Á meðan ætlar Palli að gæta bús í Kaupmannahöfn og undirbúa flutninginn á nýja staðinn. Ég hlakka agalega til að hitta alla sem ég sakna og sjá smá náttúru og drekka gott vatn.

BREYTINGAR:

Eins og sagði í einhverri annarri færslu þá erum við að fara að flytja í aðra og mun ódýrari íbúð. Planið er að geta farið öll beint inn í nýju íbúðina um leið og við Bjarni komum frá Íslandi. Palli og Christos hinn gríski ætla að hjálpast að að græja flutninginn.

En það eru fleiri breytingar. Bjarni mun fara á nýjan leikskóla, því hann er líka hvort eð er að vaxa upp úr vöggustofunni sem hann er á núna. Það lítur allt út fyrir það að hann fari á leikskóla doldið langt frá okkur sem er með smá svona sérkennsluprógramm, alla vega til að byrja með, af því Bjarni er að ströggla við tvö tungumál og allir mögulegir fagaðilar hafa mælt með því við okkur að setja hann í þetta. Við vitum ekki hversu lengi hann þyrfti að vera í þessu prógrammi en ef vel gengur þá útskrifast hann barasta fljótt og vel og getur farið á leikskóla rétt hjá okkur. Kemur allt í ljós.

Og svo er skólinn minn að flytja líka! Hann er fluttur frá gamla staðnum og fer í útvarpshúsið í Fredriksberg. Danmarks Radio er flutt í eitthvað hús sem mér skilst að hafi verið mikið í fréttum af því það fór svo langt fram úr kostnaðaráætlunum. Ég hef ekkert heyrt þetta, fylgist ekkert með...

MÆSPEIS:

Ég er aðeins búin að uppfæra mæspeisið mitt. Þarna má t.d. sjá froskamyndbandið sem Gísli Darri gerði.

WORLD SYMPOSIUM ON CHORAL MUSIC:

Ég er búin að vera að sniglast í kring um þessa stóru ráðstefnu síðustu dagana. Datt aðeins inn í að aðstoða Hildigunni við að kynna íslenska tónlist fyrir tónverkamiðstöðina. Rosa gaman að heyra Hamrahlíðarkórinn syngja, og líka nokkra aðra kóra. Það er ekki hægt að neita því að þessi kór hljómar aaansi vel. Og svo hitti ég fullt af fólki í tengslum við þetta, gaman að því.

SEMJ:

Popplagið er aðeins í salti, held ég þurfi að gera doldið mikið við það til að mér finnist það þvottekta. Þess í stað vinn ég í músík til að spila með Söndru á menningarnótt, laginu fyrir Christos hinn gríska og lokaverkefninu mínu. Einhvern veginn finnst mér virka doldið vel þessa dagana að vinna svona í nokkrum ólíkum verkefnum í einu, þá get ég melt eitthvað sem er að gerast í einu laginu og á meðan unnið í einhverju öðru atriði í öðru lagi. Spes en virkar.

MYNDIR:

Best að enda þessa færslu á tveimur listaverkum eftir grislingana:

Þessi mynd er þannig gerð, að Bjarni sat og teiknaði þetta hægra megin á myndinni. Svo túlkaði Guðni þá mynd með því að teikna myndina vinstra megin. Rosa flott og skemmtilegt:

Þessa mynd hér teiknaði Bjarni litli í gær þegar hann var að borða hafragrautinn sinn. Fyrst gerði hann hring og svo mikla hrúgu inni í hringnum. Myndin heitir "Hafragrautur":

Sjáumst eftir viku (eða fljótlega eftir það)!

María Lundastelpa á ferð og flugi

2008-07-03T10:46:00.000-07:00

Mig langaði bara að benda ykkur á bloggið hennar Maríu, hún er í þvílíkum svaðilförum þessa dagana. Myndirnar hennar eru æðislegar, endilega tékkið á þeim.

Annars sit ég úti á svölum og hlusta á Síbelíus (tónskáldið) og les nótur með. Er djúpt sokkin í verkið "En saga", rooosa flott og roooosa flott orkestrasjón.

Og nú er Guðni helgargrís á leiðinni aftur til Íslands eftir rúman mánuð hér hjá okkur. Á næstunni munu birtast myndasögur eftir hann hér á bloggi sveittu húsmóðurinnar, sem er vissulega extra sveitt núna í steikjandi sól og hita...

P.S. Og svo er Sandra selló- og jarðfræðidúlla líka oft með hressandi útivistarfærslur, gaman að þessu. Maður drepst úr heimþrá...

Ég auglýsi eftir ljóði eða texta!

2008-07-03T05:09:00.001-07:00

LAG OG LJÓÐ:

Í tengslum við síðustu færslu langar mig til að auglýsa hér með eftir ljóði eða góðum texta á íslensku til að nota við lag sem ég er að semja. Ég heyri fyrir mér eitthvað frekar "hversdagslegt" eða "casualt", þ.e. ekki eitthvað voða háfleygt. Hér eru dæmi um það sem ég er EKKI að leita að:

Þunglyndislegt ljóð.

Ljóð um fagra náttúru (nema það sé smá "tounge in cheek" í því, einhver smá kúlheit. Þ.e. ekki neitt titrandi smáblóm og svoleiðis).

Upphafin ljóð um pólitík eða rosa vandamál og slíkt.

Hjartnæm ljóð um eitt eða annað.

Kannski er ég að leita að einhverju svona:

Ljóð eða texti sem á stoð í hversdagsleikanum. Má kannski vera nett hressilegt, jafnvel doldið rytmískt í sjálfu sér.

Nútímaleg stemmningsljóð, eins og t.d. "partýstemmning", útilegustemmning, eða bara stemmning við að rölta í bænum eða keyra í bílnum sínum. Eða bara hvað sem fólki dettur í hug. Má vera pínu spes, ekki of "beisikk" ;). Yrkisefnið má vera beisikk en efnistök og orðanotkun mega vera frumleg og skemmtileg. Eins og hjá t.d. Einari Má sem semur svo hrikalega skemmtileg ljóð um hversdagslega hluti. Fattiði hvað ég er að meina?

Súrrealísk ljóð eða algjör rugluljóð, jafnvel kitch og hallærisleg ljóð. Já, mér dettur í þessu samhengi í hug keppnin "versta ljóð ársins" eða hvað hún nú heitir! Það finnast mér ofsalega skemmtileg ljóð!

Æjá, það væri allra best að fá virkilega flottan texta á íslensku. Beisikklí þá er ég að leita að einhverju í hressari kantinum frekar en eitthvað þungt, þar sem lagið er nett hresst. Samt má þetta líka vera "neikvætt" ljóð ef það er smá húmor í því þannig að það passi við lagið. Og svo þurfa öll erindin ekki að vera jafn-hress, má alveg vera munur á erindunum.

SIBELIUS:

En núna ætla ég að hlusta á Síbelíus (ekki tölvuforritið heldur tónskáldið) og lesa nótur með. Kannski jafnvel úti í sólinni...mmmm...

P.S. Ekkert vera að eyða orðum á það að ég eigi bara sjálf að reyna að semja texta! Ég er ekkert að eyða tíma í að búa til eitthvað leirhnoð, það er til fólk sem er með mun meiri hæfileika en ég á þessu sviði og ég vil frekar virkja það! Þetta er svona eins og það að reyna að klippa hárið á sjálfri sér versus það að fara á virkilega góða hárgreiðslustofu ;).

Popplag

2008-07-02T05:34:00.000-07:00

ALLT GOTT:

Jæja, þá eru námslánin komin inn og allt skólaárið frágengið. Prófin mín eru yfirstaðin og ég komst rosalega vel frá þeim, alveg sátt. Ég er komin í "sumarfrí", sem þýðir að ég reyni að vinna áfram í lokaverkefninu mínu, en einhvern veginn tekst mér alltaf að eyða dögunum í eitthvað annað. Sem þýðir að allt annað en lokaverkefnið mitt er í þvílíkri röð og reglu og önnur prójekt ganga ofsalega vel. Og núna er ég alveg að toppa sjálfa mig:

POPPLAG:

Undanfarið hef ég hrokkið upp, þegar ég hef verið í þann veginn að sofna á kvöldin, með lög í hausnum. Þetta gerist alltaf öðru hvoru en einhvern veginn er þetta extra mikið núna þessa dagana. Stundum skrifa ég þessi lög niður sem virka alltaf æðisleg þegar mig er að dreyma þau og alveg til þess fallin að vinna júróvisjón eða eitthvað álíka (og stundum fjalla einmitt draumarnir um það að ég er að búa til júróvisjónlag og útsetja það). Svo vakna ég og skrifa þau niður, annað hvort að morgni eða áður en ég sofna alveg ef þetta gerist svona rétt áður en ég sofna. Svo þegar ég kíki á lögin síðar þegar ég er fullkomlega vakandi og búin að fá te og morgunmat þá virka þau einhvern veginn ekki eins æðisleg eins og þegar þau voru búin til milli svefns og vöku.

Í gærkvöldi dreymdi mig svona lag þegar ég var í þann veginn að sofna, fór fram og tússaði það aftan á batteríspakka í myrkrinu. Svo þegar ég skoða það núna þá finnst mér þetta bara ágætis lag, þarf bara að vinna það aðeins áfram og útsetja vel. En ég er strax farin að máta texta við það, og það er ótrúlegt að nánast hvaða orð sem er með nánast hvaða atkvæðafjölda sem er virðist ganga við þetta lag! Ótrúlegt!

Svo er bara spurning hvað ég geri við þetta lag. Þetta er ekki í karakter við neitt annað sem ég hef samið og passar ekki fyrir hefbundið Hafdískt settöpp, en ég heyri alveg fyrir mér vana poppflytjendur flytja það. Þetta er doldið spes og óvenjulegt og pottþétt að þetta er hvergi stolið eða fengið að láni en samt mjög grípandi og poppað þó ég segi sjálf frá.

Aðalmálið með svona lag er að drepa það ekki með vondri útsetningu, og passa jafnvægi milli allra hluta! En svo er bara spurning hvað ég geri við lagið...

P.S. Við erum búin að fá aðra og mun ódýrari íbúð í Köben, flytjum í haust. Góðar fréttir!

Krónupóker

2008-06-20T02:34:00.001-07:00

GENGIÐ:

Ég var rétt í þessu að millifæra pening inn á danska reikninginn okkar. Ef ég hefði millifært nokkrum mínútum fyrr þá hefði ég tapað 3.000 kalli. Ef ég hefði millifært nokkrum mínútum síðar þá hefði ég grætt 4.000 kall. Hefði ég millifært í gærkvöldi þá hefði ég tapað 7.000 kalli.

Annars lítur hún vel út núna, blessuð krónan (16, 6 dkr.), miðað við hvernig hún leit út í gær (17,2 dkr.)! Mér finnst ég ekki gera neitt þessa dagana nema fylgjast með hvernig henni líður, blessaðri. Hugsa sér að fyrir ári síðan var hún um 11 dkr. Og með þessari millifærslu er ég búin að "tryggja mig fyrir gengissveiflum" í rúman mánuð.

JÁKVÆÐNI:

En hvernig sem krónunni líður, þá er veðrið gott og ég er nýbúin að baka brauð og kökur, því þegar krónan er eitthvað lufsuleg þá svarar maður bara með því að BAKA kökur í staðinn fyrir að KAUPA kökur. Og svo má borða plokkfisk í staðinn fyrir sushi. Ég kaupi líka bara ódýra uppþvottavélaefnið í staðinn fyrir dýra uppþvottavélaefnið. Og hér í Köben má finna heilmargt ókeypis og ódýrt að bralla:

NÍSKUPÚKINN Í KAUPMANNAHÖFN:

Hér eru nokkur góð ráð til ferðamanna sem keyptu sér ferð til að versla á Strikinu en sjá svo núna að það er eiginlega bara betra að versla á Laugaveginum akkúrat núna. Ferðin er ekki til einskis, því í staðinn er hægt að:

Fara á Bakkann. Samnemendur mínir segja mér að þeir fari aldrei í Tívolí, af því það er dýrt. Það kostar inn og svo þarf maður líka að borga í tækin. Þeir fara hins vegar á Dyrehavsbakken, því þar er ókeypis inn og ekki síður gaman en í Tívolí.

Það er ókeypis á Glyptotekið á sunnudögum. Þetta er ofsalega flott safn og skemmtilegt að ráfa þarna um sali og skoða allt frá múmíum upp í graffití.

Fleiri söfn eru með ókeypis á vissum vikudögum, hægt er að gramsa á þessari frábæru vefsíðu og finna allt mögulegt praktískt og skemmtilegt ef maður er ferðamaður í Köben.

Fara á baðströnd í góðu veðri. Algjört æði, og mjög vinsælt hjá ungviðinu hér á bæ.

Fylgjast vel með hvað er um að vera, til dæmis á þessari vefsíðu hér:kulturnaut.dk. Hér má oft finna eitthvað spennandi að sjá og bralla, og margt er ódýrt og ókeypis.

Fara á Skt. Hans dags brennu um helgina. Þetta er e.k. miðsumarnæturgleði með bálköstum og fjöri (að sjálfsögðu ókeypis). Hljómar vel, hver veit nema maður skelli sér.

Fara á Copenhagen Jazz Festival í júlí. Hér er margt að sjá og heyra, allt frá heimsþekktum stórstjörnum til minna þekktra tilraunabanda. Ég segi fyrir mitt leiti að mig langar mest að fara á tónleika með minna þekktu böndunum og skoða hvað er forvitnilegt á seyði í grasrótinni. Svo er hægt að virkilega rýna niður í grasrótina með því að setjast á gras í einhverjum garðinum og hlusta á ókeypis útitónleika.

Fara á flóamarkað. Ég mæli með flóamarkaðnum á Israels plads á laugardögum. Hann er algjört æði, og oft hægt að gera reifarakaup. Ég keypti mér í fyrra þennan líka fína handsaumaða borðdúk á stofuborðið fyrir 200 íslenskar krónur. Ekki var það nú mikið.

Flækjast um allan bæ á sunnudögum í júní, því þá klippir maður bara einu sinni í strætónum/lestinni. Þetta er kallað "langur sunnudagur" og virkar þannig að maður borgar fyrstu ferð dagsins og flækist svo bara allan daginn á sama miðanum. Snjallt!

Labba um og skoða fallegu húsin, kostar ekki baun. Mig langar til dæmis alltaf að fara til Dragør, sem er sætur bær stutt frá Köben. Ég get meir að segja tekið strætó þangað heiman frá mér.

Og eitt gott fyrir íbúa Köben: Það er rosa gaman að fara á lókal bókasafnið sitt með litla strumpinum sínum. Bjarna finnst fátt skemmtilegra en að leika sér á bókasafninu í öllu dótinu sem þar er að finna, lesa bækur með mömmu og teikna. Afrakstur bókasafnsferðar gærdagsins má sjá hér:

Krókódíll étur appelsínur bak við tré, eftir Bjarna og Hafdísi (sem teiknaði reyndar bara tennurnar, augað og appelsínurnar og litaði krókódílinn smáveigis, Bjarni teiknaði allt hitt):

Góða ókeypis helgi!

P.S. Og núna að þessari bloggfærslu lokinni er krónan aftur farin í þá upphæð sem hún var á þeirri mínútu sem ég millifærði áðan...

Gleðilegan kvenréttindadag frá Líbanon

2008-06-19T01:18:00.001-07:00

GIRL POWER Í LÍBANON:

Gleðilegan kvenréttindadag! Vinnudagurinn minn í dag hófst á því að skoða bráðskemmtilegt tónlistarmyndband frá Líbanon. Þetta sameinar heimstónlistaráhugann og seventísnostalgíuna sem ég er í þessa dagana. Óóótrúlega spes, og bæði kúl og hallærislegt á sama tíma. Ohh...ég vildi að ég ætti svona föt, sérstaklega svarta og rauða bolinn sem ein konan er í.

Takið eftir drastískum kaflaskiptum! Og í tilefni kvenréttindadagsins: Takið líka eftir að öll hljómsveitin eru kellur. (Kannski voru það ekki þessar kellur sem spiluðu lagið inn, bara einhverjar aðrar kellur. Ég get nefnilega ekki betur séð en ein þeirra sé að mæma gítarlínur á bassa! Lítur bara frekar spes út, ja hérna.):

"Do you love me" frá Líbanon.

En já, kelludagurinn rokkar feitt, og ég hvet alla til að hlúa að kellunni í sjálfum sér.

STUTT:

En annars er ég bara að dúlla mér í bókhaldi, húsverkum, tónlistargrúski, prófundirbúningi o.fl. Prófin sem gleymdust verða í næstu viku, og þá vona ég nú að allt verði ókei gagnvart LÍN.

Og svo eru Heimir bróðir og fjölskylda stödd í Köben núna. Þau komu í mat í gær, og svo ætlum við að bralla eitthvað skemmtilegt saman á meðan þau eru hér. Rosa gaman.

TIL MARÍU:

Jibbí! Sænska blettavefsíðan (með húsráðum um hvernig á að ná blettum úr taui) svínvirkar! Ég prófaði þetta í gær. Algjör snilld! Takk, María!

Umhverfisvænt endurvinnsluföndurhorn Hafdísar

2008-06-17T00:53:00.000-07:00

FÖNDURHORN HAFDÍSAR - ENDURVINNSLA:

Fyrstu fjórir mánuðir ársins fóru aðallega í að djöflast og stressa sig á sinfóníustykkinu mínu. Fimmti mánuðurinn fór í að vera búin á því. Núna í júní er ég hins vegar full af orku og hugmyndum!

Ég er hrikalegur nörd fyrir endurvinnslu og safna alls konar drasli eins og áður hefur komið fram (María, Aðalheiður og mamma (og jafnvel fleiri) kinka núna kolli). Þegar tau eyðileggst, hvort sem það eru föt, sængurver eða handklæði, þá finnst mér alltaf ótrúlega leiðinlegt að henda því beint í ruslið. Oftast ríf ég þetta niður í tuskur, en í vetur hef ég að gamni geymt ónýt rúmföt með það í huga að föndra úr þeim seinna. Hér er hugmynd:

Hægt er að rífa rúmföt niður í strimla og hekla úr þeim. Best er að nota ofur-grófa heklunál (ég á ekkert grófara en nr. 5, hugsa að ég fjárfesti í númer 7, eða 8, það ætti að duga). Það sem mér datt í hug var að hekla í hring, og þá er t.d. hægt að gera allt frá lítilli körfu upp í stóra mottu. Svo er líka hægt að hekla ferkantað, þá er t.d. hægt að gera dyramottu, eins og á svalir eða við útidyr.

Til að hekla hring má notast við þessa uppskrift sem ég fann á vefsíðu Tinnu (prjónaklúbbsins+garnheildsölunnar). (Þarna eru líka fleiri uppskriftir fyrir fólk í föndurstuði). Ef maður vill hekla kringlótta mottu þá heldur maður bara áfram í sama dúr eins og uppskriftin gefur til kynna, skýrir sig nokkurn veginn sjálft. Ef maður vill hekla körfu þá hættir maður bara að auka í þegar manni finnst botninn orðinn nógu stór og heklar í hringi án þess að breyta lykkjufjölda (nema auðvitað maður sé agalega snjall og vilji móta körfuna voða flott, um að gera að prófa sig áfram).

Hér má sjá snýtubréfakörfuna mína (fyrir notuð snýtubréf, ég er með doldið gróðurofnæmi núna), hún er ekki alveg tilbúin en gefur einhverja mynd:

Við þá sem ætla að prófa þetta segi ég: Gangi ykkur vel.

Við þá sem ætla ekki að prófa segi ég: Eigið þið ónýt rúmföt til að gefa mér? Mig vantar meira til að geta haft fleiri liti, ég á bara þessi tvö sem eru á myndinni! Má vera hvítt, skræpótt, í öllu mögulegurm litatónum, upplitað, alla vega...

Búin að kaupa flugmiða til Íslands

2008-06-16T03:08:00.000-07:00

Jæja, þá er ég búin að kaupa flugmiða fyrir okkur Bjarna til Íslands í sumar. Palli ætlar að verða eftir í Köben og vinna, enda fór hann einn til Íslands um páskana og ekki með jafn mikla Íslandsþörf og ég. Við Bjarni komum þriðjudaginn 29. júlí og förum aftur til Köben sunnudaginn 24. ágúst, strax eftir menningarnótt.

Ef einhver veit um eitthvað spilerí fyrir mig á meðan ég er á Íslandi, þá endilega látið mig vita. Ég væri meir en lítið til í að taka gigg með vinum og kunningjum. Eitt er víst að það verður eitthvað spilerí á menningarnótt, en ég er auðvitað alltaf til í meira...

Ji hvað ég hlakka til að koma heiiim, og að sjá ykkur öll! Knúúúús...

Meira Bollívúdd...

2008-06-15T10:53:00.000-07:00

...já...það er þessi tími mánaðarins og ég er í þvílíku svona stuði! Saturday Night Fever í gær og Bollívúdd í dag. En þetta lag er æðislegt, vídeóið vissulega skemmtilega...eitthvað...en lagið er æði. Ég alla vega fæ smá gæsahúð, og ekki "på den dårlige måde" heldur hinsegin.

Hér er meira Bollívúdd.

Engrish

2008-06-14T15:23:00.001-07:00

Guðni helgargrís benti mér á þessa vefsíðu og við erum búin að sitja hérna grenjandi úr hlátri á frekar rólegu laugardagskvöldi yfir frekar steiktum þýðingum á ensku úr asískum tungumálum. Gaman! Hér koma þrjú góð sýnishorn:

Alltaf gaman að skrýtnum þýðingum. Ég man líka eftir að hafa lesið furðulegar leiðbeiningar á ensku á Íslandi, ekki síst í sundlaugum. Hafið augun opin...

Satuday night fever

2008-06-14T13:46:00.000-07:00

Ég verð bara að deila þessu með ykkur:

Ég sit niðri hjá nágrannakonu minni í þeim tilgangi að hleypa kettinum hennar inn. Ég er með kveikt á sjónvarpinu með stillt á VH1, sem er svona ellismellatónlistarstöð. Allt í einu fékk ég þá flugu í höfuðið að horfa á atriði úr kvikmyndinni Saturday Night Fever á Youtube, nánar tiltekið afskaplega yndislega bjánahrollslegt atriði þar sem allir fara að dansa sama dansinn úti á dansgólfi með reyk og alles. Maður fær þvílíka "gåsehud på den dårlige måde", en það er það sem Danir segja þegar þeir meina "bjánahrollur". Góður frasi.

En alla vega, ég sat og horfði á þetta á youtube. Þegar klippunni lauk leit ég upp á sjónkann og sá að BeeGees voru komnir í imbann. Ég hækkaði og viti menn! Sama lagið!

Ég held þetta sé svei mér þá uppáhalds dansatriðið mitt úr bíómynd ever, svo oooofsalega lummó og grípandi á sama tíma. Eitt af markmiðum mínum í lífinu er einmitt að læra þennan dans einn góðan veðurdag og beita honum við gott tækifæri. Ahh...mig langar að læra daaaannnnssss....

Hér er þetta, njótið vel. Góða helgi.

P.S. Og þetta er náttúrulega flottasta Beethoven útsetning ever! Dásamlega súrt vídeó :p...

Á trúnó í ljósaskiptunum

2008-06-11T13:18:00.000-07:00

FEGURÐ:

...ég var að skoða vef Heimilisiðnaðarsafnsins á Blönduósi og rakst þar á hlekk yfir á vefsíðu Steinunnar fatahönnuðar, sem hannar einmitt mjög flott föt. Og þar inni rakst ég á haustlínuna 2007, sem er rooosalega flott. Myndirnar tók Mary Ellen Mark. Pjúra fegurð.

En Heimilisiðnaðarsafnið er líka pjúra fegurð, ég hvet alla til að skoða það! Mér er þetta safn mjög ofarlega í huga vegna þess að ég sæki innblástur í það fyrir stykkið sem ég er að vinna í, þ.e. Álaborgarstykkið. Það sem var spilað í Álaborg var í rauninni bara einn kafli af mörgum ;). Þess vegna er ég ekki búin að kjafta frá öllu saman strax, er aðeins að spara það þangað til allt er tilbúið í klessu, sem verður vonandi eftir tæpt ár. Þögli mín sem sagt snýst um það að ég vil ekki segja endann á brandaranum áður en brandarinn er fullsaminn, fattiði?!

ÁLABORG:

En þess utan þá gekk sem sagt vel, og þetta virkaði allt eins og það átti að virka. Ef það er eitthvað sem ég kem líklega til með að breyta þá er það hvernig ég skipti fiðluröddunum (stundum eru engar tvær fiðlur með það sama, allir með sér dót). Ég er búin að vera með divisi by desks en ég hugsa að ég skipti yfir í divisi at desk, huxa að það sándi betur (hitt sándar samt bara fínt).

ÞESSA DAGANA...:

...er ég að:

Ganga frá lausum endum og praktískum hlutum. Á einum tímapunkti leit þetta ekkert of vel út þar sem á pappír leit ég út fyrir að hafa varla gert rssgt allan veturinn, og þ.a.l. með lúsfáar einingar þrátt fyrir að hafa unnið eins og hross! Svo kom í ljós að það hefur eitthvað misfarist á milli deilda og kerfa og persóna, sem gerði það að verkum að það gleymdist að láta okkur mastersnema á fyrsta ári taka munnleg próf í tónsmíðum og orkestrasjón (!!!). Þetta þýðir að það vantar allar einingar fyrir þessi fög, sem er eiginlega næstum því allur pakkinn hjá mér! Ekki gott upp á að fá námslánin sín! Ég hafði samband við kennarana mína þegar ég var komin yfir mesta sjokkið, og þeir voru eiginlega í stærra sjokki en ég. Allt fór á fleygiferð og við mastersnemar förum í prófin í næstu viku, og ég gæti varla verið betur undirbúin nú þegar, er með endalausar skissur, nótur, pælingar, hljóðupptökur og ég veit ekki hvað. En kennurum mínum, skriffinnunum og skólanum til varnaðar segi ég að þetta er fyrsta árið sem BA og master er sitt hvor pakkinn, hingað til hefur skólinn litið á námið sem samfelldan 5 ára pakka. Þetta er sem sagt í fyrsta skipti sem þeir eru með þetta system á þessu, kannski ekkert skrýtið að eitthvað klúðrist svona í fyrsta skipti. Ég er viss um að þeir muna þetta næsta ár.

Grúska á bókasafninu. Ég er að skoða nótur og músík sem ég gæti lært eitthvað sniðugt af sem gæti nýst mér í stykkinu mínu ógurlega. Besti parturinn er að maður getur hamstrað nóturnar sem maður vill liggja í í sumar og þarf ekki að skila aftur fyrr en í september. Og ekki er nú leiðinlegt að fyrir utan bókasafnið er hrúga af nótum sem safnið er að grisja í burtu og maður má hirða. Ljúft!

Huxa! Ég hugsa fram og tilbaka um tilgang þess að vera í þessu námi, eða tilgang þess að semja tónlist yfir höfuð í heim sem er troðfullur af góðri tónlist. Held að efnahagslífið valdi öllu þessu huxi mínu; í öllu þessu verðbólgutali þá kemst maður ekki hjá því að virkilega velta fyrir sér tilgangi þess að vera að safna námslánum í nafni tónlistar. En - þá er eins gott að reyna að skrifa nógu andsk. magnaða tónlist til að það sé réttlætanlegt, ikke! Að minnsta kosti að leggja sig alla fram...

En þetta er nú ekkert alvarlegt, bara ofsalega hollar og góðar pælingar fyrir alla þá sem vinna við sköpun, held ég. Eða kannski er líka gott að hugsa aldrei neitt svona heldur bara æla út úr sér músík, sérstaklega ef músíkin sem ælist út er góð. Pæling...

...en núna eru ljósaskiptin búin og orðið bara dimmt. Ég ætla að fá mér kornflex og fara svo að lúra. Á morgun held ég áfram að grúska á bókasafninu, hollt, gott og gaman að vera bókaormur...

Hillary heldur við Obama

2008-06-10T06:26:00.000-07:00

HILLARY HELDUR VIÐ OBAMA:

Færeyingar eru fyrstir með fréttirnar, sjá hér. Skemmtilegt tungumál.

SINFÓNÍAN:

Nánari fréttir af því seinna, er ekki alveg farin að hugsa um þetta almennilega aftur.

AÐRAR FRÉTTIR:

...koma líka seinna. Þessa dagana er ég að ganga frá ýmsum lausum endum. Skrýtið að þegar ég ætla að ganga frá einum lausum enda, þá birtist alltaf annar laus endi. Mér finnst ég vera með skrifborð fullt af alls konar skrýtnum spottum og endum í ýmsum litum. En ég er svo sem ekkert að kvarta, þetta er aðallega bara tilfinning sem ég perfeksjónistinn hefur þessa dagana.

Alla vega...blogga næst þegar ég er í almennilegu stuði.

Sinfonían mín í kvøld!

2008-06-04T04:59:00.000-07:00

Í kvøld verdur smá sinfóníustykki eftir mig frumflutt í Álaborg í Danmørku, sjá hér! Segi nánar frá thessu thegar ég er komin heim aftur í mína eigin tølvu.

Jibbí, spennóóóó...

Expeditionen 2008

2008-05-29T02:29:00.000-07:00

Þá er því lokið. Í ár var músíkspunahátíðin "Expeditionen" haldin í fyrsta sinn hér í Kaupmannahöfn. Planið er að gera þetta að árlegum viðburði, ekki síst af því þetta heppnaðist einstaklega vel og ofsalega gaman að vera með! Ég gæti skrifað heila ritgerð um hvað þetta var mikið fjör og innspírerandi og líflegt, en í stað þess að þreyta mig og aðra á því þá koma hér nokkrir skemmtilegir punktar:

Ég er búin að fatta af hverju ég er búin að vera svona orkulaus og þreytt. Ég er búin að spila of lítið í vetur (og jú, kannski vinna of mikið og stressa mig of mikið)! Spila meira af ofurskemmtilegu dóti eins og þessu og það virkar eins og risastór vítamínsprauta og afslöppun í senn!

Við vorum níu manns sem spiluðum á hátíðinni: Maria Laurette Friis, Kresten Osgood, Henrik Sundh, Anders Philipsen, Carl Bergstrøm Nielsen, Camilla Barratt-Due, Johanna Borchert, Elena Setién og ég.

Ég á mér tvær uppáhalds hljómsveitir í Danmörku. Þær heita Little Red Suitcase og TysTys. Skondin tilviljun að þrír fyrstnefndu spilararnir eru meðlimir í TysTys og Johanna og Elena mynda saman Little Red Suitcase, þannig að núna hef ég spilað frjálsan spuna með nokkrum af uppáhalds músíköntum mínum í Danmörku, alveg óvart. Gaman að því. Plús að núna langar mig ofsa mikið til að skoða hvað allir hinir eru að gera, því allt þetta fólk er ofsa forvitnilegt og spennó að mínu mati. Það verður sko gúglað grimmt næstu daga!

Nöfnin okkar voru dregin saman upp úr hatti til að ákvarða hverjir spiluðu saman. Allir viðstaddir spiluðu tvisvar yfir kvöldið, ýmist í dúóum eða tríóum. Svo var bara farið upp á svið, græjað sig, og byrjað í frjálsum spuna. Ótrúlegt hvað náðist að varíera mikið, og stundum var ég alveg bit yfir hvað fólk virtist geta lesið hugsanir hvors annars!

Trommarinn Kresten Osgood er ótrúlega skondinn gaur. Ég sat úti í sal og horfði á hann spila með grænum trommukjuðum með bleikum hausum, sem hljómuðu svolítið eins og pappír. Svo fattaði ég hvað hann var að gera! Hann var spila með tvær bleikar rósir sem trommukjuða! Hljómaði ofsalega vel og var mjög flott sjónrænt þar sem rósablöðin flugu um allt.

Camilla og Johanna spiluðu saman dúett undir lok tónleikanna í gær. Þær hófu leik sinn með fáránlegu, hálf skiljanlegu og hálf óskiljanlegu spjalli uppi á sviði á norsku, dönsku og þýsku. Smám saman varð þetta meira og meira eins og tónlist (var reyndar tónlist allan tímann, algjör snilld) og harmonnikkan og píanóið komu inn í og tóku yfir.

Síðasta atriðið var tríó skipað Anders Philipsen á píanó, Carl Bergstrøm Nielsen og mér. Það var rosa gaman að spila, og lengst af spilaði ég bara á snúrurnar mínar, pedalana og magnarann án þess að tengja gítarinn nokkurn tímann. Það er hægt að búa til fullt af hljóðum og krydda með smá leikrænum spuna að tengja pedala út og suður, aftengja þá, henda snúrum upp í loft og spila á rafsuð og bras. Svo má líka renna fyrir fisk út í sal með því að henda snúrunni sinni og draga hana aftur, svona eins og fluguveiðimenn myndu gera. Spilafélagar mínir bitu á agnið og "interöktuðu" með mér, og svo leiddumst við á aðrar tónrænni brautir. Svo enduðum við í smá djass-paródíu og blúsvitleysu og það er nú alltaf gaman. Falskur blús með extra sjúski.

Áhorfendur voru hvattir til að koma með pottaplöntur, og þeir sem gerðu það lentu í happdrætti. Í verðlaun voru fimm geisladiskar og kókoshneta.

Eftir tónleikana fórum við nokkur á krá og kjöftuðum saman fram á nótt, ofsa gaman! Dótið mitt vakti smá athygli á barnum, enda ók ég inn barnakerrunni með magnaranum og effektunum ofaní, og myntuplöntu þar að auki, sjá næsta punkt.:

Sumir áhorfendurnir skildu plönturnar sínar eftir að tónleikum loknum. Ég ættleiddi eina plöntuna, piparmyntublóm, og tók með mér heim. Ég ætla mér að fita hana og nota svo í te, múhahhaha. (Æ, nú fæ ég samviskubit. Ég vona bara að plöntum sé sama þó þær séu étnar og drukknar, annars er fátt sem hægt er að éta og drekka án samviskubits).

En nú held ég að ég reyni að leggja mig pínu pons, eða byrja á ritgerð. Humm...

Mánudagsrigning í Køben

2008-05-26T01:02:00.000-07:00

MÚMÍNFJÖR:

Ég nappaði þessu prófi á blogginu hennar Söndru, sem er einmitt núna stödd hér í Köben. Við ætlum að fá okkur trítl í rigningunni á eftir. Passar þetta ekki alveg?:


	Hvem er du i Mummidalen?
	Mitt resultat: Lille My Du er Lille My! Du elsker spenning og er veldig rampete. Du er også veldig direkte og sier ofte ting rett frem uten å tenke over hvem du kan såre.
	Ta denne quizen på Start.no

MJÁMM:

Annars er fátt lítið að frétta héðan. Eins og mig grunaði þá er (líklega) ekkert að mér nema stress, fór til læknis um daginn og er hraust sem fíll samkvæmt öllum mælingum (hann vill samt tékka betur á mér á föstudaginn). Ég held þetta sé nú líka allt að koma, finn litla sem enga hálsbólgu núna og hóstinn farinn. Spurning hvort ég er kannski bara með gróðurofnæmi, það er nú kannski bara málið. Plús að ég vann svo hrikalega mikið frá janúar og til loka apríl, kannski bara þreytt og orklaus síðan þá.

En já, veðrið er búið að vera algjört æði, en núna í dag er alvöru rigning og allir alvöru Danir í alvöru stígvélum og regnfötum. Þar sem ég er ekki alvöru Dani þá eru stígvélin mín í geymslunni í Eskihlíð og ég á enga regnkápu (þó ég hafi séð eina rosa flotta til sölu fyrir morð fjár í rosa flottri búð, en það er ekki á fjárlögum. Henson-vindjakkinn kemur nú líka sterkur inn).

Í gær fórum við Bjarni í ógurlega menningu. "Leikári" (segir maður það???) konunglega ballettsins var að ljúka og samkvæmt hefð var síðasta sýning ókeypis undir berum himni við Kastellet, sem er rétt hjá litlu hafmeyjunni. Sýnt var úr mörgum sýningum og ég sá m.a. tvennt sem ég er til í að sjá næsta vetur (dreg kannski gesti sem ramba hingað til mín með, hvur veit). En já, þetta var ágætis stemmning að sitja á teppi á grasinu og drekka te og saftevand, og svo róló á eftir.

FRAMUNDAN ER:

Spilerí annað kvöld og miðvikudagskvöldið (litirnir á þessu plakati eru ekki svona í alvörunni. Ég skil ekki af hverju þetta kemur svona furðulega út í blogger, það vantar rauðu litina o.fl.):

Verst að nú halda ýmsir að ég heiti Hálfdís. Gaman að því.

Dagrún frænka kemur á fimmtudaginn, jibbíííí. Hún verður m.a. dregin á Little Red Suitcase-tónleika þann 31.

Guðni helgargrís kemur til landsins 30. maí. Jibbííí tvööö.

Sinfóníuvinnustofa í Álaborg 2.-4. júní (dreg Dagrúnu líklega með eitthvað í það, eigum eftir að plana. Spurning með Guðna grís, hvort hann vill vera hjá Ásdísi frænku sinni eða slást í för? Púsli og plan).

Jamm og jæja. Það er best að smyrja nesti og fara svo með gítardótið upp í skóla með strætó. Til þess að það sé hægt þarf ég að pakka því í gömlu kerruna hans Bjarna, svona:

Fólk verður stundum skondið á svipinn þegar það sér að í kerrunni minni er ekki barn heldur magnari. Vona að það fái ekki sjokk núna því ég þarf að setja svartan plastpoka yfir allt heila klabbið út af rigningunni...

P.S. Bara til að gera ykkur græn af öfund: Arvo Pärt kom í heimsókn í skólann minn síðasta miðvikudag. Hann tók innilega í höndina á mér (og öllum hinum) og var ofsa vinalegur. Svo talaði hann, söng og spilaði á píanó, og vildi svo endilega að tekin væri mynd af okkur tónsmíðanemum, viðhengjum okkar og sjálfum sér. Fólk hafði á orði að hann hefði verið óvenju ræðinn og hress því að almennt togist varla úr honum orð í viðtölum við fjölmiðla t.d. Hann var voða persónulegur við okkur bara og skemmtilegur. Mér detta alveg nokkrir aðilar í hug sem hefðu viljað vera þarna á staðnum.

Schnappi

2008-05-19T03:27:00.000-07:00

Hér er doldið til að lífga upp á grámyglulegan mánudag! Varúð: Þetta lag festist mjög auðveldlega í hausnum á manni:

Schnappi

Annars er núna tvennt í stöðunni: 1) Gefast upp og leyfa letinni að ná völdum og gera það þá almennilega eða 2) berjast á móti henni og koma einhverju í verk. Sjáum til...

Klukk!

2008-05-17T02:53:00.000-07:00

Daníel Brandur klukkaði mig. Ég ætla að hafa sama háttinn á og hann, þ.e. að nenna ekki að þýða spurningarnar en svara á íslensku:

What if I could meet someone in the art world to chat with?
Vá, það eru ansi margir! En efst á óskalistanum er Dagný systir mín, listræn athafnakona og landslagsarkitekt. Ég væri svo til í að sitja með te og eitthvað gott að narta og blaðra við hana!

What if I could have one wish granted for the benefit of all mankind?
Matur, skjól og öryggi handa öllum.

What if I could travel anywhere in the world?
Hmmm...erfitt....akkúrat núna langar mig doldið til Íslands :). En annars gæti ég líka nefnt Asíu og Færeyjar.

What if I could live in a period other than the present, for 24 hours?
Ég væri til í að fara tæp hundrað ár aftur í tíma, það var svo margt forvitnilegt að gerast í tónlist þá :). Og hönnun og listum, mmmm... Spurning hvort það væri þá ekki praktískt að breytast í nokkuð efnaðan kall í leiðinni, örugglega meira stuð á þeim tíma en að vera kelling með takmarkað bödget, veit ekki...

What if I could become an animal for 24 hours?
Ég segi eins og Daníel, ég náttúrulega ER dýr. En ef ég mætti vera annað dýr þá væri ég til í að vera köttur; geta legið í leti og gert það sem mér sýnist og verið fúll á móti ef mér sýnist svo, en samt verið krúttleg og allir vilja knúsa mig. Örugglega líka stuð að læðast á milli garða fólks og forvitnast.

What if I could bring someone back to life for 24 hours?
Humm! Það væri kannski leiðinlegt að þurfa svo að kveðja aftur eftir sólarhringinn... Kannski bara betra að sleppa því þá ;).

Ég klukka Maríu Lundastelpu, Ásu Geimveiru og tónskáldin Þóru Marteins og Hildigunni.

Smotterí

2008-05-15T03:17:00.000-07:00

KANNSKI DOLDIÐ VÉLRÆNT:

Palli rakst á þessa frétt um óvenjulegan hljómsveitarstórnanda.

ITUNES:

Veit einhvern hvernig iTunes-store virkar? Sko, ég veit hvernig hún virkar ef maður er að kaupa tónlist, en hvernig ef maður er að selja tónlist? Virka þetta eins og STEF-gjöld (sem þýðir þá að íslensk músík fær ekki krónu, ekki satt) eða er þetta eins og geisladiskasala? Fá tónlistarmennirnir einhvern pening ef það selst lítið, eða er bara greitt út ef það selst yfir ákveðna upphæð? Hver rukkar, útgefandinn??

Alla vega...ég get kannski reynt að gúgla þetta, en mér datt bara í hug að einhver sem flækist hingað inn vissi þetta.

BLETTIR:

...og fyrst ég er að spyrja spurninga sem ég gæti sjálfsagt bara gúglað: Hvernig nær maður blettum úr hvítum borðdúki (eða á maður að segja "hvítum borðdúk"?).

Ég er eitt spurningamerki í dag.

Löng afturábak færsla

2008-05-12T10:55:00.000-07:00

Þessi færsla er í afturábak tímaröð.

ÞRIGGJA ÁRA Í DAG:

Afmælisbarn dagsins er Bjarni Pálsson! Afmælisdagurinn hófst með smá eirðarleysi og ýldu í afmælisbarninu. Við opnuðum pakka með ömmu og afa á skæp og sungum afmælissöng. Bjarni fékk þessa fínu bók frá ömmu og afa og pening fyrir fötum. Svo opnuðum við pakka frá Maríu (ég vöðlaði honum inn í dagblað, María), og það var rosa skemmtilegt púsluspil með Einari Áskeli, sem er aðalhetjan þessa dagana.

En svo komst Bjarni fyrst almennilega í hefðbundinn afmælisgír þegar við vísitölufjölskyldan héldum af stað í Valby park til að undirbúa veislu. Þá fannst Bjarna þetta vera aðeins meira alvöru, enda hefur hann séð margoft þáttinn um afmælisveislu Einars Áskels á DVD og veit alveg hvernig afmælisveislur eiga að vera. Kannski er hann ekki eins vitlaus og maður heldur, drengurinn, enda orðinn þriggja ára og öflugur eftir því!

Hér má sjá Bjarna við afmælisborðið í Valby park að leika sér að rútubíl sem hann fékk frá Kjartani Helga, sem er frændi Guðna stórabróður. Takið eftir súkkulaðikökunni um allt andlitið, og dönsku fánunum á borðdúknum:

Bjarni fékk margar fleiri góðar gjafir frá Kjartani Helga og fólkinu í húsinu okkar. Svo á hann von á sendingu frá Ingu ömmu á Stokkseyri, það verður spennó að skoða það, og svo kemur pakki með Dagrúnu frænku eftir tvær vikur. Við náðum ekki að fara í búð að kaupa gjöf frá okkur foreldrunum, því verður reddað á morgun. Fullt af pökkum hægri vinstri.

SUMAR OG SÓL:

Annars erum við búin að njóta lífsins síðan ég kom frá Umeå. María kom í fyrradag, át sushi á svölunum með okkur eftir alllangt hangs í lest sem sat föst í Malmö. Í gærmorgun tók smá tíma fyrir mig að drattast á lappir (er enn að reyna að hrista af mér einhvers konar pest, held hún sé að lagast núna) en þegar það loksins tókst tókum við María til við bakstur. Annað eins hefur varla áður sést; við hristum fram úr erminni þrjár sortir, og þegar leikar stóðu hæst sletti ég deigi á Maríu, svo mikill var ákafinn í pönnsugerðinni.

Eftir bakstur fórum við kellur og Bjarni á Dyrehavsbakkann, Dyrehaven og á Bellevue-ströndina. Rosa gaman allt saman, og skemmtilega öðruvísi að fara á strönd. Ég get ekki sagt að ég hafi mikla reynslu af strandlífi, en greinilegt er að allsberu eldri borgararnir voru mjög vanir og lítið feimnir (og mjög heimilislegir og eðlilegir, greinilega ekkert athugavert við það að vera allsber. Gaman að því).

DAGBÓK FRÁ UMEÅ:

ÞRIÐJUDAGUR 6. MAÍ

KL. 16:24:

"...4-horn group became standardized, until Brahms, Dvorak, Tchaikovsky and of course Wagner - to cite only a few key romantic composers - all used four horns as a matter of course in their large scale symphonic works". (Anatomy of the Orchestra e. Norman Del Mar, bls. 228).

Lesi lesi. Ég lít upp úr bókinni og horfi út um gluggann á allar flugvélarnar sem eru ýmist nýkomnar eða í þann veginn að taka á loft. Það er rólegt á Kastrup í dag, enda ofurhversdagslegur þriðjudagur. Ég er strax farin að sakna Palla og Bjarna litla. Mér finnst alltaf jafn erfitt að fara í ferðalög frá Bjarna mínum, sérstaklega ef ég er ein á ferð. Fyrsta kvöldið er alltaf erfiðast með sárum söknuði eftir litla strumpastráknum mínum.

En Meredith Monk, maður! Ég er að fara að sjá og heyra Meredith Monk! Spá í því. Og María vinkona segir að Umeå sé á sömu breiddargráðu og Reykjavík (eða mig minnir að hún hafi sagt það), þannig að ég er að fara lengst út í buska. Það verður forvitnilegt, ætli það sé íslenskt veður þarna? (Nú finn ég smá heimþrá til Íslands og fæ mynd af íslenskum fjöllum í kollinn).

Ég er í skapi til að lesa, þegja, hugsa og vera í mínum eigin heimi. Ég vona að ég sitji ein í vélinni, eða ef ég sit hjá einhverjum að viðkomandi sé líka í skapi til að þegja og vera í sínum eigin heimi.

KL. 16:31:

Úff, mig langar í te! En ég er nýbúin að fá pizzu og safa. Kannski ég reyni að halda teþörfinni í skefjum þangað til ég kem í vélina, því þá langar mig pottþétt í te líka, hvort sem ég fæ mér te núna eða ekki.

...og svo er mynd af Bjarna litla krúttistrák á desktoppnum að hlaupa. Æææ...litli dúlli rúllinn minn. Sakn...

..............."Sometimes the employment of two pairs of horns allowed for interesting experimentation..."................

KL. 16:53:

Grislingur fyrir aftan mig er á garginu í rosa athyglisþörf og kasti. Ætli það sé eins með mig og reykingamennina: Óbeinar reykingar fara extra mikið í taugarnar á fólki sem hefur einhverntímann reykt og hætt. Og hér er ég á barnlausu ferðalagi án Bjarnans míns og mér bara tekst ekki að blokkera gargið (ekkert mál þegar Bjarni er með í för). Svo svona er það að vera áheyrandi að gargiköstum Bjarna. Held það sé nú ekki svona slæmt...er það?

"Both 5-horn (GAAAARRRGGGG) and 7-horn groups (GAAAAARRRRRRRGGGG)do exist but ar so rare that..."(GAARRRRRRGGGGG)......(o.s.frv.)

KL. 00:38 Í UMEÅ:

Djös snilld! Ég er eini gesturinn í risastóru herbergi með 4 kojum! Þetta er nánast eins og að hafa heila íbúð fyrir sig eina. Þannig að úllahópurinn í flugrútunni mun ekki deila með mér herbergi. Ahh, kósý (þó úllar séu hinir skemmtilegustu, þá jafnast ekkert á við að vera prinsessa með 4 kojur til að velja um).

Þetta kallar á hátíðarhöld með bönunum og snakki. Og svo að lúlla, því á morgun ætla ég að skoða mig um og fara á tónleika!

MIÐVIKUDAGUR 7. MAÍ:

KL. 13:51:

Áðan fór ég að skoða bæinn, mjöööög lauslega, og sá nú ekki beint margt spennandi svona í fljótu bragði, en mér sýndist út undan mér að hægt sé að finna áhugaverða staði ef maður fær sér góðan labbitúr og leitar aðeins. Flest sem er hér í boði fyrir ferðamenn virðist vera stílað inn á annað hvort snjó og vetraríþróttir, eða tímabilið frá júní til eitthvað...man ekki. Alla vega ekki núna. En jú, hér eru einhver söfn og svona. Ef mér leiðist þá eru nokkur söfn að skoða, þ.á.m. holdsveikisafn (lýsingarnar á því eru reyndar frekar ó-kósý). (innsk: Komst síðar að því að hér er ágætis grasblettur til pikknikks, og það má finna falleg hús og áin er doldið skemmtó. Og ég fann skemmtó kaffihús...)

En hér er hins vegar nóg að gerast á MADE-festivalinu, og danshátíðinni. Það eru sem sagt tvær hátíðir í gangi í einu þessa dagana. Mér sýnist samt danshátíðin aðallega snúast um umræður og workshop fyrir dansara, en það er þó eitt og annað sem gaman væri að skoða. Og auðvitað workshoppið með Meredith Monk sem ég ætla á á morgun. En MADE-hátíðin er með hinu og þessu, eins og tónleikunum hennar Monk í kvöld, og það fer ég nú pottþétt að sjá!

Svo er eitthvað sem heitir "Klagökoren" (gæti útlagst sem "Nöldurkórinn") með tónleika á eftir. Ef ég skil þetta rétt þá er þetta 40 manns sem nöldra allir í kór um 120 atriði sem fer í taugarnar á þeim! Spennó!!! Eitthvað virðist þetta vera kompónerað (afsakið slettu, "samið" hljómar skringilega í þessu samhengi) því í dagskránni er nefnt nafnið Mats Larson Gothe sem er hústónskálds Norrlandsóperunnar (sem er einmitt hér í Umeå).

Áðan eldaði ég mér mexíkanamat sem ætti að duga í nokkrar hádegis- og kvöldmáltíðir. (innsk: Kláraði mexíkanamatinn kvöldið áður en ég flaug heim). Planið er að halda spreði í lágmarki ef mögulegt er og njóta frekar þess að fara að sjá viðburðina, og svo bara slaka á. Í gær borgaði ég of fjár fyrir þráðlaust net á Arlandaflugvelli sem datt út á 10 sekúndna fresti þegar verst lét! Ég er ekki alveg á því að tíma að eyða peningum í net sem virkar eiginlega ekki, útlönd ættu að taka sér Ísland til fyrirmyndar að bjóða upp á frítt net á ýmsum stöðum (skamm Leifsstöð fyrir að vera farin að rukka fyrir áður ókeypis net!). En núna ætla ég að leggjast í kojs og glápa á Ugly Betty (sem er ennþá föst í gömlu tölvunni minni sem er einmitt með í för) og borða jarðarber og prinspólóígildi og drekka te sem ég fann inni í eldhúsi sem ekki bara bragðast eins og-, heldur ER krydd í poka: Indian chai með kanil, engifer og fleira slíku. (Þarf að muna að kaupa alvöru te á eftir).

KL. 20:15:

Já. Þetta var þess virði að ferðast hingað út í buska fyrir! Monk-tónleikarnir stóðu fullkomlega undir væntingum og gott betur. Ótrúlega magnað. Veit ekki hvað meira hægt er að segja. Eftir tónleikana dreif ég mig beinustu leið á farfuglaheimilið að hlusta á meiri Meredith Monk-músík! Allt annað væri antíklæmax. Í rauninni veit ég ekki hvað ég á að gera við restina af kvöldinu, því allt, sama hvað það er, virkar antíklæmax eftir þetta.

En nöldurkórinn...ég sá hann eiginlega ekki fyrir þvögu, og ég hugsa að það hjálpi upplifuninni ef maður skilur textann. Það eina sem ég skildi var að kórinn var að kvarta yfir einhverju sem hann hefur ofnæmi fyrir. Ég kannast við svoleiðis.

Hlakka til að fara á námskeiðið á morgun! Ó boj!

KL. 21:58:

Vá, hvað maður hefur gott af því að fara svona í burtu. Maður veit hvað maður á þegar maður hefur það ekki. Núna væri ég virkilega til í að vera með köllunum mínum í stað þess að vera alein lengst úti í buska. Að horfa á Einar Áskel með Bjarna hljómar til dæmis agalega vel. En ég er að spá í að fara bara að lúlla, ekki alveg með orku í að bralla neitt...

FIMMTUDAGUR 8. MAÍ:

KL. 12:17:

"$"&%$/%#/ internet til sölu! Ég sit á kaffihúsi í Umeå og ég köku og drekk te. Í glugganum stendur skrifað stórum stöfum "gratis internet". Í praxís er það ekki ókeypis af því þeir eru ekki búnir að koma því í gagnið og akkúrat núna kostar það. Kostar og virkar ekki, ég er búin að prófa. Djísöss!!! AF þessu má læra að kaupa aldrei köku fyrr en maður er búinn að ganga úr skugga um að netið sé ókeypis og það virki! Andsk. hafi það!

Svo er síminn minn frelsislaus og hvernig get ég bætt á frelsið. Jú, með því að fara inn á netið! Jargs!

En að öllu ergelsi slepptu þá er ég að fara á námskeiðið með Meredith Monk eftir rúman hálftíma, og það er nú stuð. Hef eiginlega ekki tíma til að brasa á netinu núna, því það fór svo mikill tími í að vesenast í þessu. Arg garg!!!!...

REST:

Námskeiðið var jafn æðislegt og tónleikarnir! Mikið er Meredith Monk indæl kona! Og ég lærði nokkur trix sem nýtast bæði í tónlist og lífinu almennt! Snilld!

Svo kynntist ég nokkrum dönsurum og kóreógraferum og menningarstjórnendum og what not, gaman að tengjast fólki úr ýmsum listgreinum. Meðal annars flæktist ég um með tveimur skemmtilegum Finnum, og fór með þeim á rosa flotta sýningu með gagnvirkri vídeólist með dansi og tónlist. Verkið heitir Rintrah Roars og er eftir Åsa Unander-Scharin við texta eftir William Blake, sjá hér. Akkúrat eitthvað eins og ég væri til í að flækja mér í, þ.e. að blanda saman ýmsum listgreinum og miðlum. Ekki það að ég er að blanda ýmsum tónlistarstefnum, mann langar alltaf í meira og meira. Og það er nú bara jákvætt í listum, er það ekki?

Þegar ég fór svo að mjaka mér aftur til Köben með viðkomu í Uppsala var ég orðin aaaansi leið á að ferðast. Leið á hálsbólgunni, saknaði kallanna minna og heimilis míns, virks internets og bara...alls sem ég er vön að hafa og tek sem svo sjálfsögðum hlut. Það var ofsa gott að koma heim í gær, hitta kallana mína, og hitta svo Maríu vinkonu seinnipartinn líka.

Og svo hefst hefðbundið líf á morgun (innsk. á morgun morgun!) með leikskóla og músíkvinnu. Það verður gott líka.

...og svo höldum við áfram...

2008-05-06T00:38:00.000-07:00

Enn hósta ég (þó minna með hverjum degi sem líður) en það er ekki til setunnar boðið þó törnin sé búin!

UMEÅ:

Í dag mun ég fljúga til Umeå í Svíþjóð til að vera á og taka þátt í danshátíð. Danshátíð! Ég! Og ég get ekki einu sinni setið með lappirnar beinar fram fyrir mig á gólfi, svo stirð er ég. En það sem ég er nánar tiltekið að fara að gera er að taka þátt í námskeiði undir stjórn Meredith Monk, en hún hefur verið frekar stór áhrifavaldur á mig tónlistarlega síðustu 12 ár eða svo! Það má því segja að þetta sé áralangur draumur að ekki bara sjá hana á tónleikum heldur sjá hana vinna og sitja námskeið með henni. Ja hérna hér! Plús að ég mun væntanlega læra ýmislegt um hvernig maður býr til músík fyrir dansara og slíkt, og bara...já...læri örugglega heilmikið! Og þess utan ætla ég að skoða Umeå og fara á ýmsar sýningar, því þetta er heil hátíð af dansi og skemmtilegheitum, sjá hér.

En ekki byrjar það vel! Í morgun kíkti ég á útprentunina af flugmiðanum mínum frá Köben til Stokkhólms í dag, og komst að því að ég var bókuð frá Stokkhólmi til Köben! Úpsídeisí!!!! Klukkan hálf níu í morgun hefði ég samkvæmt flugmiðanum mínum átt að sitja fyrir framan eitthvað hlið á Arlandaflugvelli í Stokkhólmi á leið til Kaupmannahafnar, en í raun og veru sat ég á nærfötunum inni í herberginu hans Bjarna í Kaupmannahöfn. Ekki gott mál!

Þannig að; ég hringdi í Sterling og einhver rosa indæl kona breytti miðanum mínum þannig að ég byrja í Köben seinnipartinn í dag og enda í Köben aftur kl. 10:00 á laugardaginn. Miklu betra!

PENINGAR, MÖÖÖÖH:

En...þetta kostaði auðvitað smá aukapening, þar sem þetta var algjörlega minn aulagangur. (Skil þetta samt varla, ég var algjörlega með flugtímana í hausnum og alles. Kennir manni að dobbúltékka allar upplýsingar áður en maður ýtir á "OK" þegar maður er að panta miða!).

Æjá...peningar. Þeir hafa sérstakt lag á að eyða sjálfum sér þessa dagana, og ég er sko ekki að ýkja! Ég lagði inn 6.000 dkr. inn á danska reikninginn minn í gær, og vitið þið hvað það er í íslenskum?! 95.000 kall!!! NÍUTÍUOGFIMMÞÚSUND!!! Hrikalegt! Að borga 1.000 kall danskar fyrir aulagang með flugmiða var sko EKKI efst á óskalistanum í dag! Úff!

JÁKVÆÐNI:

Það er nú samt spurning að gefast ekki upp, þó það sé hrikalega auðvelt ("æ, ég fæ mér bara að borða á kaffihúsi í staðinn fyrir að borða heima, peningarnir eyða sér sjálfir hvort eð er"). Maður verður alla vega að reyna að spara og halda óþarfa spreði í lágmarki. Í þeim anda þá mun ég gista í ódýrustu gistingunni í Umeå, nánar tiltekið á farfuglaheimili í herbergi með skrilljón kojum. (Og svo skilst mér að ég geti sótt um ferðastyrk frá skólanum. Býst nú samt ekki við að þeir vilji borga fyrir leiðréttingu á flugmiða, en það munar samt heilmikið um það ef þeir vilja styrkja mig eitthvað smá). Og sparaði ég heilmikið í gær þegar ég keypti EKKI nýjar buxur! Og eftir smá stund ætla ég með flöskur út í búð að kaupa í matinn, í lágvöruverðsbúðina nánar tiltekið.

DANSAÐU EFTIR NÓTUM MÍNUM:

Palli fann snilldarklausu í íslensku orðabókinni:

að dansa (syngja) eftir nótum einhvers: að hlýða einhverjum skilyrðislaust, vera þægur þjónn einhvers.

Hihihi, þannig að klassískir hljóðfæraleikarar eru þægir þjónar og hlýða skilyrðislaust! Það væri nú bara snilld! Hihihi...

Held það sé samt ekki þannig í praxís, alla vega er búið að vara mig við því að einkunnarorð (sumra) hljóðfæraleikara í sinfóníuhljómsveit sé "Kill the composer", sem þýðir að þeir reyna allt sem þeir geta til að afhjúpa vanþekkingu tónskáldsins, til dæmis með því að mótmæla því sem maður er að reyna að fá þá til að spila og segja: "Þetta er ekki hægt að spila á mitt hljóðfæri" og ýmislegt í þá áttina. Tónsmíðakennararnir eru búnir að undirbúa mig undir þetta þegar við förum að vinna með Sinfóníuhljómsveit Álaborgar ("...svo þegar básúnuleikararnir fara að segja að þetta sé ekki hægt þá skaltu segja þeim að nota F-ventilinn, og svo þegar tréblásararnir fara að snúa út úr þessum rithætti, þá skaltu segja að þetta tákni fraseringu..."). Ekki það að ég er búin að lesa mér til í klessu og veit að allt sem ég skrifa er hægt, en það er ágætt að fá smá móralskan stuðning frá kennurunum.

Hlýða skilyrðislaust, það á eftir að koma í ljós...

Vor í Lundi

2008-05-04T13:44:00.000-07:00

DÆMIGERÐ EN ÓVENJU DRAMATÍSK SENA Á DÆMIGERÐUM SKILADEGI:

Leikskólinn er lokaður (starfsdagur, eða guðmávitahvaðdagur, í öllu falli er greinilega lokað af því að fimmtudagur var uppstigningardagur og leikskólakennararnir vilja langa helgi). Kellan er lasin með hálsbólgu, hósta og slen. Eldhúsborðið svignar af nótum sem bíða þess að vera límdar saman og sendar út í buska. Makinn er í akkorði í sinni vinnu og keppist við að klára fyrir dagslok. Kellan ætlaði að vera búin að klára en hafði ekki gert ráð fyrir lokun leikskólans og hálsbólgupestinni inn í annars mjög gott skipulag.

Makinn tekur sér hlé frá vinnu til að viðra afkvæmið á meðan ofurkonuvonnabíið límir nótur. Kellan andar djúpt, tekur á sig rögg og notar færibandatækni við að líma saman horn, fagott, enskt horn, óbó og slagverk svo eitthvað sé nefnt. Klukkutíma síðar koma makinn og afkvæmið inn. Afkvæmið með sand í bleyunni eftir vel heppnaða sandkassaferð.

Og þá er komið að leiðréttingum. Makinn snýr sér aftur að vinnu en vonnabíið gerir desperat leit að tippexi. Áttar sig á því að tippexið er í gítartöskunni sem er í tónsmíðastofunni sem er í skólanum sem er lengst niðri í bæ. Jarg. Afkvæmið virkar þreytt, enda vaknaði það kl. 6. Foreldrarnir eru líka þreyttir, en það er nú bara standard þegar maður er fullorðinn ekki satt.

Ef maður ætlar að vera ofurkona þá þarf að skipuleggja sig: 1) pakka afkvæminu niður í kerru 2) fara niður í bæ 3) ná í tippexið 4) fara með lest og labba á fjölskylduvænt kaffihús svo afkvæmið geti leikið sér og ofurkonuvonnabíið setið á næsta borði, étið parmaskinku og unnið 5) henda í póst!

Planið gengur ágætlega og gott betur því akvæmið sofnar í kerrunni í strætó. Planinu er breytt með það sama; hraðbanki, tippex og annað kaffihús (þar sem er praktískt að vera með sofandi en ekki endilega vakandi barn) sem er nær og líka nær pósthúsinu, sem lokar innan skamms.

Endalaus röð í hraðbankann. Tippexi reddað. Smá labb á kaffihúsið. Þegar þangað er komið mætir kellunni örtröð af fólki. Afkvæmið gerir sig líklegt til að vakna, talar upp úr svefni, en sofnar almennilega aftur. Ofurkellan andar léttara.

Þetta er dæmigerð nútmímaforeldris-sena: Í pokanum eru 49 litlar nótnabækur sem bíða eftir að vera lesnar yfir, tippexaðar og leiðréttar. Sofandi barn í kerru. Lasin kella sem aldrei hefur tíma til að klára pestarnar sínar almennilega og er þar af leiðandi með þær extra lengi.

Kellan plantar kerrunni á kaffihúsið. Endalaus röð að panta mat. Kellan kemur til baka með matinn, andar létt yfir að barnið sé enn sofandi. Setur lífrænt ræktaða ávaxtasafann á borðið, fína veskið sitt líka, dregur upp nótnabunkann. Færir til veskið. Flaskan dettur í gólfið og brotnar, lífrænn safi skvettist yfir allt. Barnið vaknar. 49 nótnabækur tilbúnar til yfirferðar á borðinu eins of fífl. Kaffihúsagestir allt um kring glápa, og guð má vita hvað þeir eru að hugsa (risastór nótnabunki, tippex, barn, brotin flaska með safa, stressuð hóstandi kella).

Á methraða eru bækurnar 49 lesnar yfir á meðan barnið er að jafna sig eftir blundinn. Eftir tréblásarana fer kellan og sækir dót. Tippexar, tínir tússliti og kubba upp úr gólfinu, skrifar inn leiðréttingar, huggar úrillt barnið, hristir af sér ýmis augnarráð frá næstu borðum, rýnir í leit að villum, eltir barnið sem langar að vesenast, reynir að skemmta því aðeins meira og leiðrétta um leið. Loksins er það búið, nótunum er pakkað inn og settar í póst. Afkvæmið fær ís að launum fyrir tillitssemina og kellan kaupir sér blóm. Nú er hægt að setja tónskáldið á hilluna fram að næsta leikskóladegi og einbeita sér að því að vera foreldri í bili.

AMMÓS:

Það er rosa afmælis-"season" núna: Stína vinkona á afmæli í dag, Palli átti afmæli í gær, Aðalheiður vinkona 18. apríl, og María 29. apríl, til hammó allir með það! (Og svo verður Bjarni litli þriggja ára 12. maí, og pabbi á afmæli 15.! Allt að gerast!).

Hér er mynd frá afmælisdegi Palla í gær. Hér situr hann (og Bjarni sofandi í kerrunni) fyrir utan uppáhalds (bóka-)kaffihús okkar í Köben (einmitt hér var safaflöskunótnadramað deginum áður, þ.e. í fyrradag). Takið eftir svörtu peysunni hans Palla, hún er splunkuný og verðmiðinn ennþá á henni:

LÉTT Í LUNDI:

Í dag fórum við Bjarni strumpur að heimsækja Maríu í Lundi. Þar sem ég er rosa þreytt eftir allt fjörið og útivistina í dag, þá nenni ég ekki að skrifa mikið meir en komið er en set hér nokkrar myndir, og eitt vídeó sem verður eytt út eftir...öö...hvað eigum við að segja...á þriðjudag.

Annars er það af mér að frétta að ég er eins of fyrr sagði (hálf-?)lasin og hósta ég eins og ég eigi lífið að leysa, ekki síst á nóttunni, þannig að já ég ætla að panta hjá lækni á morgun ;). Býst nú ekki við miklu, kannski er þetta bara gróðurofnæmi í öðru veldi í góða veðrinu hérna.

En alla vega, hér koma nokkrar myndir:

Bjarni og múttan á róló í dag. Múttan skemmtilega sjoppó á svipinn, en Bjarni sætur:

María og Bjarni róla:

Bjarni hleypur í kring um gosbrunn:

En nú segi ég þetta gott því ég ætla að fara að sofa (=hósta og gnísta tönnum, já, ég ætla að láta tékka á mér (og láta segja við mig að fara heim að taka magnyl...en jú, ég skal láta tékka á mér eins og sumir eru búnir að segja mér margoft að gera)). Á morgun ætla ég að leyfa mér að liggja og hvíla mig og vera lufsa á meðan Bjarni er á leikskólanum. Kannski mér takist að klára pestina, hver veit.

Gleðilegt sumar!

2008-04-24T02:12:00.000-07:00

TIL HAMMÓ:

Guðni helgargrís var að eignast annað hálfsystkini. Það var ekki ég að þessu sinni, heldur mamma hans Bergdís sem átti stelpu 14. apríl sl. Til hamingju, Guðni og fjölskylda! Knúúúús!

HÁR:

"Þú lærir ekki af reynslunni", sagði María lundastelpa við mig þegar ég sagði henni frá því um daginn að ég ætlaði aftur að vera hármódel til að fá ókeypis klippingu. Fyrra skiptið rataði einmitt inn á bloggið líka, sjá hér.

En - núna var þetta jafn frábær reynsla og hin var...ööö...furðuleg (endaði m.a. með því að ég lét bæði lita hárið mitt aftur og snoða mig). Í stuttu máli þá var þetta eins og að fara í dekur og dúllerísklippingu, nema hvað ég borgaði ekki krónu. Fyrst fékk ég hárþvott og tilheyrandi hausnudd, svo rosa gott te, svo tískublöð að lesa. Og í einu þessu tískublaðana sá ég þessa líka fínu framkvæmanlegu klippingu, og voilá, ég bara fékk hana!

MYNDASYRPA:

Við fórum til Þýskalands að heimsækja pabba hans Palla síðustu helgi, en hann og Alexis kærasta hans búa í litlum bæ sem heitir Kirchenarnbach og er ekki langt frá Heidelberg,Trier og landamærum Þýskalands og Frakklands. Þetta var ofsa gaman og mikið ævintýri, og rosalega vel tekið á móti okkur öllum! Í þessum leiðangri keyptist ný fartölva, sem þýðir að núna er ég að vinna partana að sinfóníunni minni á þreföldum hraða miðað við á gömlu tölvunni! (Ég held það séu komin tvö ár síðan gamla tölvan var (fyrst) úrskurðuð ónýt (var aftur úrskurðuð ónýt síðasta sumar) þannig að ég mátti nú alveg kaupa nýja var það ekki? Kominn tími á það...er það ekki?).

M.a. flæktumst við um bandaríska herstöð (þannig að núna hef ég komið til Bandaríkjanna), borðuðum rosa góðan kalkún sem Sif systir hans Palla eldaði, sátum í sólinni í garðinum við húsið og fórum í alvöru þýska afmælisveislu hjá nágrönnum Hermanns og Alexis. Bjarna litla fannst dvölin í Þýskalandi algjört æði, og hann suðaði alla leiðina heim til Köben að fara aftur í Hemma afa hús.

SUMARDAGURINN FYRSTI:

Ég er í algjöru akkorði til fyrsta maí, en þá á ég að skila öllum pörtunum fyrir sinfóníuna mína. Ég var búin að áætla að ég ætti að gera 67 parta, en í rauninni verða það bara 49 af því mér skilst að hvert "desk" í strengjasveitinni þurfi bara eitt nótnahefti. Það munar heilmikið um það! Þrátt fyrir akkorðið þá reynir maður að njóta sumarblíðunnar, því í dag er jú sumardagurinn fyrsti ekki satt! Já, það má segja að fyrir okkur Palla sé þetta sumardagurinn fyrsti "í alvörunni" því við settumst út á gras í pikknikk með hádegismatinn okkar í góða veðrinu:

Sem sagt; bloggað á gömlu tölvunni og unnið á nýju tölvunni. Draumur í dós!

Skondinn hversdagsleiki...

2008-04-14T13:05:00.000-07:00

BJARNI FER AÐ SOFA:

Það er farið að dimma svo seint að öll fína svefnrútínan hans Bjarna fer í vitleysu. Síðasta sumar notuðumst við við risastórt sængurver fyrir gluggana til að búa til myrkur og blekkja barnið. Alveg spurning um að fara að redda gardínum fyrir herbergisgluggann hans því risasængurverið er einhvern veginn ekki alveg að gera sig núna.

Palli svæfði Bjarna í kvöld. Í fyrsta lagi gekk frekar brösulega að fá strumpinn til að fara að kúra á meðan enn var birta úti. Svo las Palli alveg fleiri en eina bók. Ekki dugði það til. Þá brá hann á það ráð að telja upp öll dýrin í dýragarðinum og segja góða nótt við þau fyrir Bjarna. Hann gleymdi reyndar tapírnum, en við erum að tala um það að ógapíinn fékk góða nótt, svo mörg voru dýrin!! Þetta svínvirkaði og litli dýraaðdáandinn hvíslaði góða nótt til dýranna þangað til hann sofnaði.

En Palli varð auðvitað grútsybbinn sjálfur eftir þetta. Það er nú galdurinn við þetta, maður er kannski hress og með stór plön um að vinna eftir að strumps er sofnaður, en þegar stubbur er búinn að taka mann á sálfræðinni og taugum þá er maður enn sybbnari en hann.

Sjálf var ég að spá í að vinna í kvöld. En úpsí, vitið þið bara hvað!? Það er DVD-diskur með fyrstu fjórum þáttunum af Ugly Betty fastur í diskadrifinu á tölvunni minni, þannig að ég bara neyddist til að liggja og glápa frekar en að vinna. Æjæj. Æjá...kannski tölvan mín sé að syngja sinn svanasöng með þessu...spurning hvort ég neyðist til að fá mér nýja og láta kryfja þessa til að ná Ugly Betty út. Andvarp...

...en ekki strax! Ég get klárað stykkið mitt þó skemmtiefni sé fast í tölvunni...alla vega svo framarlega sem ég dett ekki í að glápa!

P.S. Annars finnst mér Ugly Betty bara alls ekkert ugly. Við erum meir að segja með mjög svipaðar augabrúnir, ég og hún, og ég er nú ekkert svo hræðilega ugly er það? Er það?? Og leikkonan sem leikur hana, Amerika Ferrera, er rosa falleg. Æjá, skemmtilegir þættir, virka alveg. Rosa fjör.

Rauður varalitur

2008-04-14T06:15:00.000-07:00

Það fer víst ekki öllum vel að bera eldrauðan varalit. Ég er búin að gefast upp á að reyna það sjálf, hann bara virkar ekki á mér. Og í myndbandinu við lagið We are the Robots með þýsku sveitinni Kraftwerk má sjá glögglega hvernig sumir geta borið eldrauðan varalit og aðrir ekki.

...en mikið eiga þeir fínt stúdíó með skemmtilegum græjum í!

(Ég er enn að brasa í sama stykkinu, snyrta og snyrta og snyrta...núna er þetta farið að fá smá líf...)

Guðmundur Rugl, fjórði kafli

2008-04-09T05:59:00.001-07:00

Smellið á myndirnar til að sjá betur:

Bollywood rómantík

2008-04-08T12:58:00.000-07:00

Ég sit í sófanum og hekla afmælisgjöf handa Idu frá Álandseyjum. Vinnuþrællinn Páll er aldrei þessu vant úti á tónleikum ásamt Christosi hinum gríska (allt of lítið um að Palli komist á svoleiðis þar sem það er búið að vera brjálað að gera hjá honum).

Meðfram heklinu gramsa ég á youtube. Meðal annars fann ég þetta fallega bollywoodlag, Diwana.

Oh...er þetta ekki fagurt!

Sé það, ég þarf að fara að komast í einhverja góða kellingabíómynd að glápa á til að rækta mína innri kellu. Ágætt líka til að pústa út eftir mína eigin vinnutörn. En á morgun mun ég slá í bykkjuna og hreinsa villurnar úr nótunum mínum og byrja að búa til parta (=sér nótur handa hverjum og einum v. sinfóníunnar minnar) handa 67 manns!

Knús og góða nótt til ykkar allra!

Strumpaprófið

2008-04-08T03:48:00.000-07:00

Ég tók strumpaprófið eins og fleiri. Niðurstöðurnar koma mjög á óvart, eða þannig ;):

Endilega prófið sjálf: Strumpaprófið.

Kommíng öpp next: Meiri Guðmundur Rugl á næsta leiti...

Guðmundur Rugl, þriðji kafli

2008-03-20T05:31:00.002-07:00

Í dag, skírdag, er fermingardagur Guðna helgargríss. Palli helgargöltur skaust til Íslands í gær til að vera viðstaddur herlegheitin. Guðni kom til okkar í e.k. fermingarferð með tilheyrandi dekri og skrípabókakaupum fyrir ca. mánuði síðan í skiptum fyrir að við Bjarni missum af fermingunni (ódýrara og notadrýgra að flytja einn helgargrís til Köben í viku en að flytja kellingu og Bjarn til Íslands í tvo daga). Til hamingju, Guðni grís, njóttu dagsins!!!

Hér kemur svo þriðji hluti framhaldssögunnar um Guðmund Rugl, smellið á myndirnar til að stækka þær:

Fimm mínúna færsla

2008-03-19T03:32:00.000-07:00

GENGISFALL:

Er þetta ekki djók! Námslánin mín hafa rýrnað um 1/3 bara út af slöku gengi íslensku krónunnar á meðan danska krónan virðist í góðu skapi. Þeir sem eru á leið í verslunarferð á Strikið ættu bara að fara í Hagkaup. Ég er alvarlega að íhuga að fá mér yfirdrátt á danska reikningnum mínum en spara námsmannayfirdráttinn á íslenska reikningnum. Gengisfall og nótur, það er það sem mig dreymir allar nætur. Nema reyndar dreymdi mig líka síðustu nótt að Bjarni var að ganga í svefni...nú jæja.

NÓTUR:

Síðustu daga hef ég unnið daga og nætur til að klára þennan litla kafla í sinfóníunni minni. Í morgun prentaði ég út, rétt áður en ég fór í tíma hjá öðrum kennaranum mínum. Ég mætti á slaginu 9:15 eftir setu síðan kl.5 í morgun, fullkomlega meðvituð um að það hljóti að vera allt morandi í villum, plús að það vantar skrilljón smáatriði og núansa.

Og núna sit ég í mannlausum matsalnum í fína konunglega skólanum mínum og borða nesti eftir tveggja tíma maraþontíma. Nóturnar mínar eru ekki lengur bara svartar, heldur bara mjög rauðar líka. Þó gett ég glatt sjálfa mig með því að það sem er rautt er eitthvað sem er ýmist rittháttarlegs eðlis, eða eitthvað sem ég hef gleymt í akkorðinu, eða náði ekki að gera. Og ég er í góðu skapi þrátt fyrir allt stressið og rauða blekið því ég læri svo hrikalega mikið á þessu. Plús að ég fékk ýmis góð komment.

Þannig að; þessar nótur verða ekki sendar eitt né neitt í dag. Ég ætla heldur ekki að loka mig inni alla páskana og djöflast. En ég kem til með að þurfa að dúllast aðeins í þessu, kannski svona 1-2 klst. á dag, þangað til verkinu er lokið.

En núna ætla ég að fara í nudd, hjóla heim og skila af mér dótinu mínu, kaupa fullt af mat til páskanna, skila honum heim, sækja Bjarna og...

...fara út að leika í snjónum með syni mínum!

P.S. Og svo er bara spurning hvort þetta sándar eitthvað! Kemur í ljós...pæli ekki meir í því í dag.

Smá sunnudagsfærsla

2008-03-16T06:22:00.000-07:00

Palli og Bjarni eru heima í "húsinu okkar". Ég er á jarðhæð í þessu sama húsi að passa kött. Ég er ekki mjög flínk í að passa köttinn. Ég á stundum að gefa honum að borða á kvöldin þegar nágrannakona okkar er ekki heima, en kisa litla lætur stundum ekki sjá sig þegar hún á að koma inn. Og í gær kom hún ekki inn. En núna sit ég niðri með opna glugga og kattamat og bíð eftir kisu og nota sénsinn og vinn í músíkinni minni í leiðinni. Og skrifa ponsulitla færslu.

BJARNI FER Í LEIKHÚS:

Í morgun fórum við með Bjarna litla stubb í leikhús. Við fórum á brúðuleikrit sem heitir "Den lille pige fra havet". Bjarni er mikið búinn að dást að auglýsingaplakati sem hangir uppi í leikskólanum með mynd af sæhesti, stelpu og hafmeyju. Kellan fór á netið og sá að þessi sýning er hönnuð með 2-5 ára börn í huga, og það var alveg tilvalið að dressa familíuna upp í sunnudagsföt og fara saman á brúðuleikhús kl. 10:30 á sunnudagsmorgni. Ég held ég hafi aldrei farið í leikhús svona snemma dags. En það svínvirkar.

Þegar inn í salinn var komið leist Bjarna ekkert á blikuna; dimmt og fullt af fólki og furðulegheitum. Fyrstu mínúturnar vissi hann ekki alveg hvað honum ætti að finnast, var hinn eymdarlegasti og mjálmaði lágt svo illum augnaráðum frá foreldrum annarra barna ringdi yfir okkur (Danir eru ekkert feimnir að senda manni illt augnaráð ef barnið manns er með hávaða). En svo datt hann alveg inn í leikritið og skemmti sér konunglega. Sýningin var líka æðislega dúlluleg og falleg, og góð músík, leikmynd og búningar og ég veit ekki hvað. Rosa gaman fyrir okkur öll.

Eftir þetta hjóluðum við í góða veðrinu út á Austurbrú á fjölskyldukaffihús sem þar er staðsett. Þetta var alveg ágætur hjólatúr en vel þess virði því öll nutum við lífsins á kaffihúsinu; Bjarni í leikfangahorninu og við þreyttu foreldrarnir tróðum okkur út af brönsj og drukkum te og flettum blöðum og tímaritum, milli þess sem við dáðumst af afkvæmi okkar leika sér fallega og stungum upp í það bita og bita.

Svo var hjólað til baka fram hjá blómstrandi trjám, páskaliljum og fallegum byggingum og görðum, allt baðað í sólskini og umkringt heiðbláum himni. Yndisleg sunnudagsstemmning*.

En nú er ekki lengur til setunnar boðið. Ég ætla að senda nóturnar mínar með pósti til Álaborgar á miðvikudaginn, en þangað til mun ég vinna eins og óð.

(Myndin af blómstrandi trénu er eftir Githu Schultz).

COMING UP NEXT:

Farið ekki langt! Fylgist með bloggsíðu sveittu húsmóðurinnar því von er á þriðja hluta hins æsispennandi ævintýris um Guðmund Rugl á næstu dögum!

* ...en það er ekki alltaf svona gott veður hérna, stundum rok og slatti af rigningu. En svona dagar bæta það upp, og bæta líka upp fjallaleysið (var að kíkja á Esjuna á vef veðurstofunnar, það er nú ekkert sem kemur alveg í staðinn fyrir hana. En - ég er ekkert að kvarta...)

Stund milli stríða

2008-02-26T09:13:00.000-08:00

Við Palli keppumst bæði í akkorði við "deadline" þessa dagana. Í morgun byrjaði ég að semja klukkan fimm en Palli vann fram á nótt. Á morgun ætla ég að vakna enn fyrr, og hann þarf að vinna jafnvel enn lengra fram á nótt, þannig að ég velti fyrir mér hvort við munum mætast á vaktaskiptunum. En - akkúrat núna er pása hjá mér, því ég get ekki mögulega samið meira í dag (plús að ég er á Bjarnapössunarvakt).

SINFÓNÍAN MÍN:

Ég er nýkomin heim úr fyrsta tímanum í útsetningum (orkestrasjón) eftir jólafrí! Já, kennararnir eru búnir að vera uppteknir og veikir, og þetta er einkatími númer tvö sem ég mæti í eftir jól!

En það er nú ekki sagan sem ég ætlaði að segja. Aðalfréttin er að ég mætti með 20 blaðsíðna skor fyrir sinfóníuhljómsveit, langt á veg komið (á ég að þora að segja næstum búið?) og kennarinn minn strokaði ekki út eina einustu nótu! Það eina sem hann vildi breyta er að skipta út 3 töktum af fagotti fyrir 3 takta af ensku horni! Ég get alveg lifað með því, og það er bara frekar góð hugmynd. Hann var í stuttu máli bara voða hrifinn og kom með alls konar góð ráð og komment sem ég mun nota næstu þrjá daga, en þessir þrír dagar munu fara í hrikalegt akkorð að klára stykkið (eða réttara sagt "klára" stykkið, því ég mun örugglega fínisera eitthvað áfram, þó ég skili því í þessari tilvonandi "kláruðu" mynd)!

Ég tek það fram að þetta er sami kennarinn og lét mig útsetja sömu einu blaðsíðuna af Chopin 4 sinnum og strokaði út heilu og hálfu blaðsíðurnar.

(Og svo má auðvitað ímynda sér að hann hreinlega hafi ákveðið að hræða mig ekki með strokleðrinu núna því það eru bara þrír dagar í skiladag. En ég kýs að túlka þetta sem svo að hann sé bara voða hrifinn, enda fór hann ekkert leynt með það. Gort gort...)

BJARNI FER TIL TANNLÆKNIS:

Í morgun fór Bjarni litli í sína fyrstu tannlæknaskoðun. Tannlæknirinn sem boðaði Bjarna í skoðunina virðist vera skólatannlæknir í Bavnehøj-skóla. Bjarna leist vel á púsluspilin hjá tannlækninum, en þegar tannsi kallaði okkur inn í stofuna sína leit Bjarni á tannsann, stólinn og tækin og fór svo að háskæla! Tannsa (kvenkyns tannsi) átti Bamse og Ælling (sem eru krúttlegir bangsar úr Bamse og Kylling, sem er ofurkrúttað danskt barnaefni) og Bjarni litli knúsaði þá báða fast að sér á meðan múttan var yfirheyrð. Svo fórum við bæði í stólinn og þá varð Bjarni alveg tjúll, en með blöndu af blíðu og stríðu tókst okkur ætlunarverkið, þ.e. að skoða og telja tennurnar. Þær voru margar og fínar og Bjarni þótti fyrirmyndarbarn hvað tannburstun og nammibindindi varðar (enda er hann vitlaus í gulrætur og gúrkur en fær eiginlega aldrei nammi, kannski pönnsur og kökur um helgar).

Að lokinni skoðun fékk Bjarni litli verðlaun frá tannlækninum; límmiða og þennan fína tannbursta í boði "Københavns Kommune". Ekki allir sem eiga kommúnutannbursta:

Tannburstinn með áletruninni "Københavns Kommune Tandpleje"

COMING UP NEXT:

Þetta er samt eiginlega búið: Ég skrapp í þrjá daga til Stokkhólms til að vinna, míngla við tónsmíðanema og hlusta á músík. Það var stuð, puð og tuð (ekki kannski svo mikið tuð, en það rímaði svo flott).

Guðni helgargrís er nýbúinn að vera hjá okkur í vikuheimsókn. Það var voða kósý, og hálf tómlegt í kotinu nú þegar hann er farinn aftur til Íslands.

Farið ekki langt! Lesendur sveittu húsmóðurinnar eiga því von á framhaldi ævintýra Guðmundar rugls á næstu dögum, hér á blogginu (lesist með Bjögga Halldórs-rödd í anda Stöðvar tvöööö-kynninga).

Hildur sellófrænka kemur á mánudag. Henni verður pískað út í upptökur (4. mars) á sellóstykkinu ógurlega sem ég samdi handa henni og tónleikaspil (5. mars) með sama stykki. Sjálf mun ég ásamt Palla, Júlíusi flautustrák og Camillu harmonikkustelpu frumflytja furðustykkið Clam (fyrir rafgítar, harmonikku, altflautu og lítið casiohljómborð) á þessum sömu tónleikum, sjá nánari upplýsingar á mæspeisinu mínu.

En núna ætla ég að elda plokkara úr pangaseus-flaki (dónt ask mí hvað þetta heitir á íslensku, þetta er ódýr fiskur sem ég nota sem ýsuígildi), því þrátt fyrir akkorð hjá okkur Palla þá fá allir fjölskyldumeðlimir hollan og góðan mat!

P.S. 2 KLST. SÍÐAR- JA HÉRNA!!!

...ég var rétt í þessu að fá sms um að deddlænið mitt hafi verið fært aftur um ca. 3 vikur! Ég er svo aldeilis yfir mig bit! En ég ætla samt að halda áfram að vera ógissliga dugleg, því þetta er ekki það eina sem er á dagskrá hjá mér. En phjúff, nú get ég samt andað gráðunni léttar...

Kusa in the sky...

2008-02-13T12:09:00.000-08:00

Að ráði Elínar ákvað ég að eyða bara vídeóinu úr færslu gærdagsins en ekki allri færslunni. Snjallt.

SEMINAR:

Áðan var ég á fyrirlestri í skólanum. Hann var á dönsku.

Fyrst talaði skólafélagi minn í einn og hálfan tíma. Sá talar hratt og ekkert endilega mjög skýrt, og ég skildi ca. 30% af því sem hann sagði. En allt í lagi með það, ég skildi nógu mikið til að vita nokkurn veginn hvað hann væri að tala um og að geta gúglað það sem ég skildi ekki.

Næst talaði annar skólafélagi minn í annan einn og hálfan tíma. Hann talaði hátt og skýrt, en þó dönsku, sem við vitum öll hvernig hljómar, hversu "skýrt" sem hún er töluð. Ég skildi alveg 70% af því sem hann sagði, en það var um flókið efni og svona, og flókna tónlist, og þessu fylgdu flóknar nótur dauðans! Steininn tók út þegar hann dreifði tíu blaðsíðna ljósriti um eitthvað flókið tónfræðijargon Á ÞÝSKU! Ég tek það fram að ég hef aldrei lært þýsku, ég tók frönsku! Þó var ég agalega dugleg að fylgjast með og einbeita mér að því að skilja, bæði flóknu pælingarnar og dönskuna, sem var eins og fyrr segir með skiljanlegra móti.

En - eftir klukkutíma (samtals tvo og hálfan ef ég tel hinn gaurinn með) var ég komin út í þetta:

Eftir þetta sáu skólafélagar mínir þreytusvipinn á mér og réttu mér skor að verkinu ""...zwei Gefuhle...", Musik mit Leonardo" eftir Lachenman. Lachenman þessi er er aðalgaurinn á Stockholm New Music-hátíðinni sem við tónsmíðanemar erum að fara á í næstu viku. Reyndar fara krakkarnir á laugardaginn en ég kem seinna og fer fyrr heim vegna þess að við eigum von á Guðna helgargrís í heimsókn og ég vil ekki vera týnd allan tímann á meðan hann er hér!

Eníveis - ég fékk þetta skor og svo var sett á play og þá var ofsa gaman, og einhvern veginn átti ég aðeins auðveldara með að skilja alheimstungumálið heldur en annars vegar dönsku og hins vegar fagurfræðiheimspekitónfræðipólitísktjargondauðans. En gaurinn fær alveg prik fyrir að leggja sig fram um að ég og Christos hinn gríski værum með á nótunum í fyrirlestrinum.

En já...ég fæ smá bjánahroll yfir sjálfri mér yfir að vera ekki betri í dönsku en þetta! Ég sem er búin að læra dönsku í 7 ár, fékk verðlaun fyrir samræmdu prófin í dönsku og bara...já...hélt ég væri góð í dönsku! Skammast mín fyrir að vera ekki betri eftir alla þessa mánuði, en...svona er þetta þegar maður lokar sig inni að semja allan daginn, og talar aðallega við makann og soninn sem báðir blaðra íslensku.

LAS:

Annars var Bjarni strumpur veikur í dag...eða þ.e.a.s. hann var veikur nógu lengi í morgun til að ég ákvað að hringja í leikskólann og afboða komu hans, og svo hresstist hann akkúrat þegar það var eiginlega of seint að ákveða að fara með hann! Doldið týpískt! En það er nú gott að hann hresstist, og ég vona að litli söngfuglinn verði bara eldhress á morgun.

P.S. Ef einhver er að velta fyrir sér hvað stendur þarna til hægri á myndinni þá er það: "Ég get ekki meir í bili. Heilinn minn er svo þreyttur".

Sólarhringsfærsla

2008-02-12T12:19:00.000-08:00

Hér kemur færsla sem verður eytt eftir einn sólarhring!

Ástæðan fyrir því er að ég er frekar lítið fyrir að setja mjög persónulegar myndir af Bjarna á netið, nema sumar, en þetta er einhver sérviska í mér. Kannski finnst mér óþægilegt að allur heimurinn geti downloadað honum.

En núna geri ég smá undantekningu, en það er bara til þess að vinir, ættingjar og vandamenn geti séð þetta myndband af okkur að syngja og púsla í hjónarúminu. Krúttlegt ekki satt :)?!:

(Hér var myndband, er búin að taka það út eins og ég sagðist myndu gera. Smá sérviska hérna...).

Annars er allt í góðum gír hér. Bæði vinnum við eins og vitleysingar, en þó af skynsemi og pössum að Bjarni fái athygli og knús. Það lítur út fyrir að ég verði á skrilljón til 11. mars, en svo er ég að vona að ég geti notið aðeins vorsins sem virðist vera nánast komið á íslenskan mælikvarða.

Þess utan eyði ég allt of miklum tíma á nýja mæspeisinu mínu en markmið mitt þar er ekki bara að eiga sýnishorn af mér og minni músík heldur líka safna saman spennó tónlist og tónlistarmönnum fyrir hvern sem langar að skoða og heyra! Vinalistinn minn er á random sem þýðir smá óvissuferð fyrir mæspeiskönnuði.

Við Palli erum í ógurlegu nammiátaki, sem þýðir að það má bara borða nammi á nammideginum, sem er föstudagur hverrar viku. Akkúrat núna erum við að drepast úr nammilöngun en til að slá á hana hitum við kakó.

Jæja, látum þetta gott heita. Á morgun fer maður aftur að þræla á galeiðunni. En það er gaman...

Myndir og punktar

2008-02-08T13:10:00.000-08:00

Kellan er búin að vera sveitt sem nokkru sinni fyrr, enda mikið að gera! Hér koma nokkrar svipmyndir og litlir punktar úr lífinu þessa dagana:

Afmælisbarn dagsins er Guðni helgargrís sem er 14 ára í dag! Til hammó með ammó, Guðnó!

Hér má sjá mynd af helgargrísnum á góðum degi:

Í dag vorum við með pönnsupartý með skólafélögum mínum og tónlistarfólki. Eftir ansi mikið pönnsuát duttu pönnsugestir í djammsessjón þar sem leikið var á gítara, sílófóninn hans Bjarna og eldhúsáhöld af ýmsu tagi. Gaman aðissu.

Annars er ég að semja 5 mínútna mínístykki fyrir sinfóníuhljómsveit, og í dag komst ég að því að deddlænið fyrir að skila skorinu er 1. mars! Sem sagt, spýta í lófana:

Fyrir rúmri viku fórum við Bjarni í dýragarðinn. Það er alltaf gaman. Hér má sjá Bjarna spjalla við ljónamömmuna:

Bjarni var tígrisdýr á "fastelavn", sem er bolludagur og öskudagur í sama deginum:

Fyrir tveimur vikum eða svo elduðum við lafskássu. Þeir sem hafa aldrei heyrt um lafskássu geta lesið um slíkt í Ástríki eða Lukku Láka. Okkur fannst alla vega ofsa fyndið að finna svona dós og bara urðum að prófa:

Ég bjó mér loksins til mæspeis. Endilega kíkið á það og "addið" mér ef þið eruð með svoleiðis. En ég er enn ekki komin með facebook...enda er ég alltaf a.m.k. 5 árum á eftir öllum öðrum í svona löguðu (gemsar, netfang, blogg, mæspeis...).

En núna ætlar sveitt og þreytt kella að glápa á eins og einn Simpsons-þátt og fara svo að lúlla. Knús frá Köben.

Ég er ástfangin

2008-01-21T08:40:00.000-08:00

AF PLÁNETUNUM EFTIR HOLST!:

Eins og sagði í síðustu færslu fór ég út að leika með Holst á laugardaginn, bara á svona "casual date" og Bjarni kom með. Ekkert sérstakt, bara að hoppa í drullupollum, og í leiðinni tékkaði ég aðeins á kallinum. Bara létt og skemmtilegt svona, en mjög áhugavert og mig langaði til að kanna hann betur síðar.

Seinna þann dag fórum við á bókakaffihús; ég, Holst, Palli og Bjarni. Bjarni þurfti töluverða athygli þannig að Holst varð svolítið útundan, en ég notaði sénsinn til að kynnast honum aðeins nánar á meðan Palli og Bjarni skoðuðu stórfurðulegan fornbókakjallarann á staðnum.

Um kvöldið náði ég að kynnast Holst ansi vel inni í svefnherberginu á meðan Palli las frammi í stofu. Eftir það gerðist eitthvað innra með mér. Ég gat ekki hætt að hugsa um hann, og allt sem hann gerði var svo gáfulegt og sniðugt og æðislegt og fallegt. Ég komst líka að því að við eigum ótrúlega margt sameiginlegt, og því nær sem ég kemst að honum því aðdáunarfyllri verð ég. Og núna á ég að vera að semja doldið fyrir sinfóníuhljómsveit (ath. að "doldið" fyrir sinfóníuhljómsveit tekur samt óratíma að föndra!) en er þess í stað búin að vera að skoða Plánetuskorið í allan morgun.

En ég er líka ástfangin af Palla. Ég vona að við getum öll lifað saman í sátt og samlyndi; ég, Holst, Palli og Bjarni. Það væri algjör draumur í dós.

SPRIKL:

Jæja. Sveitta húsmóðirin er í massífum heilsupælingum þessa dagana með það að markmiði að auka orku og þol almennt. Haustönnin einkenndist af almennu orkuleysi en vorönnin má ekki gera það líka. Svo virtust fínu jógatímarnir fara alveg með mig og enduðu í krónískum eymslum í bringunni. Það skal tekið fram að þetta var astanga-vinyasa jóga, sem samkvæmt Gumma frænda mínum, sem er jógagúrú, er barasta allt of hart fyrir mig. Hann mælti frekar með iyanga-jóga, held það sé skrifað svona.

En svo er bara spurning hvort maður reynir að virkja gamla góða sundlaugavanann sinn hér í landi rándýrra ískaldra sundlauga. Það má alla vega reyna. Og um margt að velja. Vil ég synda í hringi í DGI-byen? Það hljómar einhvern veginn eins og maður eigi eftir að sveigjast í aðra áttina eftir sjöhundruðmetrana. Vil ég synda allsber á sunnudagseftirmiðdögum í Fredriksberg Svømmehal? Nú veit ég alla vega hvað hægt er að bralla með næstu gestum sem álpast til að heimsækja okkur.

Annars eru hjólreiðarnar líka ansi gott sprikl, og þessar fáu brekkur sem ég hef hingað til hjólað upp og ekki tekið eftir eru núna hið mesta puð. Og þá rifjast upp að þær voru líka puð síðasta sumar.

En á morgun ætla ég í hið skemmtilegasta sprikl, nefnilega á skauta með Idu frá Álandseyjum.

SKRÝTIÐ SAMTAL UTANVIÐSIG KELLU (AÐ HUGSA UM HOLST) OG IDU FRÁ ÁLANDSEYJUM:

Kellan: "Let's speak English now since you're Swedish and a foreigner like me".

Julius: "She's not Swedish she's...

Julius: "...Finnish"!
Kellan á sömu stundu: "From Åland, sorry"!!

Ida: "...from the Finnish part of it".

Kellan: "And you speak Finnish as your mother language".

Julius og Ida horfa furðu lostin á kelluna, því kellan hefur oftsinnis heyrt Idu tala móðurmál sitt.

Ida: "Swedish..."

Kellan: "...because you speak Swedish all the time, sorry"!!

Þannig að Ida frá Álandseyjum lítur á sig sem Álandseyjabúa, þó líka sem e.k. Finna (á sama hátt og Færeyingar eru Danir) með sænsku sem móðurmál. Getur verið ruglandi ef maður er ástfangin.

Rólegheit á laugardegi

2008-01-19T02:04:00.000-08:00

ÚT AÐ LEIKA MEÐ HOLST:

Þó það geti verið svolítið puð stundum að vera móðir tveggja og hálfs árs gamals barns og jafnframt tónsmíðanemi og nörd, þá er stundum hægt að láta þetta fara vel saman á skemmtilegan hátt. Hér kemur uppskrift að góðum laugardagsmorgni fyrir fjölskyldur eða hreinlega bara einstaklinga sem hafa gaman af að fara út að leika og moka sand. Sjálfri finnst mér sandmokstur í sandkassa ótrúlega róandi og afslappandi, spurning hvort hægt væri að setja upp skemmtileg leiksvæði fyrir stressað fullorðið fólk með sandi og dóti. En hér kemur uppskriftin:

1) Klæddu þig vel (og barnið ef þú ert með eitt slíkt meðferðis). Á þessum árstíma er yfirleitt ólíklegt að maður sé að klæða sig of vel frekar en hitt. Athugaðu að klæða barnið þannig að það geti lagst ofaní drullupolla án þess að það hafi áhrif á skap þitt eða stytti leiktímann.

2) Taktu með þér æpodd með góðri tónlist. Mælt er með heyrnartólum sem detta ekki úr eyrunum, því það getur skapað óþarfa pirring.

3) Sértu tónsmíðanemi og nörd er t.d. mælt með að hlusta á verk eins og Pláneturnar eftir Holst og dunda sér við að efnagreina "sándin" á meðan barnið hoppar í drullupollum. ("Já, hér eru básúnur og svo trompetar áttund ofar, og strengirnir eru með þetta á móti. Eru þetta selló og fagott saman? Þarna virðast trompetar vera með dempara að spila forte", o.s.frv.). Reyndu að sjá fyrir þér hvernig skorið gæti litið út.

4) Svo er hægt að hugsa sér að tónlistin sé sándtrakk við lífið. Að róla hátt upp í loft er allt öðruvísi með músík sem styður þá upplifun, eða að teikna í sandinn á meðan rólegur kafli rúllar í gegn. Svo má slá taktinn með trjágrein ef þannig liggur á manni.

5) Þar sem þetta á að vera skemmtilegt og afslappandi verður músíknördinn að geta sleppt takinu á Holst þegar barnið vill spjalla eða fá athygli, eða þegar þarf að fylgjast extra vel með því. Þá er ágætt að geta leitt athyglina frá tónlistinni, og einbeita sér svo aftur að henni þegar færi gefst. Gott er að muna að þetta á fyrst og fremst að vera gaman en ekki beinlínis vinna. En ef vel tekst til þá þýðir þetta lengri leiktíma úti fyrir barnið með rólegri og afslappaðri fullorðinni manneskju sem er ekki á klukkunni að bíða eftir að komast inn aftur, og kátu barni sem fær athygli og líka frið til að skoða umhverfi sitt undir eftirliti. Fullorðni nördinn ætti að vera ánægður með að geta nördast í músík og "unnið" aðeins þó verið sé að viðra sig (og barnið).

Svo er hægt að gera þetta án barns ef vill, en um að gera að leika sér pínu samt því það er svo gaman.

SKRÝTINN DRAUMUR:

Í nótt dreymdi mig, að ég væri tvær manneskjur. Ekki tvær manneskjur í einni, heldur hreinlega tvö stykki manneskjur! Önnur þeirra var ég eins og ég er hér og nú. Hin var einhleypur, ljós- og síðhærður lögfræðingur! Sem sagt, mjög langt frá því að vera ég eins og ég er hér og nú.

Það skondna við þessa tilveru er að við höfðum bara samtals eina vitund, því við vorum í rauninni einn hugur. Ég verð reyndar að játa að ég er ekki algjörlega með á hreinu hvernig hugtökin vitund eða einn hugur eru skilgreind, en í þessu tilfelli var það þannig að þegar önnur konan var á átópælot að gera eitthvað eða jafnvel sofandi, þá var hin að einbeita sér eða a.m.k. að gera eitthvað meðvitað. Í stuttu máli þá gat athyglin bara verið hjá annarri manneskjunni.

Þetta gat skapað smá vandamál. Til dæmis var lögfræðingurinn á einum tímapunkti nýbúinn að flytja ræðu eftir blaði á einhverri ráðstefnu (á átópælot) og var að spjalla við einhvern eftirá sem var að vitna í ræðuna. Þá hafði hún ekki hugmynd um hvað hann var að tala um eða um hvað ræðan hafði verið, af því á þeirri stundu hafði hugurinn verið hjá hinni mannesjunni (ég-inni) sem hafði verið að gefa Bjarna að borða.

Hápunktur draumsins var án efa þegar trendí lögfræðingnum, sem átti fullt af geggjuðum dísægn-fötum, var boðið í rosa flott partý í kafbát! Kafbáturinn var á leynilegum stað einhvers staðar hér í Köben og í honum var eitthvað fólk og vínber og freyðivín og fínerí. Ljóshærði lögfræðingurinn með liðaða síða hárið var að velta fyrir sér hvort hún þyrði í svona kafbát vegna innilokunarkenndar, þegar ég (hin eiginlega ég með einn hug á eina manneskju) vaknaði.

Tvær manneskjur sem geta ekki einbeitt sér samtímis af því þær eru bara með einn hug. Þetta væri nú alveg hugmynd að kvikmynd. Spurning um að hringja í Tim Burton eða fólkið sem framleiðir Star Trek. Hihihi...

P.S. Tókuð þið eftir innsláttarvillunni??? Kannski þetta sé e.k. "Freudian slip"!